ಅಂತರಂಗದ ರಂಗಮಂದಿರದೊಳು

ಸದಾ ಕೆನೆವ ಗೆಜ್ಜೆ ನಾದ

ಆಲಿಸದೇ ಕಿವುಡಾಗುವುದೆಂತು

ಅಳುವ-ಮುದ್ದಿಸುವ ಮಗುವಿನ ನಲಿವು

ಹಿಡಿದಿಡುವುದೆಂತು

ಕಣ್ಣಿರೂ ತಂಗಾಳಿಯೊಳು ತಣ್ಣನೆ ಆರಿಹೋಗಲು

ಹುಡುಕಿ ನಾ ಅತ್ತು ಮೊರೆವುದೆಂತು

ಆದದ್ದೆಲ್ಲಾ ನನ್ನಂತೆಯೇ, ಮುಂದಿದೇ ಎಂದು ಹೇಳಲಾಗದಂತೆ

ವಿಸ್ಮಯ ವಿನೋದಕರವಾಗಿರಲು

ನಾ ಮತ್ತೆ ಮತ್ತೆ ಮುಸುಕೊಳು ಮಸುಕಿಡುವುದೆಂತು 

***

ಮನೆಯಂಗಳದ ಬಾವಿಯೊಳು ಬಿದ್ದ

ಚಂದ್ರನ ಬಿಂಬವು;

ಚಂದಿರನು ಆ ಮನೆಗೆ ಸ್ವಂತವೇ 

ಆದಂತಹ ಭ್ರಮೆ 

ನೀನೊಮ್ಮೆ ಹೃದಯದೊಳು ಇಣುಕಿದಾಗ.... 

***

ಅವನ ಕಣ್ಣೋಟವೋ

ಮನ್ಮಥನ ಬಾಣವೋ

ಎದೆ ಬಿರಿದು;

ಅಂಗಳವೆಲ್ಲಾ ಪಾರಿಜಾತ ಹೂಗಳು... 

24/02/2014