ಕವನ

ಮಾಯಾ ಜಿಂಕೆ

ಮಾಯಾ ಜಿಂಕೆಯ 

ಬೆನ್ನು ಹತ್ತಬಾರದು

ಹೌದು

ಅದು "ಮಾಯಾಜಿಂಕೆ"

ಅದು ಕಾರಣ 

ಅದರ ಬೆನ್ನೇ ಬಿಡದು 

ನನ್ನನು...!

ಬೇಟವೇ ಬೇಟೆಯಾಗಿ

ನಿಲ್ಲಿಸಿರಲು

ಜಿಂಕೆ ಓಡಿದಂತೆ

ಈ ಕಣ್ಣ ಓಟ

ಅದರ ಕಣ್ಣ ಕಾಂತಿಗೆ

ಪೈಪೋಟಿಗೆ ಬಿದ್ದು

ಶರವೇಗದ ಬುದ್ದಿಯ ಆಟ!

ಭೃಂಗದ ಬೆನ್ನೇರಿ ಬಂದ

ಶೃಂಗಾರದಂತೆ

ಕಣ್ಣೆವೆಗಳೆಲ್ಲಾ ಸೂಜಿಮೊನೆಯಾಗಿ

ನಾಟುತ್ತಲಿವೆ, ಹೀರುತ್ತಲಿವೆ 

ಆಸೆಗಳನು

ಓಡುವ ಜಿಂಕೆಯ

ಮೈಮೇಲಿನ ನೂರಾರು ಕಣ್ಣುಗಳಲಿ

ನೆಟ್ಟು ನೆಟ್ಟು!

ಈ ಮೋಜಿನಾಟದಲಿ

ಸೋತವರು ಯಾರೋ

ಜಿಂಕೆಯೋ?

ಕಾಮನೆಯ ಬೇಟವೋ?

ಮಿಂಚಿ ಮಿಂಚಿ ಕರೆಯುತ್ತಿರೆ

ಓಟದ ದಾರಿಯೋ

ಓಡಿ ಓಡಿ ಹಿಡಿಯುತ್ತಿಹ

ನನ್ನದೋ?!

ಮಾಯಾಜಿಂಕೆಯ ಬೆನ್ನತ್ತಿ ನಿಂತೆ....

14/05/2015