ಕವನ

ವಾಸ್ತವ

ಕಣ್ಗಳು ಸೆಳೆದವು ಮನಗಳು ಮಿಡಿದವು
ಕನಸುಗಳರಳಿದವು,,,
ಆದರೆ ಪ್ರೀತಿಸಲು ಹೆದರಿದವು;
ಕಾರಣ; ಒಂದಾದ ಮನಗಳ 
ಜಾತಿಗಳು ವ್ಯತ್ಯಾಸವಾದವು.

ಅವ ಜಾತಿಯಲಿ ಮೇಲಾಗಿ
ಊರಿನೊಡೆಯನ ಮಗನು.
ಅವಳು ಮನಸಿನಲಿ ಮೇಲಾಗಿ
ಪೇಟೆಯ ಸುಶಿಕ್ಷಿತನ ಮಗಳು.

ಒಬ್ಬರಿಗಿಂತ ಒಬ್ಬರು
ಅವರಿಬ್ಬರು, ಎನ್ನುವಾಗ
ಧುತ್ತನೆರಗಿದ ಜಾತಿ ತಕ್ಕಡಿಯಲಿ
ಮೇಲು-ಕೀಳಾದರು.

ತಾರತಮ್ಯಕ್ಕೆ ಮನಗಳು ಸಡಿಲವಾಗಿ
ಏರುಪೇರಾದವು.
ಬಯಸಿ ಅವನು, ಬಯಸದೇ ಅವಳು
ಪರಸ್ಪರ ದೂರಾದರು.

-ದಿವ್ಯ ಆಂಜನಪ್ಪ

(ಪ್ರೀತಿ-ಜಾತಿ-ಭೀತಿ ,
ತೀರ ಹತ್ತಿರದಿಂದ ಕಂಡದ್ದು,
ಮನಸ್ಸನ್ನು ಕಾಡಿ ಅಕ್ಷರಗಳಾದದ್ದು.)
02/06/2013