ಆಪ್ತರು ಮಾತ್ರವೇ ನೋವ ನೀಡಲು ಸಾಧ್ಯ

ದೂರದ ಗೊತ್ತಿಲ್ಲದ ಜನರಲ್ಲ!

30/11/2014

^^^^^^^^^^^^^^^^^^^

ಪೋಣಿಸಿಟ್ಟ ಮುತ್ತುಗಳ

ಸುರಿದು 

ಮತ್ತೆ ಪೋಣಿಸುತ್ತಲಿರುವೆ

ಬಿಡು ಅದು ನಿನ್ನಾ ನೆನಪು

ಆರದ 

ಹಾರವಾಗದ 

ಮುತ್ತಿನ ಹಾರ!

28/11/2014

^^^^^^^^^^^^^^^^^^^^^^

ಇದ್ದಷ್ಟು ಕಾಲ ಇದ್ದು ಬಿಡಬೇಕು 

ಪ್ರೀತಿ ಸ್ನೇಹಗಳೊಡನೆ, 

ಹೊರಟ ಮೇಲೆ ಇಲ್ಲೆಲ್ಲಾ ನೆನಪೇ 

ಹಾಸುಗಲ್ಲು; 

ನಸು ನಗೆಗಳಾಗಿ ಮಂದ ದೀಪವಾಗಿ 

ಉರಿದುರಿದು ಬತ್ತಿಸಬೇಕು

ಬೇಗೆ, ದುಃಖ-ದುಮ್ಮಾನಗಳಾನು, 

ನೆನಪಾಗಬೇಕು; 

ನೆನೆಯಲು ಸ್ಫೂರ್ತಿಯಾಗುವಂತೆ!

27/11/2014

^^^^^^^^^^^^^^^^^^^^^^^

ಬಂದು ಹೋದ ಕನಸುಗಳ

ವಿಳಾಸ ಪಡೆಯದಾದೆ

ಖೇದವಿದೆ ಈ ಅರೆಬರೆ ನಿದಿರೆಯ ಮೇಲೆ

ಕನಸ ಅಮಲಿನ ಮೇಲೆ

ಹೊತ್ತೊಯ್ದ ಕಾಲಿಲ್ಲದ ಕುದುರೆಯ ಮೇಲೆ!

25/11/2014

^^^^^^^^^^^^^^^^^^^^^^^

ಕೊಳದ ನೀರು ತಿಳಿಗೊಳ್ಳುತ್ತಿತ್ತು

ದಡದ ಕೊಕ್ಕರೆಯ ರೆಕ್ಕೆಯಲಿ

ಒಂದೇ ಸಮನೆ ತುರಿಕೆ!

20/11/2014