ಪದ್ಯ

ದೀಪ

ದೀಪವಿರಲಿ ಸಾವಿರಾರು

ಈ ಕಣ್ಣ ಕಾಂತಿಗೆ ಸಾಲು ಕನಸು

ಹರಿದಷ್ಟೂ ಮನದ ಹರವು

ನೆಟ್ಟಿ ನಿಲ್ಲಲಿ ದೀಪದ ಕಾವು

ಅದು ಬೆಳಕಿಗಾಗಿಯೇ ಹೊತ್ತಿ ಉರಿವ ಬೆಂಕಿ

ಉಳಿದಂತೆ ಭೂರಮೆಯೊಳು ತಣ್ಣಗೆ ಮಲಗಿದ ಒಡಲು

ಬೆಂಕಿಯು ಬೇಕು ಕತ್ತಲೆಗೆ 

ಸಣ್ಣಗೆ ಮಿಣುಕಾಡುವಂತೆ

ಕಿಚ್ಚು ಇರಲಿ ಇರದಂತೆಯೂ

ಹೆಚ್ಚಿ ಇರಲಿ

ಅದುಮಿಟ್ಟರೂ ಪುಟಿವಂತೆಯೂ 

ಬೆಳಕಾಗುವ ಬೆಂಕಿ ಕತ್ತಲೂ ಹೌದು

ಹಿಡಿದಂತೆ ಚುಕ್ಕಾಣಿ ರಥದ ಪಥವು..

ದೀಪವಿದು ಗುರುದೀಪ

ದಾರಿ ನೀಡಿ ಕನಿಕರಿಸೋ ಕಾಲವು

ಕೈಯೊಳು ಹಿಡಿದು ಸಾಗಬೇಕು ಹಾದಿ

ದೀಪವಿದ್ದಡೆಯೇ ಅಂತ್ಯವೆಂದೆಣಿಸದೆ

ಙ್ಞಾನದ ಹಸಿವಿಗೆ 

ಎದುರಾದ ಕನ್ನಡಿಗಳು ಸಾಲು ಸಾಲು 

....ದೀಪಗಳ ಸಾಲು

10/11/2015