ಕವನ

ಕೂಗು

ಹೆಣ್ಣು ಚೀರುತ್ತಾಳೆ

ದೌರ್ಜನ್ಯಕೂ ಮುನ್ನ

ಮೌನದಿ;

ನಂತರ

ಸುತ್ತಲ ಗೋಡೆ ಕಿತ್ತು ಹೋಗುವಂತೆ

ಬಲದ ಒತ್ತಡವಿದ್ದಾಗ

ಒತ್ತಿ ಹಿಡಿದದ್ದು

ತಾಮಸ ವೃತ್ತದೊಳು ಅವಳದೇ

ಅಟ್ಟ ಹಾಸ

ಹೌದು ಚೀರುವಳು

ಬರೀ ಚೀರುವಳು

ಯಾರಿದ್ದಾರೆ ಯಾರಿಲ್ಲ 

ಏನನ್ನೂ ನೋಡಳು

ಕೇಳುವವರಿಲ್ಲ

ನೋಡುವವರಿಲ್ಲ

ಆದರೂ ಅರಚಿಯೇ ತೀರುವಳು

ಅವಳೂ ಹೆಣ್ಣೇ

ಮರುಗಟ್ಟಿದ ನೋವುಗಳಿಗೆ

ತಾನೇ ದನಿ ಎತ್ತಿದ ಕೂಗಾಗಲು

ತಾನೇ ಹೋರಾಡುವಳು

ಅವಳೊಂದಿಗೆ

ಹರವಿ ತನ್ನದೇ ಭಗ್ನ ಭೂತಗಳ

ಚೀರುತ್ತಾಳೆ ಚೀರುತ್ತಾಳೆ

ಮಾಡು ಮುರಿದು ಬೀಳುವಂತೆ

ಬಿದ್ದರೂ ಬಿದ್ದೀತು ಮಾಡು

ಅಡಗದು ಕೂಗು ಅವಳದು

ನೋವುಗಳನ್ನೆಲ್ಲಾ ಉಂಡ ಮೇಲೆ

ಮಿಕ್ಕಂತೆ ತೇಗು

ಈ ಕೂಗು!

25/02/2015