ಕವನ

ಮನದ ಹೊಲ..

ತುಂಬಿಕೊಂಡಷ್ಟೂ ಹಿಗ್ಗುವ ಮನ

ಹಿರಿ ಹಿಗ್ಗಿ ತುಡಿವುದು ಪ್ರೇಮಕೆ

ಮಮತೆ, ಸ್ನೇಹ, ಪ್ರೀತಿ, ಒಲುಮೆಯಲಿ ಕಣ್ತೇವ

ಮನಸು ಹಸಿ ಹಸಿ ಕಣ್ಗಳು ಹಸಿ ಬಿಸಿ

ಎದೆಯೆಲ್ಲಾ ಹದವಾದ ಹೊಲ

ಜಿಟಿಮಿಟಿ ಚಿಗುರಿದೆ ಮನದ ಹಸಿರು

ತಲೆಯೆತ್ತಿ ನೋಡುತ ಹೊಳೆವ ಸೂರ್ಯ 

ಅತ್ತ ಇತ್ತ ಸುಳಿವ ತಂಗಾಳಿ ಇನಿ

ಮಣ್ಣ ಘಮ ತೇಲಿಸಿ ತನುವ

ಮರೆಯಿಸಿ ಕಳೆದ ಕಳೆಯ

ಬತ್ತಿದ ಕೋನಗಳಲ್ಲಿ ಒಲವಿನ ಚಿಲುಮೆಯ

ಎಷ್ಟು ಬಣ್ಣಿಸಲಿ ಈ ಹಸನಾದ ಕನಸ

ಇರುಳ ತಾರೆಯಲಿ ಕನಸ ತೇಲಿಸಿದೆ

ಚಂದ್ರಮನದಕೆ ಚುಕ್ಕಿ ಎಂದನು

ಹತ್ತಿರಾಗುತ ಹಿರಿದಾಗುವ ಚುಕ್ಕಿಗೆ

ಜಗವದು ಸೂರ್ಯನೆಂದಿತು ಹಗಲಿನೊಳಗೆ

ರಾತ್ರಿಯ ಕನಸೆಲ್ಲಾ ಹಗಲ ಕನಸುಗಳಾಗಿ

ಹಗಲುಗನಸಾದವು ಎಚ್ಚೆತ್ತುಕೊಂಡು!

ಕನಸಿಗೆ ರಾತ್ರಿ ಹಗಲಿನ ಪರಿವೆಯೇ ಇಲ್ಲ

ಮನದ ಹೊಲದೊಳು ಜಿಟಿಮಿಟಿ ಚಿಗುರು 

ರಾತ್ರಿಯ ತಿಂಗಳು, ಹಗಲ ಸೂರ್ಯನು

ಚೆಲ್ಲಿರುವರು ಬೆಳಕನೇ ಹಗಲಿರುಳು!

09/11/2014