ನಕ್ಷತ್ರ ಕನಸು ...
ಸುನಾಮಿ ಎದ್ದ ಮನಸ್ಸು
ಶಾಂತವಾಗಲು ಅದೆಷ್ಟು
ಹೊಡೆತಗಳ ಎದುರಿಸಬೇಕೋ?!
ಮಡಿಲ ಬಿಟ್ಟ ಹಕ್ಕಿ
ಅದೆಷ್ಟು ತಾಸು ನೆಲದಿ
ಸುಮ್ಮನೆ ಉರುಳಬೇಕೋ?!
ಮೋಡ ಬಿಟ್ಟ ಹನಿ
ಗಾಳಿಯೊಂದಿಗೆ ಎಷ್ಟು
ಸೆಣಸಿ ಧರೆಗಿಳಿಯಬೇಕೋ?!
ಬಿಟ್ಟ ಮಾತು
ತಿರುತಿರುಗಿ ಎದುರೇಟಾಗಿ
ಮತ್ತೆಷ್ಟು ಬಾರಿ ಎದೆ ನೆಟ್ಟಿ ನಿಲ್ಲಬೇಕೋ?!
ಕಳೆದು ಬಂದ ಬಂಧ
ನೆನಪುಗಳಾಗಿ ಇನ್ನೇಷ್ಟೂ ಕಾಲ
ಹೀಗೆ ಜೀವ ಹಿಂಡ ಬೇಕೋ?!
ಒಮ್ಮೆ ಎಡವಿದ ಕಾಲ್ಬೆರಳು
ರಕ್ತ ಒಸರುತ್ತಿದ್ದರೂ ಇನ್ನೆಷ್ಟು ದೂರ
ಈ ಓಟದ ಆಟದಲಿ ಓಡಬೇಕೋ?!
ಒಡೆದ ಕನಸುಗಳ ಅವಶೇಷಗಳನ್ನಿಟ್ಟು
ಇನ್ನೆಷ್ಟು ನಕ್ಷತ್ರ ಕನಸ ಹೊಸೆದು
ಹಸಿ ಹಸಿಯಾಗಿ ಮತ್ತೆ ಮತ್ತೆ ಹುಟ್ಟಬೇಕೋ ಕಾಣೆ!!
06/11/2014
No comments:
Post a Comment