ಕವನ

ಆಸೆ ಆಕಾಂಕ್ಷೆಗಳು 

ಆಸೆ ಆಕಾಂಕ್ಷೆಗಳು

ಹಕ್ಕಿ ರೆಕ್ಕೆ ಮೇಲಿನ ಚಿತ್ರಗಳೇ

ಹೊರತು

ಮರದ ರೆಂಬೆ ಕೊಂಬೆಗಳ

ವೈಯ್ಯಾರದ ತೊನೆದಾಟವಲ್ಲ

ಸಿಡಿಲು ಮೋಡದೊಡಲ

ಕ್ರಾಂತಿಯೇ

ಹೊರತು

ನೆಲದ ಮೇಲಣ ಕಣ್

ರಂಜನೆಯಲ್ಲ

ಚಿಗುರು 

ಆಂತರ್ಯದ ಸೌಂದರ್ಯವೇ

ಹೊರತು

ಆಕರ್ಷಿಸುವ ಅಹಂ ಅಲ್ಲ

ಮೊಗದ ಕಾಂತಿ

ಆತ್ಮ ಸ್ಥೈರ್ಯವೇ ಹೊರತು

ಅವರಿವರ 

ಸ್ತುತಿ ನಿಂದೆಗಳ

ಸರಕಲ್ಲ

ಏರುವ ಆಗಸ

ಸಾಧನೆಯೇ ಹೊರತು

ಭೂಮಿಯಿಂದ ಛೇದಿಸಿಕೊಂಡ

ಗುರಿಯಲ್ಲ

ಹುಡುಕಾಟದ ಮೀನಿನ ರೆಕ್ಕೆ

ಜೀವನವೇ ಹೊರತು

ಹೆಜ್ಜೆ ಗುರುತು ಕೊಟ್ಟ

ಮೋಜಿನಾಟವಲ್ಲ

ಗಿರಗಿರನೆಂದು ತಿರುಗೋ

ಸುಂಟರಗಾಳಿ

ಒತ್ತರಿಸಿಕೊಂಡ ಗಾತ್ರವೇ ಹೊರತು

ಧಾಳಿಯಿಟ್ಟು ಹೊತ್ತೊಯ್ಯುವ ಹುನ್ನಾರ 

ಅಲ್ಲವೇ ಅಲ್ಲ!

30/05/2015