ನನ್ನ ನಿಲುಗನ್ನಡಿಯ 

ತುಂಬಾ

ನಾನೇ ನನ್ನ ಚಿತ್ರ 

ಬಿಡಿಸಿಯಾಯ್ತು

ಇನ್ನು 

ಮುಖವನ್ನೆಲ್ಲಿ 

ಮುಚ್ಚಿಟ್ಟುಕೊಳ್ಳಲಿ?!

ಬಯಲಾದ 

ಕನ್ನಡಿಯ ಗಂಟು!

ಹೆಚ್ಚಿನ ರಹಸ್ಯವಿಲ್ಲದೆ

ತೀರ ಮಾಮೂಲು 

ಈ ಹೆಣ್ಣು!

*****

ನೀರು

ತುಂಬಿಕೊಂಡ ಆಕಾರಕ್ಕೆ

ಹೊಂದಿಕೊಳ್ಳುವುದೋ?

ಅನೇಕ ಆಕಾರಗಳಲ್ಲಿ ಹೊಮ್ಮಿ ತುಂಬಿ

ನೀರನ್ನೆ ಹೊಂದಿಕೊಳ್ಳುವ ಗುಣಕ್ಕೆ ರೂಢಿಸಿದರೋ

ಒಮ್ಮೊಮ್ಮೆ ಹೀಗೆ

ಪ್ರಶ್ನೆಗಳು

ತರ್ಕ ತಾತ್ಪರ್ಯ ವಿಜ್ಞಾನ!

02/05/2015

****

ಎಲ್ಲವನ್ನೂ ಎದುರಿಸಬೇಕು

ಎಂದುಕೊಳ್ಳುತ್ತೇನೆ

ಹೀಗೆ ಹಿಂಬದಿಯಲ್ಲಿ ನಡುಗುತ

ಅದೇಕೋ

ಎಲ್ಲವೂ

ಎದುರುಗೊಳ್ಳುತ್ತಲೇ

ಸವಾಲೊಡ್ಡುತ್ತವೆ

ನಾನೂ

ಆಗಾಗ ಹಿಂದೆ ಕುಸಿದು

ಮುಂದೆ

ಜಿಗಿಯುತ್ತೇನೆ.. 

ಮುಗ್ಗರಿಸಿದರೂ

ಚಿಂತೆಯಿಲ್ಲ, 

ನೆಲದ ಗಟ್ಟಿತನದ ಭರವಸೆ!..

****

ಏನು ಹೇಳುವುದು

ಇನ್ನೂ ಬಾಕಿ ಇದೆಯೇ?!

ಇದ್ದರೂ

ಅವೆಲ್ಲವೂ

ನನ್ನ ತಪ್ಪೊಪ್ಪಿಗೆ..

01/05/2015