ಬದುಕಿನೆದುರಿನ ನನ್ನ ಕೆಟ್ಟ ಹಟಕ್ಕೆ
ಬದುಕು ಉತ್ತರ ಕೊಟ್ಟಾಗ
ಹಟದ ಅರ್ಥವೇ ಕಳೆದು ಹೋಯ್ತು

ಬಹುಶಃ ನನ್ನೇ ನಾ ಕಳೆದ ಹೊಸತು!

*****

ನಾವಂದುಕೊಂಡ ಸತ್ಯಕ್ಕೂ

ಹೆಚ್ಚು ಸತ್ಯಾಸತ್ಯಗಳು

ಈ ಗತದಲ್ಲಿ...

ತಿರುಗಿ ನೋಡುವುದೇ

ಅಪರಾಧ

ಕಣ್ಣೀರಿಡದ ಅಭಾಸ..

ಸೋತವು ಎಲ್ಲಾ ದುರಂತಗಳು

ನಗುವೊಂದೆ ಸಾಧನ

ಈ ನಡೆಗೆ..

ಕನಸೊಂದೆ ಆಸರೆ

ಈ ಬದುಕಿಗೆ...

****

ಅಕ್ಷಯ ತೃತೀಯ ಸ್ಪೆಷಲ್.. 

ನೀನಿಂದು 

ಸಿಗುವೆಯಾದರೆ

ಅದೇ ಅಕ್ಷಯ

ಚಿನ್ನಾ...!

ನೀನೆಂದು

ಸಿಗುವೆಯೋ

ಆಗಲೇ ಶುರು

ಅಕ್ಷಯ ಚಿನ್ನ

ನಿನ್ನಯ ಪ್ರೀತಿ...! 

21/04/2015

****

ಕಾಯುವ 

ಬೇಸಿಗೆಯಾದರೂ

ಎಷ್ಟು ಕಾದೀತು

ಮಳೆ ಮೋಡಗಳ 

ಒತ್ತಡಕ್ಕೆ ಮಣಿದು

ಕೊಚ್ಚಿ ಹೋದೀತು

ತಣಿದು

****

ಪ್ರೀತಿ, 

ನೀ ಏನೇ ಮಾಡು

ನನಗೂ ಅರ್ಥವಾಗುತ್ತದೆ

ನಿನ್ನ ಭಾಷೆ!

ಆಗಾಗ ಅನರ್ಥ

ಅರ್ಥೈಸಲು ಕೊಡು

ಒಂದಷ್ಟು ನಿನ್ನ ಹೊತ್ತು!

ಅಷ್ಟೇ ಸ್ವಾರ್ಥ...

19/04/2015

****

ನಮ್ಮಲ್ಲಿ ಅದೆಷ್ಟೋ

ನಕಾರಾತ್ಮಕ ವಿಷಯಗಳಿವೆ

ಎಂದು ವಿಷಾದಿಸುತ್ತೇವೆ

ಅದಷ್ಟೂ ನಕಾರಾತ್ಮಕಗಳೂ

ನಮ್ಮನ್ನೂ ಹೊಂದಿವೆ

ಸರಿಯೇ ಹೀಗೆ ಯೋಚಿಸಿದರೆ

ಕಮಲವು ಕಸರಿನಲ್ಲಿದೆ

ಹೌದು 

ಕೆಸರು ಕಮಲವನ್ನು ಹೊಂದಿದೆ

ಎನ್ನುವಂತೆ! 

*****

ಸಹೃದಯಿಗೆ

ಭಾವ ಹೊಕ್ಕೊ ಒಳಗಣ್ಣು ಬೇಕು

ಆಸ್ವಾಧಿಸಲು

ಇಲ್ಲವೇ ಎಲ್ಲಾ ಪದ ಸಾಲುಗಳೂ

ಅಸಂಬದ್ಧ,, ಅಸಂಬದ್ಧ!

****

ಹೆಚ್ಚು ಕನಸುಗಳು

ಅಪಾಯಕಾರಿಯೇ

ನೆನ್ನೆಯ ಕನಸು

ಇಂದು ಎದುರಿದ್ದರೂ

ನಾಳೆಗೆ ಬಲಿಯಾಗಿ

ಅನುಭವಕೆ ಏನೂ ದಕ್ಕದು!

****

ಕೃಷ್ಣಾ,

ನಿನಗೆಷ್ಟು ಸ್ನೇಹಿತೆಯರೋ

ಕೋಪ ಅಸೂಯೆಗಾದರೂ ಸರಿಯೇ

ನಿನ್ನಂತ ಹತ್ತು ಹಲವು

ಗೊಂಬೆಗಳ ಮಾಡಿ

ನಿನ್ನಂತ ಜೀವವಿಟ್ಟು

ಅದರೊಟ್ಟಿಗೆಯೇ ನಾ ಹಾಡುವೆ

ದಾರಿ ತಪ್ಪಿ ನೀ ಇತ್ತ ಬಂದರೆ

ಗಾಬರಿಯಾಗದಿರು 

ನಿನ್ನವೇ ಬಹುರೂಪಗಳ

ನನ್ನೊಂದಿಗೆ ಕಂಡು...!

ರಾಧೆಗೂ ಛಲವಿದೆ 

ಕೋಪದೊಂದಿಗೆ..!

*****

ಬಡವನ ಕೋಪ

ದವಡೆಗೆ ಮೂಲ

ತಿಳಿದೂ ತಿಳಿದೂ

ಡೆಂಟಿಸ್ಟ್ ಜೊತೆ

ಎಂತಾ ಕಾಳಗ

ಫೀಸು ಹೆಚ್ಚೆಂದು

ಹಲ್ಲು ಕೈಯೊಳಿಟ್ಟು...

****

ಬೆಳೆವ ರೈತ

ಬಡಿದು 

ಗಾಳಿಗೆ ತೂರುತ್ತಾನೆ

ಫಸಲನು

ಬೇಡವೆಂಬ 

ತಿರಸ್ಕಾರಕ್ಕಲ್ಲ

ಗಟ್ಟಿ ಕಾಳುಗಳನ್ನು 

ಹಿಡಿದಿಡಲು..!

18/04/2015

****

ತೀವ್ರತೆ ಇಲ್ಲದೆ

ವಿರಹವೂ ಸಪ್ಪೆಯೇ

ಪ್ರೀತಿಯೂ ಉಪ್ಪೇ

ಏನಿದ್ದರೂ ಅದರೊಟ್ಟಿಗೆ

ನನ್ನದು ಪೂರ್ಣ ಮಿಳಿತ..!

****

ನನ್ನೆಲ್ಲಾ ಕನ್ನಡಿಗಳು

ಹೇಳಿದ್ದು ಸುಳ್ಳೇ

ಎನ್ನಂತರಂಗದಷ್ಟು

ಸುಂದರವಿಲ್ಲವೆಂದು...

17/04/2015