ಕವನ

"ಬಂದೂಕು"

ಬಂದೂಕು ಹಿಡಿದರೆ 

ಸಾಲದು ಬೇಟೆಗಾರನೇ,

ಗುರಿಯಿಡಲು ಬರಬೇಕು

ಅದಕೂ ಮುನ್ನ ನಾ ಹಾರಬೇಕು!

ಬಂದೂಕು ಹಿಡಿದರೂ ಹಿಡಿ

ನಿನಗಾಗಿ ನಿನ್ನವರಿಗಾಗಿ

ಸ್ವೇಚ್ಛೆಗಾಗಿ ಹಿಡಿದಿದ್ದರೆ

ಅಗೋ ನಿನ್ನವರೂ ಅಲ್ಲಿ ಗೋಳು

ಪುಟ್ಟ ನೀಲಿ ಹಕ್ಕಿ ನಾ ಬೇಟೆಗಾರ,

ಬಂದೂಕು ಬೇಡವೋ

ಗುಂಡು ಹಾರಿದರೂ ಸಾಕು

ಪ್ರಾಣ ಹಾರುವುದು ಅದರ ವ್ಯಾಘ್ರ ಶಬ್ದಕೆ

ಬಂದೂಕ ಹಿಡಿದದ್ದಾದರೂ ಏಕೋ

ಒಂದೊತ್ತಿನ ಹಸಿವೆಗೋ?

ಹಾಗಾದರೆ ನನ್ನದೂ 

ನೂರು ಹೊತ್ತುಗಳ ಬದುಕು

ಈ ಓಟ, ಹಾರಾಟ!

ಬಂದೂಕು ಬಿಡೋ ಮನುಜನೇ

ಹಿಡಿ ಕೈಯೊಳು ಕೈ

ಉಳು; ಹೊಡೆ ಬದುಕ ಬಂಡಿ

ನಿನ್ನವರಾಗಿ ನಾನೂ ಎದೆಯುಬ್ಬಿ ನಿಲ್ಲುವೆ

ನಿನ್ನ ಜೋಡಿ ಎತ್ತಿನ ಜೋಡಿ ಕೋಡುಗಳಲಿ

ನೀಲಿ ಹೂಗಳಂತೆ!

02/03/2015