ಕವನ

''ಮಾಯೆ''

ಯಾರು ಮೆಚ್ಚಿದರೇನು

ಯಾರು ಮೆಚ್ಚದಿರಲೇನು?

ಮೆಚ್ಚುಗೆಯ ಹುಚ್ಚಿಲ್ಲವೋ

ನಿಂತಂತೆ, ನಡೆದಂತೆ

ಇರುವುದೆಲ್ಲಾ ಶಿವ ಕಂಡಂತೆ

ಎಲ್ಲಾ ಮಾಯೆ; ಇಲ್ಲಿ,

ಮೆಚ್ಚಿಸೋ ಮನವೂ ಮಾಯ!

ಆಚರಣೆ ಅನುಸರಣೆ

ಮನವೊಪ್ಪಿದ ಮಾತುಗಳಷ್ಟೆ!

ಮೆಚ್ಚಲಿಲ್ಲ ಇವರು, ಮೆಚ್ಚಲಿಲ್ಲ ಪರರು

ತನ್ನ ತಾನಿರುವಂತೆ ಒಪ್ಪೊ

ಜಟಿಲ ಮನವು;

ಒಪ್ಪಬಹುದು ಈ ಮೆಚ್ಚದವರನೂ

ಮಾಯೆಯೊಳು ಮಾಯವಾದೀತೊ

ಈ ಅಸಮ-ಸಮ ಭಾವ ಲಹರಿ

ಮೆಚ್ಚಲಷ್ಟು ನಗು; ಮೆಚ್ಚದಿರೆ ಅಳು

ಎಷ್ಟು ಕಾಡಿತೋ ಹರನೇ

ನೀನೊಮ್ಮೆ ಮೆಚ್ಚಿದ ಕ್ಷಣ

ಈ ಮಾಯೆಯ ದಾಟಲಾರೆನೇ ನಾ

ಕಾದಾಟವಿದೆ; ಕಾಯುವಿಕೆಯೂ,

ಈ ನಡುವಿನ ಮೆಚ್ಚುಗೆಳೊಂದಿಗೆ

ನಿನ್ನ ನೆಚ್ಚಿಕೊಂಡ ಕಾರಣಕೆ!

12/12/2014