ಎಲ್ಲಾ ಅಳಿದ ಮೇಲೂ

ಮತ್ತೆ ಉಳಿಯುವುದೇ

ಪ್ರಾರಂಭ!

***

ಕಾಡು ಮಲ್ಲೆಗೆ ಸಂತಸವಂತೆ

ನರನ ಮೋಹ ಸೋಕದೆ

ಸ್ವಚ್ಛಂದವಾಗಿ ಬಿರಿಯುವುದಕೆ

***

ವಿರಾಮದ ಸಮಯಕೆ

ಪೂರ್ಣ ವಿರಾಮ ನಿನ್ನ ನೆನಪು

***

ಬದುಕ ಬಂಡಿ ವಾಲುವುದು

ಆಗೊಮ್ಮೆ ಈಗೊಮ್ಮೆ

ಪಯಣವಿದು ನಿರಂತರ

ಹೆಜ್ಜೆಗಳಿವು ದಿಟ್ಟತನ

ಶಕ್ತಿಯೊಂದೇ ಮನದ ದಿಟ!!

***

ಕಲ್ಪನೆಗೆ 

ಕೊನೆಯಿಲ್ಲ

ನನ್ನೊಳು 

ನಾ 

ಬದುಕಿರುವ 

ತನಕ 

***

ನೀ ಕೊಟ್ಟ ಹೂ

ಇಂದಿಗೂ ನನ್ನ ಬಳಿಯಿದೆ

ಆದರೆ ಅದಕೆ ಜೀವವಿಲ್ಲ

ನಿನ್ನ ಚಿತ್ರವಿದೆ

***

ಕನಸಿನಿಂದಿಳಿದ ಖುಷಿಯು

ಮನಸಿನಲ್ಲುಳಿಯದೇ ಹೋಯಿತು

ಕಾಗದದಲ್ಲಿಳಿದು ಮರೆವ ಮರೆಸಿತು

***

ಎಲ್ಲರೊಳಿರುವನೊಬ್ಬ ಯಯಾತಿ

ಸಮಯದಿ ಹೆಡೆಯೆತ್ತುವ ಅತಿರಥ,

ಆದರೆ ಆಸರೆಗೆ ಶರ್ಮಿಷ್ಠೆಯಿಲ್ಲ

ತ್ಯಾಗಕ್ಕೆ ಚಿತ್ರಲೇಖೆಯಿಲ್ಲ,

ಎಲ್ಲರೊಳಿರುವನೊಬ್ಬ ಯಯಾತಿ 

ಹೆಂಗಳೆಯರಲ್ಲಿ ಚಿತ್ರಳನ್ನು ಕಾಣುತ್ತ

ದೇಹ ಸೋಲಲು ಶರ್ಮಿಷ್ಠೆಯನ್ನು ಹುಡುಕುತ.

***

ಬಂದ ಮೇಲೆ 

ಹೋಗುವ ಮುನ್ನ

ವೈರಾಗ್ಯದ ಭಯವೇ

ಹೆಚ್ಚು ಕಾಡುವುದು

ವಿಲಾಸಕ್ಕಿಂತ! 

***

ತುಂಬಾ ಸಲೀಸಾಗಿ ಹರಟುವ ಮನವು

ನಿರ್ಭಾವುಕವಾದಾಗ 

ಕಾಣುವುದು ಜಟಿಲವಾಗಿ 

ಮೂಡಿಸುವುದು ಗುಮಾನಿ

ಒಮ್ಮೊಮ್ಮೆ ನಾನೂ ಹಾಗೇ! 

ನಂಬುವುದಿಲ್ಲ ಆಗ ಸುತ್ತಲಿನವರು 

***

ಗೆಲುವು ಸತ್ಯ

ಎನ್ನುವುದು ಸುಳ್ಳು

ಸೋಲು ಸುಳ್ಳು

ಎನ್ನುವುದು ಸತ್ಯ

ಸತ್ಯ ನಿತ್ಯ; ಸುಳ್ಳು ಪಥ್ಯ

ಹೌದು ನಾ ಸೋತಿರುವೆ! 

31/10/2013