ನೀನು ಗತವಾಗಬಾರದಿತ್ತು,

ಗತದಲ್ಲಿ ನಿನ್ನ ನಾ ನೋಡಬಾರದಿತ್ತು!

ನೋಡಿದೆ; ಏನೂ ಅನಿಸಲಿಲ್ಲ

ಹೀಗಾಗಬಾರದಿತ್ತು!

12/12/2014

*************

ಕವಿತೆಗಳೋ

ಬೊಗಸೆಯೊಳ ಮಣಿಗಳಂತೆ

ಕೈಚೆಲ್ಲಿ ಹೊರ ಬಿಟ್ಟಾಕ್ಷಣ

ಸ್ವಂತದಲ್ಲ;

ಅಲ್ಲೆಲ್ಲೋ ಕುಣಿದು ತಣಿದು

ಹರಿದಾಡುವ ಮುತ್ತುಗಳು!

**********************

ನೀ ಬಿಟ್ಟು ಹೋದ ಮಳೆ ನೆರಳಿನ ಹೆಮ್ಮರ

ಇನ್ನೂ ಇಲ್ಲಿಯೇ ಭದ್ರವಿದೆ

ಹುಡುಕಿದೆ ನಿನ್ನ ಸುಳಿವಿಲ್ಲ

ಚಲಿಗಾಲದ ಕುಳಿರ್ಗಾಳಿಗೆ

ಮೈಮುದುಡಿ ಬಿರುಕು ಮನವೆಲ್ಲಾ

ಎಲ್ಲೂ ಇಲ್ಲ, ಇಲ್ಲೆಲ್ಲೂ ನೀನಿಲ್ಲ!

**************

ಇಲ್ಲಿ ಏನೇನೂ

ಬದಲಾವಣೆಯಿಲ್ಲ 

ಹೊಸದೇನೂ ಹುಟ್ಟದು

ಎನಿಸುವಾಗ,

ಬಾನಲಿ ಭಾನು ಉದಯಿಸಿದ

ಜೋಡಿ ತಾಯಿ ಕಣ್ಗಳಲ್ಲಿ

ಚೈತನ್ಯದ ಚಿಲುಮೆ!

11/12/2014

*************

ನೋವಿನ ಹೃದಯಕೆ 

ನಗುವ ತುಂಬಿ 

ಪ್ರೀತಿ ಸುರಿವ 

'ಕಾರಣ'ವೇ ಸ್ನೇಹ!

10/12/2014