ತುಂಬಿದ ಕೊಡದಿಂದ 

ತುಳುಕಿ ಚೆಲ್ಲೋ ನೀರು

ಚಂಚಲ ಚೆಲ್ಲು ಚೆಲ್ಲು

ದಾರಿಯುದ್ದಕ್ಕೂ ತೇವ

ಹುಟ್ಟಲಿಲ್ಲ ಒಂದು ಗಿರಿಕೆಯೂ

ತುಂಬಿಕೊಂಡದ್ದೂ ವ್ಯರ್ಥ

ಚೆಲ್ಲಿ ಹೋದದ್ದು ವ್ಯರ್ಥ

ಮನಸು ಖಾಲಿ ಖಾಲಿ 

ಆರ್ದ್ರತೆ ಆರಿ ಬಾರಿ ಬಾರಿ...

29/07/2015

ಚಿಕ್ಕಪುಟ್ಟ ಆಸೆಗಳಲ್ಲೇ

ಎತ್ತರದ ನಿರೀಕ್ಷೆಗಳಿಟ್ಟದ್ದು

ನನ್ನದೇ ತಪ್ಪೇನೋ

ಈಗ ನೋಡು ಸಣ್ಣ ಸಣ್ಣ ವಿಷಯಕ್ಕೆಲ್ಲಾ 

ತೀವ್ರ ಯಾತನೆ

ದೊಡ್ಡದನ್ನೇ ಕೇಳಿ ನೋಡುವ

ಈ ಬಾರಿ

ಯಾತನೆಗಾದರೂ ಬೆಲೆಯಿರಲಿ..!

24/07/2015

ಕವನ

ಮತ್ತೆ ಸಿಬಿರು

ಕವಲೊಡೆದ ದಾರಿಗೆ

ಬಲೇ ಸಿಬಿರು

ಕಾಲಿಗೆ ತಾಗಿದಲ್ಲ

ಮನದೊಳುಳಿದದ್ದು

ಅಳಿದ ಮೇಲೂ ಉಳಿವುದೆಂದರೆ

ಕೊಳೆಯುವುದು 

ಅದು ಮಣ್ಣೊಳಗಾಗಿದ್ದರೆ ಲೇಸಿತ್ತು

ಹೇಳಿಕೊಂಡಿದ್ದೆ ನಾನಂದೆ

ಇಂದಿಗೂ ಹೀಗೆಯೇ ಉಳಿದೆ

ಅನುಭವಗಳ ನೆನಪು ತಾಳೆ

ಗೊತ್ತಿಲ್ಲದ ಹೆಜ್ಜೆಗಳಲಿ

ಸಿಬಿರು ಮತ್ತೆ ತಾಗಿ ಅಳಲು... !

24/07/2015

ಕವನ

ಕಪ್ಪು...

ಕನಸು ಕಲ್ಪನೆಗಳೊಂದಿಗೆ

ಮಾತು ನಿಲ್ಲಿಸಿರುವೆ

ಅದಕ್ಕಾಗಿಯೇ ಏನೋ

ಕಣ್ಸುತ್ತ ಕಪ್ಪು

ಕಾಡುವ ಚಂದ್ರಮ

ಕಾಡಿಗೆ ಇಡಲು ರಾತ್ರಿ ಬಂದರೆ

ನನಗೋ ಗಾಢ ನಿದ್ದೆ..

ಹಚ್ಚಿ ಹೋದನೇನೋ ಜರಿದು

ಅದಕ್ಕೆ ಕಣ್ಸುತ್ತ ಕಪ್ಪು

ಇರುಳು ನಿದ್ದೆಯಲಿ ಕಳೆದು

ಸೂರ್ಯನನ್ನೇ ಹುಡುಕಿ

ಅವನ ಹಿಂದೆಯೇ ಬಿದ್ದು

ಅವನನೇ ದಿಟ್ಟಿಸುತ್ತ ಕೂತು

ಹೊಟ್ಟೆಗೆ ಹಸಿವಿಲ್ಲ

ಅದಕ್ಕೆ ಏನೋ ಕಣ್ಸುತ್ತ ಕಪ್ಪು

ಕನಸು ಕಾಣುವುದ ಮರೆತು

ಕನಸನೇ ಹಚ್ಚಿಕೊಂಡುಬಿಟ್ಟೆ

ನಗಿಸಿದ ಕಲ್ಪನೆಗಳ ಸರಿಸಿ

ಕಾಡುವ ಕನಸ ಕೈ ಹಿಡಿದು

ದಿನದಿನಕೂ ಉಷ್ಣವೇರಿ

ಈಗ ಕಣ್ಸುತ್ತ ಕಪ್ಪು...

ಕಣ್ಣ ಸುತ್ತಲ ಕಪ್ಪು

ಕಪ್ಪಲ್ಲದ ಮನಸ್ಸಿನದು

ಕಾಡಿಗೆಯ ಗುರುತು 

ಕನಸಿಗೆ ಮೆತ್ತಿ 

ದೃಷ್ಟಿ ತಾಗದಿರಲೆಂದು ಕೊರಗಿ

ಕ್ಷಣ ಕ್ಷಣವೂ ಕಾದು

ಮತ್ತೆ

ಕಣ್ಸುತ್ತ ಕಪ್ಪು.... 

24/07/2015

ಕವನ

ಗಾಳಿ ತಂಪು

ಸುರಿದು ಮಂಜು

ಬೆಟ್ಟದ ಹಾದಿ

ನಾವಿಬ್ಬರೇ ಎಲ್ಲಾ

ಒಮ್ಮೆ ನಾನು ಒಮ್ಮೆ ನೀನು

ಬಿಡುವಿಲ್ಲದೆ ತುಟಿಯ ತುಂಬಿ

ಮನಸೆಲ್ಲಾ ಹಣ್ಣು

ಹೊಮ್ಮಿ ಒಡಲ ಜೇನು

ಏರಿದ ತುದಿಯಲಿ

ಪದೆ ಪದೆ ನಿನ್ನ ಹೆಸರು ನಾನು

ನನ್ನ ಹೆಸರು ನೀನು

ಕೂಗಿ ಕೂಗಿ ಹೃದಯವೆಲ್ಲಾ ಪ್ರತಿಧ್ವನಿ

ಬೆಟ್ಟವದು ಮೌನ

ಹೋಗೋಣವೇ? 

ಆ ಬೆಟ್ಟದ 

ಬೆಳಗು- ಬೆಳದಿಂಗಳಿಗೆ ಹೀಗೊಮ್ಮೆ..?!

ಕವನ

ನಿನ್ನೊಳು ಕಲೆತು..

ತುಟಿಯಂಚಿನ ಮಿಂಚನ್ನೊಮ್ಮೆ ಹಿಡಿಯೋ ಹುಡುಗ

ನಾಚಿಕೆಯನೇ ಗೆದ್ದು ನಿಲ್ಲುವ ಮನಸ್ಸಾಗಲಿ ನಿನ್ನ ಕೆನ್ನೆ ಸವರಿ

ಗಲ್ಲದ ಬಿಗಿಯನ್ನೊಮ್ಮೆ ಜಗ್ಗಿ ಸೆಳೆಯೋ ಹುಡುಗ 

ಬೆರಳ ಹಿಡಿದು ಮುಷ್ಠಿಯಾಗುವ ಎದೆಗಾನಿಸಿ ಕನಸ

ಕಿವಿ ಲೋಲಕವನ್ನೊಮ್ಮೆ ಹಿಡಿದು ನಿಲ್ಲಿಸೋ ಹುಡುಗ

ಕಾಲದ ಗಡಿಯಾರ ನಿಲ್ಲಲಿ ನಮ್ಮ ಕಾದು

ಹಣೆರೇಖೆಗಳನ್ನೊಮ್ಮೆ ಚುಂಬಿಸೋ ನೀ ಹುಡುಗ

ಇಲ್ಲಸಲ್ಲದ ನನ್ನದೇ ಭ್ರಮೆಯ ಬರಹಗಳ ತೂರಿ

ಬೊಗಸೆಯೊಡ್ಡಿ ತುಂಬಿಕೊಳ್ಳೊ ನೀ ಚೆನ್ನ

ಅರಳಿ ಮುದುಡಿ ಪನ್ನೀರ ಅದುರಲಿ ತುಂಬಿ ಕಣ್ಗಳು

ನಿನ್ನ ನೀ ಮರೆತು ಒಮ್ಮೆ ಅಪ್ಪಿಕೊಳ್ಳೊ ಹುಡುಗ

ನಾ ನನ್ನೇ ಮರೆವಂತೆ ನಿನ್ನೊಳು ಕಲೆತು..

23/07/2015

ಅರಳಿ ಹೂವಾಗುವ ಮೊಗ್ಗಿಗೆ

ತಡೆ ಹಿಡಿದು ಅರಳಾಗದೆ ನಿಲ್ಲಿಸಲಾಗದು

ಇಚ್ಛೆಯಿದ್ದರೆ ಗಿಡದ ಬೇರನ್ನೇ ಕೊಯ್ಯಬೇಕು

ಇಡೀ ಹಸಿರೇ ಇಲ್ಲವಾಗಲು.. !

*****

ಕುತೂಹಲವನ್ನೇ ಕಳೆದುಕೊಂಡವರೆದುರು

ಸುಮ್ಮನೆ ಪುಳಕಗಳ ಹೊತ್ತು ಕುಣಿದರೆ

ನಿದ್ದೆ ಜೊಂಪು ನಿರಂತರ...! 

****

ಭಾವನೆಗಳು ಸರಿ ಇದ್ದರೆ

ಅಭಿವ್ಯಕ್ತಿಗೇಕೆ ಹಿಂಜರಿಕೆ ....

ಪ್ರಶ್ನೆಗಳಿದ್ದರೆ ಉತ್ತರಿಸುವ

ಇದ್ದರೆ ; ಎದುರೇ ಇಟ್ಟರೆ ..!..

19/07/2015

ಕವನ

ಕನಸುಗಳು..

ನಿದ್ದೆಯನೇ ಹತ್ತಿರ ಬರಗೊಡದು

ಈ ಕನಸುಗಳು

ದಿನವಿಡೀ ಹೊತ್ತಿ ಉರಿದು

ರಾತ್ರಿ ಸಣ್ಣಗೆ ಮಿಣುಕು

ಎಂದಿಗೂ ತಂಪಾಗದ ಮಳೆಯ ಮಿಂಚು

ಸಂಜೆಯ ಮಂದ ಮುಂಬೆಳಕು

ತಂಗಾಳಿ ಬೆನ್ನತ್ತಿ

ಜೊತೆ ನೀ ಬೆಂಕಿ ಚಳಿ

ದಿಗ್ಗನೆ ದೇದೀಪ್ಯಮಾನ

ನನ್ನ ಬಲಗೈ ಹಿಡಿದು

ನೀ ತುಟಿಯೊತ್ತಿ ಕೊಟ್ಟ ಹೂ ಮುತ್ತು..!

ಕಾಮನಬಿಲ್ಲಿನ ಬಾವಿಯೊಳು

ಬಾಗಿ ಬಾಗಿ ನಾ ನೋಡಿ ಹಿಡಿದು

ಅನೇಕ ಚಿತ್ರ ಚರಿತ್ರೆಗಳು

ಹಾರುವ ಹಕ್ಕಿಗಳು

ತಲೆಗೂದೋ ಹಸಿರುಗೊಂಚಲು

ಕರೆವ ಮೋಡವ ಕಂಡೆ ಆ ಕ್ಷಣ ನಿನ್ನ ಕಣ್ಣೊಳು..!

19/07/2015

ಮಳೆಯ ಸಂಜೆ

ಹತ್ತಿರದಲ್ಲೇ ಮೇಣದ ದೀಪವಾರಿದ ಘಮಲು

ತಂಪಾದ ಗಾಳಿ

ಆಗಾಗ ಏರಿಳಿಸೋ ಅದರ ಅಮಲು

ಅವಳು ನಕ್ಕ ಸದ್ದು

ಎಲ್ಲೆಲ್ಲೂ ಜೀರುಂಬೆ ಮಿಂಚುಹುಳುವಿದೇ ಹಾರಾಟ

ಸ್ಪಷ್ಟವಾಗುತ್ತಾ ಹೋಯಿತು

ಕತ್ತಲಲ್ಲಿ ಸದ್ದೂ ಕರಗಿತು...

18/07/2015

ಕವನ

ನಾನು ಅವನೇ...

ಅವನು ಮೌನ ನಾನು ಮಾತು

ತುಟಿಗಳು ಭಾಷೆ ಕಲಿತಿದ್ದವು...

ಅವನು ಶಬ್ದ ನಾನು ಗದ್ದಲ

ಗೆಜ್ಜೆಗಳು ಸಂಗೀತ ಕಲಿತವು

ಅವನು ಮನಸು ನಾನು ಕನಸು

ನಿದ್ದೆ ಜಪಕ್ಕೆ ಬಿದ್ದವು

ಅವನು ಚಿಗುರು ನಾನು ಹೂವು

ಆಸೆ ಕಾಯಾಗಿ ಹಣ್ಣಾಗಲು..

ಅವನು ನನ್ನವನು ನಾನು ಅವನೇ

ತನು ಮನದೊಳು ಜೀವವೊಂದಾಗಲು....

16/07/2015

ಅಲೆ ಬಂದು ಕೊಚ್ಚಿ ಹೋದ ಮೇಲೆ

ಏನಿದ್ದರೂ ಕಪ್ಪೇಚಿಪ್ಪುಗಳನ್ನಾಯುವ ಹೊಸ ಕೆಲಸ... 

ನೆನಪು ನೆನಪು...

******

ಹಲವು ಉದ್ದೇಶಗಳ

ಈ ಬದುಕು 

ಒಮ್ಮೊಮ್ಮೆ 

ಒಂದೇ ಉದ್ದೇಶಕ್ಕಾಗಿಯೇ

ಎಂಬಂತೆ ಭ್ರಮಿಸಿ

ರೋಧನೆ ಕೊಡುವುದು

ಹಲವುಗಳಲಿ ಕೆಲವಾದರೂ

ತೀರಿಸುವ

ಇನ್ನಷ್ಟು ಹುರುಪುಗೊಂಡು

ಪ್ರೀತಿ ತೀರದಲಿ

ನಲಿವಿನ ಹೂ ಬನದಲಿ... 

ಮಮತೆಯ ಕೈಸೆರೆಯಲಿ...

*****

ಒಮ್ಮೋಮ್ಮೆ ನನಗೂ ಅಳು ಬರುವುದು

ಕರುಣೆ ಬೇಡಿ ಅಲ್ಲ

ಕಣ್ಣು ಕಳೆದು ನಿಂತಾಗ 

ಬದುಕಿರುವುದಾಗಿ ಪ್ರತಿಕ್ರಿಯೆ..!

14/07/2015

ಕವನ

ಕಾಡುವ ಅದ್ಭುತ

ಒಳಗೆ ಉರಿದಷ್ಟೂ

ಹೊರಗೆ ಹಸಿರು ಹೊದ್ದು 

ನಗುವ ಭೂಮಿ

ಕಾಡುವ ಅದ್ಭುತ!

ಒಳಗೆ ನೊಂದಷ್ಟೂ

ಹೊರಗೆ ತೋರುವ

ನಿರ್ಮಲ ಪ್ರೀತಿ

ಅಮ್ಮನದು ಮಾತ್ರ!

ಕಳೆವ ಮುನ್ನ ಕಳೆದ ನಂತರವೂ

ನಿರಂತರ ಬಯಕೆ ಅವಳು

ತೀರದ ವಾತ್ಸಲ್ಯ ಎಲ್ಲರನೂ

ಅವಳಂತೆಯೇ ಬೇಡಿ ಹಟವು!

ಹೆಚ್ಚು ನೋಡದೆ

ಬರೀದೆ ಬರೆಯಲು

ತಾಪವಿಲ್ಲದಿದ್ದರೂ ಕೋಪವಿದೆ

ಸಹಿಸುವವರಾರಿಲ್ಲ ಮಗುವ ಮನವ..!

14/07/2015

ನೀ 

ಚಂದದ ಹೂ 

ನೀಡಲು

ಎನ್ನೆದೆ ಬಡಿಯುತ್ತಾ 

ನೆತ್ತಿಗೇ ಏರಿದಂತೆ

ಆವೇಗ ಉಕ್ಕಿ 

ಒಮ್ಮೆಲೆ ಇಳಿದೆ

ನಾನೇ ನಾಚಿಕೆಯಾಗಿ

ಬಲ್ಲೆಯಾ ನೀ 

ಗೆಳೆಯಾ....

ಅಂದು ಅಲ್ಲಿ 

ಹಾಗೆಲ್ಲಾ ಆಯ್ತುಬಿಡು..

*****

ಅವಸರದಿ ಚೆಲ್ಲಿಕೊಂಡ ಮುತ್ತುಗಳ

ಆರಿಸುವಾಗಿನ ಧ್ಯಾನ

ಮುಂದಿನ ಪೋಣಿಸಿದ ಸರದಲ್ಲೂ

ಅಂತದ್ದೇ ಎಚ್ಚರ; ಮಣಿ ಮಣಿ ಮುತ್ತಿಟ್ಟು!..

14/07/2015

ಸವೆದು ಹೋಗಲು

ನಷ್ಟವೆಂದು ಕುಳಿತರೆ

ಗಂಧಕ್ಕೆಲ್ಲಿ ಬೆಲೆ

ಯಾರನೂ ಮುಟ್ಟದೆ

ಮೂಲೆಯೊಳು ಗೆದ್ದಲಿಗೆ...!

*****

ಇಡೀ ಜನ್ಮ ಕಾದಳಂತೆ

ಆಳವಾದ ಸಾಗರ ಬೇಕೆಂದು

ಕೊನೆಗೊಂದು ಸಿಕ್ಕಿತ್ತು ವೃದ್ಧಾಪ್ಯದಲ್ಲಿ

ಸಾಗರ ಆಳವಾಗಿ ಶಾಂತವಾಗಿತ್ತು

ಲವಣಗಳ ತುಂಬಿಕೊಂಡು ವಿಶಾಲವೂ ಇತ್ತು

ಸಾಂದ್ರತೆಯ ಪ್ರಮಾಣವೆಷ್ಟೆಂದರೆ

ಕಾಲಿಟ್ಟರೂ ತೇಲಿದಂತೆ

ನಡೆದಾಡುವಂತಿತ್ತು ;ಅದ್ಭುತವಂತೆ

ಕೊನೆಗೂ ಮೊಣಕಾಲಿಗಿರಲಿ ಧುಮುಕಿದರೂ

ಮೇಲೆಯೇ ತೇಲಿಸಿತ್ತು 

ಸಾಗರ..

ಅಂತೂ ದಷ್ಟವಾಗಿ ನಿರಾಕರಿಸಿತ್ತು...

*****

ಕಣ್ಣೀರ ವ್ಯಸನಕ್ಕೆ

ನಗು ಒಂದು ಅಪಹಾಸ್ಯ

ಒಮ್ಮೊಮ್ಮೆ ಬದುಕಿನೊಳೂ ಆಗಿ... ! 

14/07/2015

******

ಗುರಿಯು ಸದಾ ದೂರವೇ ಉಳಿದಿರಬೇಕು

ಇಲ್ಲವೇ ಹೆಜ್ಜೆಗಳು ಸೋತುಬಿಡುವವು!

*****

ನಮ್ಮದು ಎಂಬುವುದು

ಎಲ್ಲಿಯೂ ಇಲ್ಲ

ನಾನೂ ಇಲ್ಲ ಇಲ್ಲಿ

ಅವರಿಗಾಗಿ ಇವರಿಗಾಗಿ

ನಾವು ಎಲ್ಲರೂ ಆಗಿ

ಯಾರೂ ನಾವಾಗಲೇ ಇಲ್ಲ... !

13/07/2015

ಕವನ

ಮತ್ತೆ ನನಗೆ ಕಣ್ಪಟ್ಟಿಗಳು ಬೇಕಾಗಿವೆ..

ಮತ್ತೆ ನನಗೆ ಕಣ್ಪಟ್ಟಿಗಳು

ಬೇಕಾಗಿವೆ...!

ಕಾರಣವಿಷ್ಟೆ

ತಡ ಮಾಡದೆ ನಾ

ದಾರಿ ಸಾಗಿ ಹೋಗಬೇಕಿದೆ..!

ಮತ್ತೆ ನನಗೆ ಲಾಳುವೂ

ಬೇಕಾಗಿವೆ

ಹೆಜ್ಜೆಯೂರಿ ಗುರುತುಬಿಟ್ಟು

ವೇಗವಾಗಿ ಓಡಬೇಕಾಗಿದೆ..!

ಮತ್ತೆ ನನಗೆ ಆ ಅದೇ ಹುರುಳಿ

ಬೂಸವಾಗಿ ಬೇಕಾಗಿದೆ

ರುಚಿಕಟ್ಟು ಸಮಯವಲ್ಲ

ಹೊಟ್ಟೆ ಹೊರೆದು ಗಡಿದಾಟಬೇಕಿದೆ ..!

ನನಗೆ ಮೊದಲ ನಾನು

ಈಗ ಬೇಕಾಗಿದೆ

ಬದುಕು ಬಂಡಿ ಹೊಡೆಯುವಷ್ಟೇ

ಧ್ಯಾನ ಶಕ್ತಿ ತುಂಬಿಕೊಳ್ಳಬೇಕಿದೆ..!

13/07/2015

ತುಳುಕಾಡಿ ಹೆಣಗಾಡಿ 
ಹುಗುರಾಗಿ ತಿಳುಗೊಂಡ ನೀರು
ಅದರ ಹೊಳೆವು ಪಾರದರ್ಶಕತೆಯ ಸೆಳೆತಕೆ
ಹುಟ್ಟಿಕೊಳ್ಳೊ ಅಭಿಮಾನವೊಮ್ಮೆ ಕುತೂಹಲಕೆ ತಿರುಗಿ
ಕಲ್ಲೆಸೆದು ನೋಡುವ ಮೋಜು
ಕಣ್ಣಿರುವ ಮನುಜನಿಗಷ್ಟೇ ಸಾಧ್ಯ... 
ಈ ಸೃಷ್ಟಿಯಲಿ... 
ಮನುಷ್ಯ ಮನುಷ್ಯನೇ... !

*****

ಪಕ್ಕಾ ಕಚ್ಚಾವಸ್ತುವೇ
ಆಗಿ ಹೋಗಿರುವೆ
ಇನ್ನು ನಾಚೂಕಾಗುವ
ಪ್ರಮೇಯ ನೀನೇ...!

13/07/2015

ಬಿಳಿ ಹಾಳೆಯ ಮೇಲೆ

ಎಷ್ಟೊಂದು ಕಪ್ಪು ಚುಕ್ಕಿಗಳು

ಇರುವೆಗಳ ಸಾಲು

ನನ್ನ ಪದ್ಯಕ್ಕಂಟಿದೆ 

ಸವಿ ಜೇನ ಹುಡುಗನಿದ್ದಾನಲ್ಲಿ... !

ತುಂಟ

ಹುಡುಗ ತುಂಟನಾದರೂ

ಒಳ್ಳೆಯವನೆನ್ನಲು

ನನಗೋ ಸುತ್ತಲಿನ ಗೆಳತಿಯರ

ಆತಂಕವು..

ಅವನ ಪ್ರೇಮ ಪರಿಯ

ಅನುಭವದಲಿ ಪ್ರಪುಲ್ಲ ನನ್ನ ಮನವನೂ

ಬಚ್ಚಿಡುವ ಪ್ರಯತ್ನ ನನ್ನದು

ತೋರಿಕೊಂಡಷ್ಟು ...

ನನ್ನೆಲ್ಲಾ ಆತಂಕಗಳ ಇಳಿಸುವ

ಅವನ ಪ್ರೀತಿಯನು 

ತುಂಬಿಕೊಂಡಷ್ಟೂ ಹಗುರಾಗಿ 

ಮತ್ತೆ ಮತ್ತೆ ಅವನೆದೆಗೆ 

ನಾ ತೇಲಲು...

ಪ್ರೀತಿಯಲಿ ಮನ ತಣಿದು

ಕ್ಲೀಷೆಗಳ ಸರಿಸುತ್ತ ಕಾಂತಿ ಎಂದನವನು 

ಸೂರ್ಯನಾಗಿ

ತಿರುತಿರುಗಿ ನಾ ನಿಂತೆ

ಬಾಗದೆ ಒಲವಿನೆಡೆಗೆ ಹಿಗ್ಗಿ ಮೊಗವು..

12/07/2015

ಕವನ

ಸೆಳೆವ ಹೆಣ್ಣಿನ ಮಾದಕತೆಯೇ

ಶ್ರೇಷ್ಠವಾದರೆ

ಶ್ರೇಷ್ಠವಾದ ಸಾಲುಗಳಲಿ

ಮಾದಕತೆಯ ಭಾರಿ ಕೊರತೆ

ಸೆಳೆತವೊಂದು ಹಂತಕ್ಕೆ 

ಅಂತ್ಯವಾದರೆ

ಬಂಧವೂ ಸಡಿಲ

ಸೆಳತವಷ್ಟೇ ಸ್ವಂತ

ಕಣ್ಣಿಗಷ್ಟು ಸೊಂಪು 

ಕನವರಿಸುವ ಹುರುಪು

ತಂದಕೊಡಬೇಕು ಅವಳು; 

ಅವುಗಳೇ ವ್ಯಸನವಾಗಿ

ಕದಡಿಕೋಳ್ಳಬಾರದು ಬಿಂಬ..

ಎಲ್ಲಾ ಹೇಳಿದರು ಅವರೇ

ಎಲ್ಲಾ ತೋರಿದರೂ ಅವರೇ

ಮತ್ತೆ ನಾವೇಕೆ ಹೇಳಿ ಬರಿದೇ ತೋರುವ

ಮರುಕವಿದೆ ಅವರೆಡೆಗೆ 

ಅವರೇ ಗುರುತಿಸಲಾರರು

ಅವರವರ ಕದಡಿದ ಬಿಂಬಗಳ...

12/07/2015

ಕವನ

ಎಲ್ಲವನ್ನೂ ಜಯಿಸಿ ನಿಗ್ರಹಿಸಿ ನಿಂತ ಮೇಲೆ

ನೀನು ಕಂಡೆ

ಪುಸ್ತಕದ ಮೊದಲ ಪುಟದ ಅರ್ಥಕ್ಕಾಗಿ ಶಬ್ದಕೋಶವನ್ನು ಹಿಡಿದೆ

ಎಲ್ಲರಿಗೂ ಈಗ ನಗುವಂತೆ

ನಾನೋ ನಿನ್ನೆದುರು ಮಗುವಂತೆ.. !...

ಹುಟ್ಟಿ ಬೆಳೆಯಬೇಕು

ಮೊಗ್ಗು ಅರಳಬೇಕು

ಗಂಧ ಸುಗಂಧವನ್ನೇ ಮೆರೆಯಬೇಕು

ಚಿಟ್ಟೆ ಹೂ ಬಾನಾಡಿಯಾಗಿ ಉಳಿಯಬೇಕು

ಅಳಬೇಕು ನಗಬೇಕು ಆಸರೆಯ ಬೇಡಬೇಕು

ಎಷ್ಟ ಹೊಸ ಹೊಸ ಬೇಕುಗಳನು ಹೊಂದಿಕೊಂಡು

ಹೊಸದಾಗಿ ಮೂಡಬೇಕು

ಆಗೆಲ್ಲಾ ಜೊತೆಗೆ ನೀನಿರಬೇಕು...!

ಆದಿಯಿಂದಂತ್ಯದವರೆಗೂ ಬೇಗೆಯಂತೆ ಚಿಂತೆ

ಕಾಡಿದವೋ ಕಾಡಿಕೊಂಡವೋ ನನ್ನದೇ ಭ್ರಾಂತೆ?

ಗೊಜಲಾಗಿ ಅಡಗಿ ಸ್ಫುಟವಾಗಿ ಚಿಮ್ಮುವ ನೀನೊಂದು ಹಣತೆ

ಹೊತ್ತಿಸಿ ಹೊಸ ಭಾಷೆ ಹರಿಸಿ ಹೊಸ ಕಾಂತಿ ಅಚಲವಾಗಿ ನಿಂತೆ

ದಿಬ್ಬದೊಳು ಆಕಸ್ಮಿಕದ ಕಬ್ಬದಂತೆ 

ಜೀವದೊಳು ಹೇಗೋ ನಿನ್ನುಸಿರಂತೆ

ಮಿಳಿತ ಪುಳಕವಾಗಿಹ

ಈ ವಿಸ್ಮಯ ನಡೆದು

ಜಯಿಸಿ, ನಿಗ್ರಹಿಸಿದ ಕಲೆಗಳ ಹೊತ್ತಿಗೆ

ತೆರೆದುಕೊಳ್ಳಲಿ ಕಲಿತುಕೊಳ್ಳುವ ಕಾತುರತೆಗಲಿ

ಬೇಡಿಕೆಯಿದೆ ನಿನ್ನದೇ ; ಈ ಹಸಿರು ಮರೆತ ಕಾನನದಲಿ..

12/07/2015

ಮೋಡದ ಮರೆಯಲಿ

ಸೂರ್ಯನುದಯಿಸಿ

ಕರೆದ, ಕೊಂಡೊಯ್ದ

ಕಣ್ ಹೊಡೆದು ಚಿತ್ರ ಬಿಡಿಸಿದ

ಮತ್ತೆ ತಂದು ಜಗದೆದುರು

ನೀರು ಚಿಮುಕಿಸಿ ನಿಲ್ಲಿಸಿದ...

ನಾನಲ್ಲ; ನನ್ನದಲ್ಲ

ಈ ಬಣ್ಣಗಳು....

*****

ಈಚಲ ಮರದ 

ಬುಡದೊಳು ಕುಳಿತು

ಸೊರ್ರನೆಳೆವ ಮಜ್ಜಿಗೆಯ ಸದ್ದಿನಲ್ಲೂ

ಅದೇನೋ ಅಮಲ ಘಮಲು

ಜಗದ ಕಣ್ಣದು ಮರಳು ಜಾತ್ರೆ

ಮಾಯೆಯೆಂಬುದು 

ಒಂದು ಜಾದುವೇ ಆಗಲು

ಒಂದಷ್ಟು ಹೊತ್ತು 

ಮನರಂಜಿಸುವ ಬದುಕು..

*******

ಇಡೀ ರಾತ್ರಿ 

ನಿನ್ನ ಕನಸುಗಳನ್ನೇ

ಹೊದ್ದು ಮಲಗಿದ್ದೆ

ಬೆಳಗಾಗೆ ಮೈಕೊಡವಿ 

ಎದ್ದೇಳಲು

ನಾ..

ಈ ಬಿಂಬು ಹಾಸಿಗೆ 

ಎಲ್ಲವೂ 

ನೀನೇ ಆಗಿ

ಮತ್ತೂ 

ನಿನ್ನ ಕನಸಿಗೆ ಬಿದ್ದೆ

ಎದ್ದೇಳದೆ....

****

ವ್ಯತ್ಯಾಸ...

'ಅವರು' ಪ್ರೀತಿಸುವುದಕ್ಕಾಗಿ

ಯಾವ ಹಂತವನ್ನಾದರೂ ಮೀರುತ್ತಾರೆ

ಮತ್ತೆ 'ಇವರು' ದ್ವೇಷಿಸುವುದಕ್ಕಾಗಿ

ಯಾವ ಹಂತಕ್ಕಾದರೂ ಇಳಿಯುತ್ತಾರೆ...

ಅವರು-ಇವರುಗಳ ನಡುವಿನ ವ್ಯತ್ಯಾಸದಲಿ

ಉಳಿದು ಲೆಕ್ಕವಿಡದಂತೆ 'ನಾವು' ನಾವಾಗುವ

ತಕ್ಕದನ್ನು ಪ್ರೀತಿಸಿ ಮಿಕ್ಕದನ್ನು ನಿರ್ಲಕ್ಷಿಸುವ... 

ಬೆಳಗು ಬೈಗಿನೊಂದಿಗೆ ಬೆರೆತು ಹಮ್ಮು ಬಿಮ್ಮಿಲ್ಲದೆ ನಿತ್ಯ ಸತ್ಯವಾಗುವ...

ಅವರೇ ನಾವಾಗುವ ಪ್ರೀತಿಸಿ ನೂರಾಗುವ..

12/07/2015

*******

ನಮ್ಮಿಬ್ಬರ ನಡುವೆ

ಗಾಳಿ ತಾ 

ಹಾದು ಹೋಗುವುದೇ ಆದರೆ

ಮಿಶ್ರಿತ ಗಾಳಿ 

ಧೂಳು ಮಣ್ಣನ್ನೂ ಹೊತ್ತೊಯ್ಯುವುದು

ಎಚ್ಚರ ತಪ್ಪಿ 

ಕಣ್ಣಿಗೂ ಬೀಳಬಹುದು

ಆಗೆಲ್ಲಾ ದೂರ ಸರಿಯದೆ 

ಮತ್ತಷ್ಟು ಹತ್ತಿರಾಗು

ಗಲ್ಲ ಹಿಡಿದು ತುಟಿ ಸವರಿ 

ಕಣ್ಣಿಗಷ್ಟು ನಿನ್ನುಸಿರ ಊದಿಬಿಡು

ಇದ್ದ ಹೋದ 

ರಜವೆಲ್ಲಾ ಹಾರಿ ಹೋಗಲು 

ನಾ ಮತ್ತೂ ಹಗುರ

ನಿನ್ನ ತೋಳ ತೆಕ್ಕೆಯಲಿ...

*****

ಕತ್ತಲು ಹೆಚ್ಚಿದಂತೆ 

ಈ ಹೊತ್ತು

ಅವನ ಚಿತ್ರಣ ಸ್ಪಷ್ಟ 

ಈ ತಾರಸಿಯಲ್ಲಿ

ಬೆಳಕಿನ ಬುಗ್ಗೆಗಳ 

ಕಣ್ಗಳಲ್ಲಿ ತಂದು ದಿಟ್ಟಿಸುವನು

ಮತ್ತೂ ನಶೆಯೆಂದು 

ನಿಶೆಯಲಿ ಕಳ್ಳನಾಗುವನು..!

09/07/2015

ಗಟ್ಟಲೊತ್ತಿ ಬರುವಾಗ

ಯಾರಿಗಾಗಿ ಬದುಕು ಎನಿಸುವಾಗ

ಕಣ್ಣೀರು ಹರಿದರೆ

ಅದು ಕರುಣೆ

ನಾವು ನಮ್ಮ ಮೇಲಿಟ್ಟದ್ದೇ..

ನೋವೇ ಆದರೂ ನೋಯದ ರೀತಿ

ಬಹುಶಃ ನಮ್ಮ ಆತ್ಮಬಲ

ಸಿದ್ಧಿಸಲಿ ವೃದ್ಧಿಸಲಿ

ಇಂತಹದೇ ಹಲವು ಬಾರಿಗಳಲಿ ಎನುವಾಗಲೂ

ಹೊಟ್ಟೆ ಹಿಸುಕಿದಂತೆ ಎಂತದ್ದೊ ಯಾತನೆ

ಈ ಬಾರಿ ಕ್ಷಮಿಸಿ

ಮುಂದಿನ ಬಾರಿ ಪ್ರಯತ್ನಿಸುವೆ

ಬಹುಶಃ ಗೆಲ್ಲುವೆ....

09/07/2015

******

ಬಡಿಯಲಿಲ್ಲ ಬೈಯ್ಯಲಿಲ್ಲ

ಅತ್ತು ಕರೆದು ರೋದನೆ

ನಡುರಾತ್ರಿ ದಿಢೀರನೆ ಸೂರ್ಯಬೇಕೆಂದಂತೆ

ಬಯಸಿ ಸಿಗದೆ 

ಬರುವ ತನಕ ನಿದ್ದೆಗೆಟ್ಟು ಕಣ್ಣೀರಿಟ್ಟು 

ಬೆಳಕು ಹರಿವಾಗ ಗಾಢನಿದ್ದೆಗೆ....

*****

ಇನಿಯನ ಮಾತುಗಳು

ಎದೆ ಕೊಳದೊಳು 

ಮೀನಿನಂತೆ ಈಜಾಡಿ

ತನು ಮನವೆಲ್ಲಾ ಚಂಚಲ !..

08/07/2015

ಕವನ

ಹಗಲಲಿ ಹಟ ಮಾಡಿ

ಹರಿದುಕೊಂಡು ಬಟ್ಟೆ

ಇರುಳಲಿ ಸೂಜಿ ದಾರಕ್ಕೆ

ಪರಿತಪಿಸಿ ಹೆಣಗಾಡಿತು

ಮತ್ತೆ ಬೆಳಗ್ಗೆ ಅದೇ ಧಿರಿಸು

ಅದೇ ಮುಖವಾಡ

ದಾರದ ಹೆಣಿಗೆ ಕೊಂಚ ಎಳೆತ

ಮತ್ತೆ ಹಿಂಜಿ ಮತ್ತೆ ಕಿಂಡಿ

ಹಟ ಮಾಡಬಾರದಿತ್ತು

ಪಡೆದುಕೊಳ್ಳದ ಹೊರತು

ಹೆಣಗಾಡಬಾರದಿತ್ತು

ಬಯಸುವ ಬರಿದೇ ಆಸೆಗೆ

09/07/2015

ಕವನ

ಎದುರಾಗೊ 

ಬೀಸು ಗಾಳಿಗೂ

ಜಗ್ಗದ ಹಾರಾಟ 

ನಿನ್ನದು ಕಣೆ ಗೆಳತಿ

ಅದ ಅರಿತು 

ಹಾರು ನೀ ಗರಿ ಬಿಚ್ಚಿ

ಉಸಿರ ಮರೆತರೂ 

ರೆಕ್ಕೆಗಳ ಮರೆಯದೆ

ಹಾರಿಬಿಡು ಹರಿದುಬಿಡು

ಕಠಿಣತೆಯಲಿ

ತಟಸ್ಥತೆಯ ತುಕ್ಕು ಬಿಟ್ಟ 

ಬಿರಿಸು ಕಬ್ಬಿಣವಾಗಿ

ಮಮತೆ ಪ್ರೀತಿಯಲಿ

ಹೂ ಹಕ್ಕಿಯಾಗಿ...

ಈ ಬಾನು ಈ ಬಯಲು ನಿನ್ನದೆ

ಎಂದೆಂದೂ ..

ಚಿತ್ರ ಕೃಪೆ; ಅಂತರ್ಜಾಲ

07/07/2015

ಇಟ್ಟಲ್ಲಿಯೇ ವಸ್ತು

ಸಿಗದಿದ್ದಾಗ

ಇನ್ನೆಲ್ಲೆಲ್ಲೋ

ಹುಡುಕಿ ತಡಕುವುದುಂಟು!

ಮನವು ಇಟ್ಟಲ್ಲಿಯೇ

ಅವರವರದು ಸಿಕ್ಕಿಬಿಡಲಿ

ಎಂಬುದೇ 

ಈ ಮನದ ತೀವ್ರ ಬಯಕೆ!

ಇನ್ನೆಲ್ಲೋ ಅಲೆದಾಡದೆ....

07/07/2015

ಕವನ

ಅವನು

ಅವನನು ಈ ಸಾಲುಗಳಲ್ಲಿ

ಹಿಡಿದು ತೋರಬೇಕೆಂದುಕೊಂಡೆ

ನಾಚಿದಂತೆ ಹುಡುಗ ಉಲಿದರೂ

ಬಿಚ್ಚೆದೆಯಲಿ ಕವನ ಬರೆದ

ಇನ್ನೂ ಅರಗಿಸಿಕೊಳ್ಳುತ್ತಲಿರುವೆ

ಅವರ ಪ್ರೇಮ ಕಾವ್ಯ

ಕವಿಯೆದುರು ಸೋತಿಹವು

ನನ್ನ ಮಾತು ಮತ್ತು ಮೌನ

ಪದಗಳು ಹುಡುಕಾಟಕ್ಕೆ ಬಿದ್ದಿವೆ

ತೋರಿದಷ್ಟೂ ಅವನ!

06/07/2015

ಕವನ

ನಿನ್ನ ಕೈ ಹಿಡಿದು..

ಏಕೋ ಈ ದಿನ

ನಿನ್ನ ಕೈ ಹಿಡಿದು

ಕೂರಬೇಕೆನಿಸಿದೆ

ಮಾತು ಬೇಡ

ನಿನ್ನ 

ಬೆರಳೊಳಗಾಡಬೇಕೆನಿಸಿದೆ

ಮುತ್ತು ಬೇಡ

ಮುಷ್ಟಿಯೊಳು ಮುಚ್ಚಿಟ್ಟು

ಕೈರೇಖೆಗಳ ಓದಬೇಕಿದೆ

ಕಣ್ಣೊಂದಿಷ್ಟು ದೊಡ್ಡದು ಮಾಡಿಕೊ

ಕತ್ತಲೆಯೊಳು 

ನನ್ನೊಳು ನಿನ್ನ ನೀ ಕಾಣಬೇಕಿದೆ

ಮತ್ತಷ್ಟು ದೂರ ನಡೆದುಬಿಡು

ಹೀಗೆ ಕೈ ಹಿಡಿದು; 

ನಮ್ಮ ಹೆಜ್ಜೆಗಳೂ ಪ್ರೀತಿಸಬೇಕಿದೆ

ತಿರುವಲೊಮ್ಮೆ ತಿರುಗಿ ನೋಡಿ ಹೋಗದಿರು

ನಿನ್ನ ಬೆನ್ನಿಗೆ ನನ್ನ ಕೈಗಳಿವೆ 

ಮುಂದೆ ದೀಪದ ಬೆಳಕು ಕರೆದಿದೆ

06/07/2015

ಕವನ

ಮುತ್ತು!

ಒಮ್ಮೆ ನನ್ನಯ ಮುತ್ತೊಂದು

ಜಾರಿ ಬಿದ್ದಿತೋ ನೀರಿಗೆ

ಬಯಕೆಗಳ ಸರಮಾಲೆಯಿಂದ

ಅವಸರಿಸಿ ತಡವರಿಸಿ

ಆಸೆಯೆಂಬೊ ನೀರ ಗುಳ್ಳೆಗಳು

ಸುತ್ತವರೆದು ಮುತ್ತಿನ ಮಣಿಯ

ತೂಗಿಸಿತ್ತು ಸಾಂದ್ರತೆಯ ವಿಸ್ತರಿಸಿ

ಬಾರಿ ಬಾರಿಯೂ ತೇಲಿಸಿ, 

ಉಳಿಸಿ ಮತ್ತೆ ಮತ್ತೆ

ನೀರಿಗೂ ಉಂಟು ಮೇಲ್ಮುಖ ಪ್ರತಿಕ್ರಿಯೆ

ಭಾರದ ಮುತ್ತಿದು ಮುಳುಗುವ ಸೆಳೆತ

ನಡುವೆ ಏರಿಳಿವ ಆತಂಕ

ಆದರೂ ಒಟ್ಟುಗೂಡೋ ಆಸೆಯ ಗುಳ್ಳೆಗಳು

ಗಾಳಿ ಹಿಡಿದು ಉಬ್ಬಿಕೊಂಡು

ತಬ್ಬಿವೆ ಮುತ್ತಿನ ಮಣಿಯ...

ಕನಸುಗಳಲಿ ಉಸಿರಿರುವ ಕಾರಣ

ತೇಲುತ್ತಲಿವೆ

ಈ ದೇಹದೊಳು

ಆಸೆ-ಕಾಮಾದಿ ಬಯಕೆಗಳು

ಹೆಕ್ಕಿ ಹೆಕ್ಕಿ ಮುತ್ತುಗಳ..

06/07/2015

ಕವನ

ಬಳ್ಳಿ

ಬಳ್ಳಿ ತಾನಾಗುವ ಆಸೆಗೆ

ಹೂವೆಂದನು ನನ್ನನೆ

ಕಂಪು ಹಿಡಿದು ಹಬ್ಬಿದಂತೆ

ಹೂವು ಬಳ್ಳಿ ಸೆರೆಗೆ..!

ಹೊತ್ತು ಮುತ್ತು

ಜೇನು ಅಧರ

ಮಾತು ಮೌನ 

ಕನಸು ಭಾರ!

ಎವೆಯಿಕ್ಕದ ದಳಗಳಲಿ

ನಶೆಯೇರಿದ ಗುಂಗಿನೊಳು

ಬಿಟ್ಟು ಬಿಡದ ಬೆಸುಗೆಯಂತೆ

ಸುತ್ತುವರೆದನವನು ಬಳ್ಳಿಯಂತೆ!

05/07/2015

ಪ್ರೀತಿ ಎಂದರೆ

ಮುತ್ತಲ್ಲ 

ಅಪ್ಪುಗೆಯೂ ಅಲ್ಲ

ಮೌನ ಮೀಟುವ 

ಒಂದು ಮಾತು!

ಮಿಡಿಯುವಾಗ 

ಒಂದು ಮೌನ!

ಈಗೀಗ 

ಅವ ಹೇಳಿದ ಹೊಸ ಪಾಠ!

04/07/2015

ಕವನ

ಉತ್ತರಗಳ ಗುಲಾಮಳಲ್ಲ!

ಎಷ್ಟು ಕಾತುರ ಆತುರಗಳ ನಂತರವೂ

ಮತ್ತೂ ಉಳಿವ ಪ್ರಶ್ನೆಗಳು

ಎಷ್ಟೆಂದು ಉತ್ತರಿಸಿಕೊಳ್ಳಲಿ

ಪ್ರಶ್ನಿಸುವ ಹಕ್ಕೇ ಇಲ್ಲ

ನಾನು ಉತ್ತರಗಳ ಗುಲಾಮಳಲ್ಲ!

ಆರಿಸಿಕೊಂಡ ಉತ್ತರ 

ಬಹು ದಿನಗಳ ಬೇಡಿಕೊಂಡ ಅನೇಕ ಪ್ರಶ್ನೆಗಳ ಕೀಲಿ ಕೈ

ಉತ್ತರಗಳ ಹಿಂದೆ ಬಿದ್ದು

ಪ್ರಶ್ನೆಗಳ ಹುಟ್ಟು ಹಾಕಲಾರೆ

ಬದುಕು ಕೇಳೋ ಪ್ರಶ್ನೆಗಳಿಗೆ

ನಾನಿನ್ನೂ ಉತ್ತರವಿತ್ತಿಲ್ಲ

ಪ್ರಶ್ನೆಗಳನ್ನೇ ದಿನನಿತ್ಯ ಎದುರುಕೊಂಡು!

ಪಾಸಾದ ಅನೇಕ ಪರೀಕ್ಷೆಗಳಲೆಲ್ಲೂ

ಇರಲಿಲ್ಲ ನನ್ನ ಪ್ರಶ್ನೆಗಳ ಉತ್ತರ!

ಅಲ್ಲೆಲ್ಲಾ ಪ್ರಶ್ನೆಗಳೇ ಇದ್ದವು

ಉತ್ತರಿಸಿದ್ದು ಮಾತ್ರ ನನ್ನ ಪ್ರಶ್ನೆಗಳೇ

ಗೊಂದಲಗಳ ದಾರಿ ಹಿಡಿದು ಹೋದಂತೆ

ಮಾನಸಿಕ ಲೆಕ್ಕಾಚಾರ ಬಿಡಿಸುವ ಪ್ರೌಢಮೆ

ನನಗಿದು ಇನ್ನೂ ಆಶ್ಚರ್ಯ!

ಪ್ರಶ್ನಿಸುವ ಸಾಮರ್ಥ್ಯವೇ ಇಲ್ಲದಂತಾದೆ

ಉತ್ತರಗಳನ್ನೂ ಬಯಸದಾದೆ

ತೇಲಿಕೊಂಡು ಹೋದಂತೆ ದೋಣಿ

ಆಳದ ಅರಿವಿಲ್ಲದೆ; ಸಾಗಿದ ದೂರದ ಲೆಕ್ಕವಿಲ್ಲದೆ

ಮನಗಳಲೊಮ್ಮೆ ಉಳಿವ ಆಸೆಗಳಿಗೆ

ಉಳಿವೆ ನಾ ಪ್ರಶ್ನೆಗಳ ಮರೆತು 

ಯೋಚಿಸಿ ಬದುಕು ಕೇಳುವ ಪ್ರಶ್ನೆಗಳ ಕುರಿತು!

04/07/2015

ಕೆಲವು ಸ್ಪಷ್ಟ 

ಮತ್ತೆ 

ಕೆಲವು ಅಸ್ಪಷ್ಟವಾಗಿ

ಕಾಣುವ ವಸ್ತುಗಳು

ಅಸಲಿಗೆ ಅವುಗಳು 

ಮೂರ್ತವೂ ಸ್ಪಷ್ಟವೂ 

ಹೌದು;

ಹಾಗೆ

ಕಾಣುವುದು ಮಾತ್ರ 

ನಮ್ಮ ಕಣ್ಣುಗಳು

*****

ಮೊದಲೇ 

ಶಾಪಗಳ ಮುಳ್ಳುಗಳೆಸೆದ 

ಹಾದಿ

ಒಂದೆರಡು ಮುಳ್ಳು 

ಮರೆಯಾದವೆಂದರೆ

ಹಾದಿ ಏನು ಸುಗಮವಲ್ಲ....... !

*****

ತಪ್ಪು ಸರಿಗಳ ನಡುವೆ

ನಗು ಕರಗಿ 

ಮೌನ ಮೂರ್ತಿ ನನ್ನ ಹೆಸರು

ಗಾಳಿಗೊಡ್ಡಿದ ದವಸದಂತೆ

ತೂರಿ ನೆಲಕ್ಕಾದರೂ ಉದುರಲಿ

ಜೀವ ಬೆಳೆಗಳು...

ದನಿ ಮೂಡಲಿ

ಕಣ್ಬಿಟ್ಟ ಹಕ್ಕಿಗೆ

ಶೃತಿ ಸೇರಲಿ 

ದಿಟದ ತೀರಕೆ

03/07/2015

*****

ಮುಚ್ಚಿಟ್ಟುಕೊಂಡ ಚಿಟ್ಟೆ

ನನ್ನ ಕನಸು

ಮೂಸೆಯಿಂದಾಚೆ ಬಿಡಲು

ಹಿಡಿವ ಕೈಗಳ ಆತಂಕ

ಹೊರ ಬಿಡದಿದ್ದರೆ

ಒಳಗೆಯೇ ಮುದುಡಿ ಹೋಗುವ ಆಪತ್ತು

ಚಿಟ್ಟೆಗಳ ಮುಚ್ಚಿಟ್ಟುಕೊಂಡಿರುವೆ

ಕಾಯುವ ಕೈಗಳಿಗೆ

ಮುಚ್ಚಿಟ್ಟು ಬಿಚ್ಚಿ ಕೊಡಲು... !

01/07/2015

ಭೂಮಿಯಂತೆ ನೀ ತಳೆದು

ನದಿಯಾಗಿ ಎನ್ನ ಆಹ್ವಾನಿಸಿ

ಹಸಿರ ಕಂಪ ಪೂಸಿ; ಎದೆಯ ತಂಪ ಎರೆದು

ಜೀವ ತುಂಬುವ ನಿನ್ನ ಕಣ್ಣು

ಕರಗಿ ನಿಂತರೂ ನಗುವ ಮೊಗ; ಕೆಂಪು ಗಲ್ಲ

ನೀ ಹಿಡಿದ ಬೊಗಸೆಯೊಳಲ್ಲದೆ ಮತ್ತೇನು?

01/07/2015

ಎಷ್ಟೆಂದು ಕೊರಗಲಿ

ಇಲ್ಲಿರುವ ಯಾವುದೂ

ನಾ ತಂದದಲ್ಲ

ಕಳೆದುಕೊಳ್ಳುವುದು ಅಲ್ಲ

ಇದ್ದಷ್ಟು ಹೊತ್ತು ಕನಸ ಕಂಡು

ಹೊರಟು ಬಿಡುವುದು

ಜಗದ ಸೌಂದರ್ಯ ಅಮರವೆಂದು!

01/06/2015