ನುಣುಪಾದ ಕೆನ್ನೆಯನು

ಸ್ವತಃ ಮುಟ್ಟಿ 

ನೋಡಿಕೊಳ್ಳಲಷ್ಟೇನು 

ಆಸಕ್ತಿ ಇರುವುದಿಲ್ಲ;

ನುಣುಪಾದ ಕನ್ನಡಿಯೇ ಬೇಕು

ಕೃತಕವೆನಿಸಿದರೂ

ನೈಜತೆಗೊಂದು ತೆಳು ಪರದೆ

ಬೇಕೇ ಬೇಕೇನೋ

ಕದ್ದು ನೋಡೊ ಸ್ವಾರಸ್ಯವ 

ಅನುಭವಿಸಲು! 

06/11/2014

^^^^^^^^^^^^^^^^^^^^^^^^^^^^^^^^

ಇಲ್ಲದ ನೋವನು 

ಕಲ್ಪಿಸಿ ಮೊರೆವಾಗ

ಕಣ್ಣೀರು ಹೆಚ್ಚು

ಇದ್ದ ನೋವನು 

ಇನ್ನಿಲ್ಲದೆ ಮರೆಮಾಚುವಾಗ

ಎಲ್ಲಿಲ್ಲದ ಸಡಗರ ಸಂಭ್ರಮ

ಗೆದ್ದಂತೆ ಎಲ್ಲವ!

^^^^^^^^^^^^^^^^^^^^^^^^^^^^^

ಪದ್ಯಗಳಲ್ಲೇ ಕನಸು ಕಟ್ಟಿ,

ಕನಸುಗಳಲ್ಲೇ ಕಾಮನೆ ಹರಡಿ,

ಎಷ್ಟು ಸುರುಳಿ ಸುತ್ತಿಹುದೊ

ಆ ಆಲದ ಮರ,,

ಒಮ್ಮೆಲೆ ಬಿಳುಲಾಗಿ ಬಾಗಿದೆ ಭುವಿಗೆ,,

ಮರೆತು ದಿಕ್ಕುಗಳ,,

ನೆನಪಿಟ್ಟು ಪ್ರೀತಿಯನೇ,,

04/11/2014