ಕವನ

ಈತ!

ಅವನು ಎದುರುಗೊಂಡಾಗಲೆಲ್ಲಾ

ಏನೋ ಹುಮ್ಮಸ್ಸಿನ ನಗು

ಅದೇನು ಅವನು ನಗುವನೋ

ಇಲ್ಲ ನಗಿಸುವನೋ ತಿಳಿಯದು

ಪಟ್ಟನೇ ನನ್ನದು ದೀರ್ಘವಾದ ಮುಗುಳ್ನಗೆ!

ಇಷ್ಟೇ ಏನು?;

ನೋಡಿ ನಕ್ಕು ತಲೆ ತಗ್ಗಿಸುವನು ನಾಚಿ

ಆಹಾ!! ಎಂತಹ ಕಚಗುಳಿಯ ನಗು ನನ್ನೊಳಗೆ

ಈ ಹುಡುಗನ್ಯಾಕೆ ನನ್ನ ನೋಡಿ ಹೀಗೆ ನಾಚುವ?!

ನನಗೋ ಬೆರಗು ಮತ್ತೂ ಪುಳಕ,

ದೂರವೇ ನಿಲ್ಲುವ

ತುಸು ಮರೆಯಲೇ

ಕಂಡೂ ಕಾಣದೇ

ಇಣುಕಿ ನೋಡುವ; ಕಣ್ಣಿಗೆ ಸಿಕ್ಕಿ ಬೀಳುವ

ಮತ್ತೂ ನಾಚಿ ನಗುವ ಈ ಹುಡುಗ

ಮರೆತರೂ ಏಕೊ ನೆನಪಿಗೆ ಬರುವ!

ಏನೂ ಬೇಡದ ತಿಳಿ ನಗೆಯ ಸ್ನೇಹಿತ

ಬೊಗಸೆತುಂಬಾ ನಗು ಚೆಲ್ಲುವ ಸುಕುಮಾರನೀತ!

18/12/2014