ಕವನ

ಎಲ್ಲಿ ಹೋದನೋ ಈ ಹುಡುಗ

ಈ ಹುಡುಗ ಎಲ್ಲಿ ಹೋದನೋ

ರಾತ್ರಿಯಿಡೀ ಇವನದೇ ಕನಸು

ಹೊತ್ತು ಹುಟ್ಟುತ್ತಲೇ ಹುಡುಕಿ ಬಂದರೆ

ಎಲ್ಲಿ ಹೋದನೋ ಹುಡುಗ ಕನಸ ಕಿಚ್ಚು ಹತ್ತಿಸಿ

ಇದ್ದಂತೆಯೇ ಇದ್ದು ಕಣ್ರೆಪ್ಪೆ ಓಟದೊಳು

ಅದೆಲ್ಲಿಗೋ ಓಡಿಬಿಡುವ ಈ ಹುಡುಗ 

ಎಲ್ಲಿ ಹೋದನೊ ಹೇಳಿಯೂ ಹೋಗುವುದಿಲ್ಲ

ಕತ್ತಲ ಮೂಲೆಯಲ್ಲಾ ನಾ ತಡಕುವಂತೆ

ಮಾಯವಾದನೊ ಈ ಹುಡುಗ

ಕಂಡಾಗ ಒಂದಷ್ಟು ಚಕಿತಗಳ ಮುಂದಿಟ್ಟು

ಆ ಎಲ್ಲಾ ಆಶ್ಚರ್ಯಗಳಿಂದ ಹೊರಬರುವ ಹೊತ್ತಿಗೆ

ಎಲ್ಲಿ ಹೋದನೋ ಈ ಹುಡುಗ ಸುಳಿವಿಲ್ಲದಂತೆ

ಹೆಚ್ಚೇನು ಗೊತ್ತಿಲ್ಲ ಇವನ ಕುರಿತು

ಆದರೇನೋ ಸೆಳೆದುಕೊಂಡಂತೆ ಹೊರಟುಬಿಟ್ಟ

ಎದೆಯಲೊಂದು ಎಳೆಯ ಹಿಡಿದು

ಎಲ್ಲಿ ಹೋದರೂ ಹುಡುಗ, ದೂರ ಹೋಗದಿರು ನನ್ನಿಂದ!

15/02/2015