ಕವನ

ಕಣ್ಣ ಬಿಂಬ

ಚಲಿಸುತ್ತಲಿದ್ದೆ ನಾ

ಬಿಂಬ ಸ್ಪಷ್ಟವಾಗಲೇ ಇಲ್ಲ

ನನ್ನ ನಾ ಕಾಣಲು!

ಅಲ್ಲಲ್ಲಿ ಅವರಿವರ

ಉದ್ಗಾರ;

ಚೆಂದ, ಬಿಂಕ-ಬಿಗುಮಾನ

ಸಾಧಾರಣ, ಸೂಪರ್-ಸಪ್ಪೆ, 

ಜೊಳ್ಳು-ಪೊಳ್ಳು

ನಾ ದಾರಿಯಲಿ ಸಾಗುತ್ತಲಿದ್ದೆ

ದಿನ ಬೆಳಗಾದರೆ

ಪಶ್ಚಿಮದಿಂದ ಪೂರ್ವಕೆ!

ಚಲನೆಯ ಹಂತಗಳಲಿ

ನಾನು ಅವರ ಅಷ್ಟೂ ಆಗಿದ್ದೆ;

ಆಗುತ್ತಲಿರುವೆ,

ಜಡವಲ್ಲ ನಾ

ಒಂದೇ ಆಗಿರಲು!

ನನ್ನ ನಡುಗುವ ಕೈಗನ್ನಡಿ

ತೋರದ ನನ್ನ

ಅಲ್ಲಲ್ಲಿ ಅವರ ಕಣ್ಗಳಲಿ ಕಂಡೆ!

ನನಗಿನ್ನೂ ಸ್ಪಷ್ಟವಿಲ್ಲ

ನಾನು!

ನಾನಿನ್ನೂ ಗುರಿ ಮುಟ್ಟಿಲ್ಲ

ದಾರಿಯಲ್ಲಿರುವೆ

ದೂರದೂರಿಗೆ...!

04/02/2015