ಕವನ

ಹಿಂದಿರುಗಿ ನೀ ನೋಡಿದಾಗ

ಪ್ರತೀ ಬಾರಿಯೂ

ನಾ ನಿರೀಕ್ಷಿಸಿದ್ದೆ

ಹಾಗೆ ನೀ ತಿರುವಲಿ

ತಿರುಗಿ ಹೋಗುವಾಗ

ಒಮ್ಮೆಯಾದರೂ

ತಿರುಗಿ ನೋಡಲಿ ಇವನೆಂದು

ಹತ್ತು ಹಲವು 

ಭೇಟಿಗಳಾದವು

ಸಂಜೆ ಕೆಂಪು 

ಮಳೆ ಹಾಡು ಹರಿದವು

ಮತ್ತೆ ಸಿಗುವೆನೆಂದು 

ನೀ ಹೊರಡುವಾಗ

ನನಗೋ 

ನಿನ್ನ ಕಳಿಹಿಸಲೇ ಮನಸ್ಸಿಲ್ಲ

ಆದರೂ ಅನಿವಾರ್ಯ 

ನಡೆದುಬಿಡುತ್ತಿದ್ದೆ

ಒಂದೇ ಆಸೆ 

ನೀನೊಮ್ಮೆ 

ತಿರುಗಿ ನೋಡುವೆ ಏನೋ ಎಂದು

ಬಹು ದಿನಗಳ ಸಂಜೆ ಕಳೆದು

ರಾತ್ರಿ ಹತ್ತಿರ

ಕತ್ತಲ ಹೊತ್ತಲಿ ಬೀದಿ ದೀಪದ ಬೆಳಕಲಿ

ಇಂದು ಕಂಡೆ

ನೀ ಎನ್ನ ತಿರುಗಿ ನೋಡಿದ್ದೆ!...

ನಾ ಎಂದಿನಂತೆ ನಿನ್ನ ನೋಡುತ್ತಲೇ ನಡೆದೆ...

ಮನದೊಳೊಂದು ಹಾಡು

'ದಾರಿ ಒಂದಾಗಲಿ ಕಾಲ ನಡೆಗೆ

ತಿರುವು ಮೂಡಲಿ ಈ ಬಯಲಿಗೆ'.....

29/06/2015