ಕವನ

ಮನದಲ್ಲೊಂದು ಮೌನ

ಪ್ರೀತಿಸಬೇಕೆಂದು ಎನಿಸಿದ 

ಪ್ರತೀ ಕ್ಷಣದ ಹಿಂದೆ

ದೂರಾಗೊ ಆತಂಕ;

ಸುಮ್ಮನಿದ್ದು ಬಿಡುವೆ ಹೀಗೆಯೇ,

ಸಾಲು ಸಾಲು ದುರಂತಗಳ ನಂತರ

ಇನ್ನು ತ್ರಾಣವಿಲ್ಲ ಬದುಕಲಿ

ಕಣ್ಗಳಾದರೂ ನಗುತಿರಲಿ

ಎದುರುಗೊಳ್ಳೊ ನಗೆಗಳೆದುರು

ನಕ್ಕು ಬಿಡುವೆ ಸುಮ್ಮನೆ

ಮನದಲ್ಲೊಂದು ಮೌನ

ಹೀಗೆಲ್ಲಾ ಸೋಕಿ ಹೋಗೋ

ನಿನ್ನ ನಿಟ್ಟುಸಿರಿಗೆ..!

14/10/2014

ಮನಸಿಗಷ್ಟು ಮುದ ಕೊಡುವ

ಸಣ್ಣ ಸಣ್ಣ ಕುತೂಹಲ-ಮೆಚ್ಚುಗೆಗಳು

ಬಹುಶಃ ದೊಡ್ಡ ದೊಡ್ಡ ತಲೆನೋವುಗಳಿಗೆ ಮದ್ದು!! 

ಕವನ

ದಂಗೆ ಏಳಲಾರದ ಅಸಹಾಯ ಸ್ಥಿತಿಗೆ

ನಾ ಸಂತಳೆಂದು ಹೇಳಿಕೊಂಡೆನು

ನನ್ನಲೂ ಆಸೆಗಳಿವೆ ಅವು ಅವಕಾಶಗಳ ಬೇಡುತ್ತಲಿವೆ

ಸಮಯ ದೂಡಿರುವೆ ಬಲಿಯಲು

ಕೋಪವೆಂಬ ಕಿಚ್ಚಿದ್ದ ಕಾರಣ

ಸಾಧುವಲ್ಲ ನಾ

ತಾಮಸವಾದಿ ಭುಗಿಲೇಳುವವರೆಗೂ!

ತಡೆದು ತಡೆದು ನಿಂತ ಭೂ ಗರ್ಭದ

ಜ್ವಾಲಾಮುಖಿಯು ನಾನು!

13/10/2014

ಕವನ

ನಿತ್ಯ ನೂತನ ಆಸೆಗಳಲಿ
ಕರಗಿಸಲಿ ಹೇಗೆ ನಾ ಕನಸುಗಳ
ಕಾಣಬಾರದೆಂದು ಎಷ್ಟು ಬಿಗಿಹಿಡಿದರೂ
ರೆಪ್ಪೆ
ಅದ್ಯಾವ ಮಂಪರಿನಲಿ
ತೆರೆದುಕೊಳ್ಳುವುದೋ ಕನಸಿಗೆಬತ್ತಿ ಹೋದ ಪ್ರೀತಿಗೂ
ನೆನಪುಗಳ
ಬಸಿದುಕೊಂಡ ರೀತಿಗೂ
ಸೋಜಿಗದೂರಿನ ಆಹ್ವಾನ
ಇನ್ನೆಷ್ಟು ತಡೆಯಿಡಿಯಲಿ ನಿದಿರೆ
ಇನ್ನೆಷ್ಟು ಬಿಗಿದು ಹಿಡಿಯಲಿ ರೆಪ್ಪೆ
ಜಾರುತಿದೆ ಮನಸ್ಸು ಕನಸಿನೂರಿಗೆ
ಅರೆ ಬೆಂದ ಇಟ್ಟಿಗೆಗಳೊಂದಿಗೆ
ಬೆಂದುಕೊಳ್ಳೊ ಗೂಡಿಟ್ಟು
ಕಾಯಬೇಕಿದೆ ಸೂಕ್ತ ನೆಲೆಗೆ
ಇಟ್ಟು ಮನಸ ಹರವಲೊಂದು
ದಿಟವಾದ ದಿಟ್ಟ ದೀವಿಗೆ!..

13/10/2014

ಕವನ

ನನ್ನ ಎತ್ತರವನ್ನು ನಾನು ತಗ್ಗಿಸಿಕೊಂಡೆ


ಅವನು ತಗ್ಗೇ ಇದ್ದಂತೆ ಕಂಡು ದೂರದಲ್ಲಿದ್ದ


ಹತ್ತಿರಾದಂತೆ ವ್ಯತ್ಯಾಸಗಳು ಹೆಚ್ಚಾಯ್ತು


ನಾ ತಗ್ಗಿದ್ದು ಇನ್ನೂ ನೆಲ ಸಮವಾದಂತೆ 


ಈಗ ಹತ್ತಿರಾದ ಅವನ ಮುಂದೆ,, 

ತಗ್ಗಿದ್ದು ತಪ್ಪೇ? ಇಲ್ಲ ಹತ್ತಿರಾಗಿದ್ದು?

ಇನ್ನೂ ಚಿಂತಿಸುತ್ತಲಿರುವೆ,,

ಎಲ್ಲಿ ನಾನಿದ್ದೆ ಈಗೆಲ್ಲಿರುವೆ,,

ನೆಲದಡಿಯಲಿ.....


12/10/201

ಕವನ

ಅಲೆಗಳೆದುರಿಗೆ ಈಜುವ ಈಜುಬಾರದವಳು!
ಸದಾ ನೀರಿಗೆ ಹಾತೊರೆಯುವಳು!
ದಿನ ಬೆಳಗಾದರೆ ತೊರೆಯೊಳು ಧುಮುಕೋ ಮೋಜಿನವಳು!
ಈಜುಬಾರದವಳು, ಈಜದೇ ದಡ ಸೇರದವಳು!
ಮೀನುಗಾರರ ಕಣ್ಣಿಗೆ ಕಸರತ್ತಿನ ಪಟು ಅವಳು!
ನೀರ ತೊರೆಯ ಸುತ್ತಲೇ ಅಲೆದು,
ನೀರ ಮುಟ್ಟಿ ಈಜಲಾರದ ಸ್ಥಿತಿಗೆ ಏದುಸಿರಿನವಳು!
ಮುಳುಗಿ ನೋಡಿ, ಮತ್ತೆ ಮತ್ತೆ ಮುಳುಗೋ ಅವಳು
ಛಲ ಬಿಡದೆ ಈಜು ಕಲಿಯದೇ ತೇಲಿ ಹೋಗೋ ನೀರ ಮೇಲಣ ಆವಿಯಾದವಳು,,,,,,,,,

11/10/2014

ಕವನ

ಹೀಗೆಯೇ ಅಲೆಯುತಿದ್ದ ಮನಕೆ
ಎದುರಾದ ತಂಗಾಳಿ ಹಾಯ್ ಎನಿಸಿ
ಮನದಲ್ಲೆಲ್ಲಾ ಕೋಲಾಹಲ

ನೆನಪುಗಳ ಸುತ್ತ ಹೊರಳಾಟ,
ಹೊಸ ಕನಸುಗಳ ಜೂಟಾಟ,

ಇದ್ದಷ್ಟು ಕಾಲ ತಂಗಾಳಿ
ತೆಪ್ಪಗೆ ತಂಪಾಗಿರುವೆ
ಕಟ್ಟಿಹಾಕಿದಂತೆ ಗಾಳಿಯ ಮೋಡಿಗೆ..
ಆ ಹಳೆಯ ಬಿರುಸು ನೆನಪುಗಳಿಗೆ

ಎಷ್ಟು ಕಾಡುತ್ತವೋ ಕಾಡಲಿ,,
ಗಟ್ಟಿಗಿತ್ತಿ ನಾ ಕಾಡಿಸಿಕೊಳ್ಳಬಲ್ಲೆ
ಇದ್ದಷ್ಟು ಕಾಲ ಹಾಗೆಯೇ
ಸದಾ ನಕ್ಕು ನಲಿವ ಎನ್ನ ಮನದೊಂದಿಗೆ!

ಪ್ರತೀ ಹಂತಗಳಲ್ಲೂ
ತಮ್ಮನ್ನು ತಾವು
ಸಾಬೀತುಪಡಿಸಿಕೊಳ್ಳುವುದು
ಮುಜುಗರಕ್ಕಿಂತ
ದುಃಸ್ಥಿತಿ ಎನ್ನಬಹುದು,,,!

%%%%%%%%

ನಿನ್ನ ಪ್ರೀತಿಯೋ
ಇಲ್ಲ
ನೀ ಬರೆಯೋ
ಅಕ್ಷರ ಪ್ರೀತಿಯೋ
ಒಟ್ಟಿನಲ್ಲೊಂದು ಪ್ರೀತಿ
ಇದೆ
ಈ ಜೀವಕೆ,!

%%%%%%%%%%%%%%

ನಿಲ್ದಾಣವೆನ್ನುವುದು ಹೆಸರಿಗಷ್ಟೇ
ಆ ನಿಲ್ದಾಣಕ್ಕೆ ನಾವೇ ನಡೆದು ಹೋಗಬೇಕು
ಬಸ್ ಹಿಡಿಯಲೇಬೇಕೆಂಬ ಉದ್ದೇಶವಿದ್ದರೆ,
ಹಾಗೆಯೇ ಈ ಹುಚ್ಚು ಪ್ರೀತಿ,,

%%%%%%%%%%

ಕೆಲ ಹೊತ್ತಿನ ಪ್ರೀತಿಗಾಗಿ
ದೇಹ ತ್ಯಜಿಸೊ ಮನಸ್ಸಿಗೆ
ನನ್ನದು ಸಹಗಮನವಾದರೂ
ಆತ್ಮತೃಪ್ತಿ ಇರುವುದೇನೋ!!

%%%%%%%%%

ಮರೀಚಿಕೆಗೂ ಪ್ರೀತಿಗೂ
ಅದೇನು ಸಾಮ್ಯತೆ?!...
ಪ್ರೀತಿಯ ಕೈಹಿಡಿದು
ನಡೆದ ದಾರಿಯೆಲ್ಲಾ
ಕಾಮದ ಮುಳ್ಳುಗಳು!
ಹೆಜ್ಜೆ ಇಡಲಾರದ ಸ್ಥಿತಿಗೆ
ಹಬ್ಬಿಕೊಂಡ ಬೇಲಿ,
ಮಾತು ಬರಬಾರದಿತ್ತು
ನಾಲಿಗೆ ಕಿತ್ತು ಹೋಗಿದೆ
ಅಂದವಿರಬಾರದಿತ್ತು
ಮನವು ಗೋಳಿಟ್ಟಿದೆ..

10/10/2014

%%%%%%%%%%%%%%%%

ಪ್ರೀತಿ ಎಂಬುದು ಹುಡುಕಾಟದಲ್ಲಿಯೇ ಇರಬೇಕೇನೋ
ಸಿಕ್ಕಿಬಿಟ್ಟರೆ ಮನಸ್ಸು ಸೋಮಾರಿಯಾಗೋ ಭಯವೇನೋ

%%%%%%%%%%%%%%%%%%%

ಮೌನವಾಗಿ ಒಂದಷ್ಟು ದೂರ ಕೈಹಿಡಿದು ನಡೆ
ಪ್ರೀತಿಯ ಪರಿಭಾಷೆ ಅರಿವಾಗುವುದು,,
ನನ್ನಯ ಕೈ ಬಿಸಿಯೂ ಮಾತಾಗುವುದು
ಕಿವಿಯಾಗುವ ನಿನ್ನದೆ ಬಡಿತವೂ
ಪದೆ ಪದೆ ನನ್ನ ಮನದ ಪ್ರತಿಧ್ವನಿಯೇ ಆಗುವುದು!

%%%%%%%%

ಮೂಕವಾಗಿಸೊ ಪ್ರೀತಿ
ಪದಗಳಲ್ಲಿ ನಿಲುಕದು
ಅಬ್ಬರವಾಗುವ ಮಾತು
ಸೆಳೆತದ ಉನ್ಮಾದ!

09/10/2014

ಕವನ

ಎಲ್ಲೆಲ್ಲೋ ಹುಡುಕಿದ್ದು ಹಿತ್ತಲಲ್ಲಿ ಕಂಡದ್ದು

ಪ್ರೀತಿ-ಶಾಂತಿ-ನೆಮ್ಮದಿ!

ಚೊಕ್ಕಟಕೊಂಡ ಮನಸ್ಸು ಕೊಟ್ಟಿದ್ದು

ನೋಡಿದೆಲ್ಲವೂ ಸುಂದರವೆನಿಸುವಷ್ಟು

ಆತ್ಮ ಶುದ್ಧಿ!

ಕಾಲ ಕೆಳಗೂ ಅವಿತಿರುವ ಭವ್ಯ ಖನಿಜ ತಿಳಿಸಿದ್ದು

ತಲೆ ಬಾಗಿ ದಕ್ಕಿಸಿಕೊಳ್ಳುವ ಸೌಜನ್ಯ-ಪರಿಶ್ರಮ!

ಎದುರಾಗೊ ಅವಮಾನಗಳು ಕಲಿಸಿದ್ದು

ನೆಟ್ಟಗೆ ನಿಲ್ಲುವ ಸ್ವಾಭಿಮಾನ!

ನಿಂದನೆ-ತಿರಸ್ಕಾರಗಳು ಕೊಡುಗೆ ಕೊಟ್ಟದ್ದು

ಮರೆವು ಮತ್ತು ಬಿಟ್ಟುಬಿಡುವ ಪ್ರವೃತ್ತಿ!!

09/10/2014

ಕವನ

ಈ ಹೊತ್ತಿಗೆ

ಉದಯ ರವಿ ಮರೆಯಲಿ ನಿಂತು

ಕಳೆದಿರುಳ ಎನ್ನ

ಕನಸ ಕದ್ದು ಕೇಳಿದ ಹಾಗೆ

ನೀನಿನ್ನೂ ರಶ್ಮಿ ಚೆಲ್ಲಿರುವೆ

ನೆರಳಲೇ ಕುಳಿತು ನಾ

ಪದ ಕಟ್ಟಿ ಹಾಡಿರುವೆ

ಕಪ್ಪೊಳಗೊಂದು ಪ್ರೇಮ ಕಿಡಿ

ಹೊತ್ತಿಕೊಳ್ಳುವುದೇ

ಬೆಳಗುವುದೇ ಕನಸು

ಈ ಹೊತ್ತಿಗೆ...?!

ಚಿತ್ರ ಕೃಪೆ; ಜಿ ರಾಮಚಂದ್ರ ಐತಾಳ ರವರು

09/10/2014

ಮನದ ಮಾತು

ಪ್ರೀತಿ-ಪ್ರೇಮ-ಪ್ರಣಯ!

ಹರಯದಲ್ಲಿ ಉಕ್ಕುವ ಅನ್ಯ ಲಿಂಗದೆಡೆಗಿನ ಮಮತೆಯು ಪ್ರೀತಿ ಎನಿಸಿಕೊಂಡಿದ್ದರೂ ಅದು ಬಹಳಷ್ಟು ಬಾರಿ ಕೇವಲ ಹೆಣ್ಣಿನ ಅಭಿಪ್ರಾಯಗಳಷ್ಟೇ. ಗಂಡು ಪ್ರೀತಿ ಪ್ರೇಮವನ್ನು ಕೇವಲ ಮೋಹವಾಗಿಯಷ್ಟೇ ಪರಿಗಣಿಸುತ್ತಾನೆ. ಸುಳ್ಳು ಎಂದೆಲ್ಲಾ ವಾದಿಸಿದರೂ ಅವರವರ ಆಂತರ್ಯದ ನಿಷ್ಠೆಗೆ ಬಿಟ್ಟದ್ದು. ಕಳೆದ ವರ್ಷವಷ್ಟೇ ಮದುವೆಯಾದ ನನ್ನ ಗೆಳತಿಯೊಬ್ಬಳು ಭೇಟಿ ಮಾಡಮಾಡಲೆಂದು ಬಂದಿದ್ದಳು. ಹೊಸ ಮದುವೆ ಬಹುಶಃ ಖುಷಿಯಾಗಿರಬಹುದೆಂದು ನಾನು ಊಹಿಸಿದ್ದೆ. ಬಂದಳೋ ಅಳಲಾರದೆ ನಗುತ್ತಿದ್ದಳು. ನನಗೋ ಏನು ಮಾಡಬೇಕೆಂದು ತಿಳಿಯಲಿಲ್ಲ,, ಅವಳ ಒಂದೊಂದು ಮಾತುಗಳು ಜೀವನದ ಒಂದೊಂದು ಪದರಗಳನ್ನು ಬಿಚ್ಚಿಟ್ಟಂತೆ ನನಗೆ ನಂಬಲಾರದ ಗುಟ್ಟುಗಳು!. ನೋಡಲು ಅಷ್ಟೇನು ಅಂದವಿಲ್ಲದ ಅವಳ ಗಂಡ, ಸುಂದರವಾದ ಹೆಂಡತಿಯನ್ನು ಮಾತನಾಡಿಸಲೂ ಮುಂದಾಗನಂತೆ. ಕೇಳಿದರೆ ಜಗಳ. ಹೊರಗೆಲ್ಲೋ ಸುತ್ತಾಡಿಕೊಂಡು ಸುಸ್ತು ಎಂದು ಎಲ್ಲೆಂದರಲ್ಲಿ ಹಾಲಿನಲ್ಲಿ ಮಲಗಿಬಿಡುತ್ತಾನಂತೆ. ರಾತ್ರಿ ಒಂದು ಗಂಟೆಯಾದರೂ ಒಳಗೆ ಬಾರದ ಗಂಡನನ್ನು ಕಾದು ಅದು ಯಾವಗಲೋ ಇವಳು ಮಲಗಿಬಿಟ್ಟಿರುತ್ತಾಳೆ. ಇಷ್ಟೆ ಅಲ್ಲದೆ ಕಂಡ ಕಂಡ ಹೆಣ್ಣುಗಳನ್ನೆಲ್ಲಾ ತನ್ನೆದುರೇ ಹೊಗಳಿ, 'ಪ್ರಪಂಚದಲ್ಲಿ ನಿನ್ನ ಬಿಟ್ಟು ಮಿಕ್ಕ ಎಲ್ಲರೂ ನನಗೆ ಒಳ್ಳೆಯವರೇ, ಇಷ್ಟವಾಗುವವರೆ',, ಎಂದು ಬೇರೆ ಮೂದಲಿಸುತ್ತಾನಂತೆ. ಸುಂದರವಾಗಿ ಸಿಂಗರಿಸಿಕೊಳ್ಳುವುದೂ ಇಷ್ಟವಿಲ್ಲವಂತೆ. ಮದುವೆಗೆ ಮುನ್ನ ನಮ್ಮೆಲ್ಲರಿಗಿಂತಲೂ ಸುಂದರವಾಗಿ ಕಾಣುತ್ತಿದ್ದ ಅವಳು ಈಗ ಅನಾರೋಗ್ಯದೊಂದಿಗೆ ನಿಶ್ಚೇತನಳಾಗಿ ಕಾಣುತ್ತಿದ್ದಾಳೆ. ಅವಳೀಗ ತನ್ನ ತವರು ಮನೆಯಲ್ಲಿ; ಗಂಡನು ವಿಚ್ಛೇದಕ್ಕಾಗಿ ಕೋರ್ಟಿನಲ್ಲಿ. ಹೊಂದಿಕೊಳ್ಳಲಾಗದಿರಲು ಅಥವಾ ಪ್ರಯತ್ನಿಸದಿರಲು ಕಾರಣವೇನು? ಅವನು ಹೇಳನು, ಇವಳು ನಂಬಳು. ಗಂಡನಿಗದು ಬೇಡದ ಮದುವೆ. ಹೆಸರಿಗೊಂದು ಮದುವೆ ಬೇಕಿತ್ತು ಅಷ್ಟೇ ಅವನ ಉದ್ದೇಶವೂ. ಇದನ್ನು ಯಾವ ಸಮಾಜ,, ಯಾವ ಕಾನೂನು ಅರಿತು ಆ ಹೆಣ್ಣಿಗೆ ತೀರ್ಪುಕೊಡುವುದು? ಎಲ್ಲಿದೆ ನ್ಯಾಯ?!!!

ಇಲ್ಲಿನ ಕೊರತೆಯೆಂದರೆ ಪ್ರೀತಿ-ವಿಶ್ವಾಸದ್ದು ಹಾಗೆಯೇ ಪ್ರಣಯವೂ.. ಮದುವೆಯಲ್ಲಿ ಬಹು ಮುಖ್ಯ ಪಾತ್ರವಹಿಸೋ ಪ್ರಣಯ-ಮೋಹವು ಅಲ್ಲಿ ಕೈಕೊಟ್ಟಿದೆ ಎಂದಷ್ಟೇ ತಿಳಿಯಬಹುದು..

ಜೀವಿಯೂ ಬಯಸುವುದು ನಿಜವಾಗಿಯೂ ಪ್ತೀತಿಯೇ,, ಎಷ್ಟೋ ಜನರು ಪ್ರೀತಿಗಾಗಿ ಮದುವೆಯಾಗಿ ಒಟ್ಟಿಗಿದ್ದಾರೆ ಮಕ್ಕಳಿಲ್ಲದೆ. ಪ್ರೀತಿಗಾಗಿ ಮದುವೆಯಾಗಿದ್ದಾರೆ ಸಂಗಾತಿಗಲ್ಲಿ ಆಯುಷ್ಯವಿಲ್ಲದಿದ್ದರೂ. ಬಹುಶಃ ಇಂತಹ ಮನೋಸ್ಥಿತಿಗಳು ಆ ಉಚ್ಚ ಮಟ್ಟದ ಜೀವಗಳಲ್ಲಿ ಮಾತ್ರವೆನ್ನಬಹುದೇನೋ!. ಪ್ರೀತಿಯನ್ನು ಹಂಬಲಿಸಿ ಕೊರಗುವ ಮನಸ್ಸುಗಳಿಗೆ ಪ್ರೀತಿಯು ಸಿಗುವುದೇ ಇಲ್ಲವೇನೋ ಎಂದೆನಿಸುವುದು ಬಹಳಷ್ಟು ಬಾರಿ. ಆ ಕಾರಣ ಅದರ ಹಂಬಲವನ್ನು ತೊರೆದು ಬದುಕವುದು ಸರಿಯೆನೋ. ನಮ್ಮನ್ನು ಗೌರವಿಸುವ ಸಮಾಜಕ್ಕೆ ಮಿಡಿವ ಹೃದಯವಾಗಿ ಮತ್ತೂ ಅಷ್ಟೇ ಗಟ್ಟಿಯಾಗಿ ನಿಲ್ಲಬೇಕು. ಪ್ರೀತಿಯೆಂಬುದು ನಮ್ಮ ದೌರಬಲ್ಯವಲ್ಲ. ಹಾಗೆಯೇ ಇತರರಿಗೂ ಅದು ನಮ್ಮ ದೌರ್ಬಲ್ಯವಾಗಿ ಕಾಣುವುದು ಕಾಡುವುದೂ ಬೇಡ. ನಾವು ನಮಗಿದು ಬೇಕಿದೆ ಎಂದಾಗಷ್ಟೇ ಕೊಡುವ ನೆಪಗಳು ಮತ್ತದರ ಹಿಂದೆಯೇ ಬರುವ ಅವರ ಸ್ವಾರ್ಥಗಳು ನಮ್ಮ ಜೀವನವನ್ನು ಮತ್ತೂ ದುಸ್ತರಗೊಳಿಸಿಬಿಡುತ್ತದೆ.

ಜೀವನಕ್ಕೆ ಪ್ರೀತಿ ಬೇಕಿದೆ ಅದಕ್ಕಾಗಿ ಸಮಾಜದಲ್ಲಿ ಹಾತೊರೆವ ಮಕ್ಕಳಿದ್ದಾರೆ. ಪ್ರೀತಿಯೆಂಬುದು ಬಹುರೂಪಿ ಎನ್ನುವದನ್ನು ಮತ್ತೆ ನೆನಪಿಸಬೇಕಿಲ್ಲವಲ್ಲ,,

ಪ್ರೀತಿಸಲು ಶೋಷಿತರಿದ್ದಾರೆ ಅಬಲೆಯರಿದ್ದಾರೆ..ಪ್ರೀತಿಸಿಕೊಳ್ಳಲು ವೃದ್ಧರಿದ್ದಾರೆ. ನಿರ್ಮಲವಾದ ಪ್ರೀತಿಯನ್ನಷ್ಟೇ ಬಯಸೊ ಜೀವಿಗಳು ಇನ್ನೂ ಇದ್ದಾರೆ ನಮ್ಮಂತೆಯೇ. ಸೇರಿಕೊಳ್ಳಲು ಮನಸ್ಸಿರಬೇಕು. ಗುರುತಿಸಲು ನಮ್ಮೊಳಗಣ್ಣು ತೆರೆದಿರಬೇಕಷ್ಟೆ. ಒಂಟಿತನಕ್ಕೆ ಕಾಮ-ಮೋಹವೇ ಮದ್ದಲ್ಲ. ಪ್ರೀತಿಸುವ ಮನಸ್ಸೊಂದೇ ನಿಜ ಸಂಗಾತಿ!!

''ಹರೆಯದ ಪ್ರೀತಿ, ತೊರೆಯುಕ್ಕೋ ರೀತಿ

ಹಸಿದವಗೆ ಹೊಟ್ಟೆಗೆ ಬಿದ್ದ ರೊಟ್ಟಿ!

ಪ್ರೀತಿಯಂದರೇ ಇದುವೇ ಏನು?!

ಹಾಗಿದ್ದರೆ...

''ಹಸಿವಿರಲಿ ನೋವಿರಲಿ

ಮನದಲೊಂದು ಸುಂದರ ನೆನಪಿರಲಿ

ಪ್ರೀತಿ ತುಂಬಿದ ಅವನ ಚೇತನಕೆ''...

ಜೀವನವು ತುಂಬಾ ಸುಂದರವಾಗಿದೆ. ನಮ್ಮೊಳ ಮನಸ್ಸು ನಿರ್ಮಲವಾಗಿದ್ದರಷ್ಟೆ. ನಿರ್ಮಲತೆಗೆ ಪ್ರೀತಿಯ ಗಂಧ ಸಾಕು, ಮೋಹದ ಮಧುವಿಲ್ಲದಿದ್ದರೂ...

ಕೊನೆಯದಾಗಿ ಹೇಳುವುದಾದರೆ ಪ್ರೀತಿ-ವಿಶ್ವಾಸವೆಂಬುದು ಶಾಶ್ವತ, ಉಳಿದಂತೆ ಎಲ್ಲವ ಮೀರಿ!.  

10/10/2014 

ಕವನ

ಬಿಳಿಯ ಹಾಳೆಗಳು

ಅವನು ಬರೆಯುವವನಾದರೆ,

ಅವನ ಸೀಸದ ಕಡ್ಡಿಯ ಚಿತ್ರಕೆ

ನನ್ನದು ಬಳಪದ ಬಣ್ಣಗಳು

ಆದರೂ ಮೆಚ್ಚುವನು ನನ್ನ,

ನಾನೇ ಬರೆಯುವವಳಾದರೆ

ಬಿಳಿ ಗೋಡೆಯ ಮೇಲಿನ 

ನನ್ನ ಇದ್ದಿಲ ಚಿತ್ತಾರಕೆ

ಅವನು ಆಗಸದಗಲ ಹಬ್ಬೊ 

ಕಾಮನಬಿಲ್ಲು,

ಮೆಚ್ಚದಿರಲು ನಾ ಅವನ 

ಕಾರಣವಿಲ್ಲ,

ಇದು ನನ್ನೊಳ

ಆ ನಮ್ಮಿಬ್ಬರ ಬಣ್ಣಗಳು,

ಚಿತ್ರವಾಗಿ ಮೂಡಲು

ಕಾದಿವೆ ನಿನ್ನ.. !

ಈ ಬಿಳಿಯ ಹಾಳೆಗಳಲಿ..!

09/10/2014

ಚಿತ್ರ ಕವಿತೆ

ಮಳೆ ಮತ್ತು ಸಿಡಿಲು

ಮಳೆ ಮುಗಿಲು ಇಳೆ ಕೆದರಿ

ಮಿಂಚು ಗುಡುಗಿ, ತೊರೆಯುಕ್ಕಿ

ಅಲ್ಲೋಲ್ಲ ಕಲ್ಲೋಲವೀ ಸಮಯ

ಭಾವವೆಲ್ಲಾ ಚದುರಿ ಚಿತ್ತಾರ

ನಿಶೆಯ ನಶೆಯಲಿ ಕಾಣದೊಂದೂ ಬಣ್ಣ

ಅಂತರಂಗದ ಚದುರಂಗ

ಬರೀ ಕಪ್ಪು-ಬಿಳುಪು

ಬಣ್ಣ ತುಂಬಿಕೊಳ್ಳುವ ಕಣ್ಣಿಗೆ

ಕಪ್ಹಿಡಿದು ಬೆಳಕು ಕಾಣದಯ್ಯ!

-DA

08/10/2014

ನೀ ಬರುವ ಹೊತ್ತಾದರೂ
ಇಲ್ಲೇಕೋ ಇನ್ನೂ ಮೌನ
ಮೋಡ ಕವಿದ ನನ್ನೂರು
ಮಳೆಗಾಗಿ ನಿನ್ನ ನೆನಪು!

09/10/2014

ಪ್ರಶ್ನಿಸುವುದಾದರೆ ಪ್ರಶ್ನಿಸು
ನನ್ನೀ ಏಕಾಂತ;
ತಿಳಿಯುವುದು ಆಗ
ನಿನ್ನ ವಿರಹ!

&&&

ತುಸು ಸಮಯ ನೀಡು ನೀ ನನಗೆ
ಹುಣ್ಣಿಮೆ ಚಂದ್ರನ ಸಿಂಗರಿಸಿರುವೆ
ಜೊತೆಗಷ್ಟು ನನ್ನದೂ ಶೃಂಗಾರ ಬಾಕಿಯಿದೆ
ಒಟ್ಟಿಗೆ ಮೀಯೊಣ ಬೆಳದಿಂಗಳ ಹಾಲ್ಗಡಲಲಿ
ಸೂರ್ಯನ ಬಚ್ಚಿಟ್ಟು ಚಂದಿರನಲಿ!

&&&

ನಡೆವ ದಾರಿಗೆ ಎದುರಾದ ಮುಳ್ಳುಗಳನ್ನು
ನಯವಾಗಿ ಬಿಡಿಸಿ ಪಕ್ಕಕ್ಕೆ ಸರಿಸಿ ನಡೆದಿದ್ದೆ,,
ತಪ್ಪಾಯಿತು,,!
ಹಿಂದೊಮ್ಮೆ ತಿರುಗಿ ನೋಡಿದ ಕಾರಣ
ನೇರೆ ಎದೆಗೆ ಬಂದು ನಾಟಿದವು,,
ನೋವಿದ್ದೂ ಚೀರಲಾರೆ,,!

07/10/2014

''ಬೆಟ್ಟದ ದನಿ'',,

'ದೂರದ ಬೆಟ್ಟ ನುಣ್ಣಗೆ',
ಎಂದು ಅವರೆಲ್ಲಾ ನನ್ನ ನೋಡಿ ಹೇಳುವರು
ನಾನಿಂದು ಬೆಟ್ಟವಾಗಿ ಒರಟಾದದ್ದೇ ಅವರಿಂದ
ಅವರ ಮೊನಚು ಮಾತುಗಳಿಗೆ ಕತ್ತರಿಸಿದ ಕಿವಿಯಾಗಿ
ಗೋರ್ಕಲ್ಲ ರಾಶಿಯಾಗಿ, ಮೊಳೆ ಮುಳ್ಳುಗಳ ಆಗರವಾಗಿ
ನಾಲಿಗೆ ಇಲ್ಲದ ಬಾಯ್ಬಿಟ್ಟ ಬಿರುಕಾಗಿ, ಕಣ್ಣಿಲ್ಲದ ಶಿಲೆಯಾಗಿ
ಹೌದು ನಾ ಕಗ್ಗಲ್ಗಳ ಬೆಟ್ಟವೇ, ದೂರವಿರಿ ನೀವು ನುಣ್ಣಗೆ,,!

&&&

ಖುಷಿಗಳಿಗಿರುವಷ್ಟು ಕಾರಣಗಳು
ದುಃಖಕ್ಕೆ ಇಲ್ಲ ಬಿಡು ಗೆಳೆಯ,,
ಅನುಮಾನ, ಅವಮಾನ, ಬಿಗುಮಾನ
ಇಲ್ಲವೇ ಸುಮ್ಮನಷ್ಟು ಕಳೆದೆವು ಎನ್ನೋ ಭಾವ!
ಖುಷಿಗೋ,, ನಿಂತರೂ ಕೂತರೂ ನಡೆದು ಬಿದ್ದರೂ ಹಾಸ್ಯ ಕಾರಣ
ಒಳಗೊಂದು ಮನಸ್ಸು ಮಗುವಿನಂತಿರಲು
ಮುದ್ದು ಮುದ್ದಾಗಿ ತಪ್ಪು ಮಾಡಿ ನಕ್ಕುಬಿಡಲು!

&&&

ಸಧ್ಯ ಭಾವನೆಗಳಿಗೆ
ಮದುವೆ ಇಲ್ಲ;
ಹಾಗೆಯೇ ವಿಚ್ಛೇದನ,,! 

&&&

ಎನ್ನಂಗಳದೊಳು ನಾನಿಟ್ಟರೆ ರಂಗವಲ್ಲಿ
ಅವನೊಬ್ಬ ಕುಮಾರ ಇಡುತಾನೆ ಪ್ರೀತಿ ಬಳ್ಳಿ
ನನ್ನ ಮನೆಯ ಕಿಟಕಿಯಲಿ!!

06/10/2014

ಚಿತ್ರ

04/10/2014

ಚಿತ್ರ

01/10/2014

ಮನದ ಮಾತು

Life is beautiful  :-)

ಎಲ್ಲೋ ಲೀನವಾಗಿ ಹೋಗಬೇಕಿದ್ದ ನೀರ ಹನಿಯೊಂದು ಇನ್ನೂ ಗಾಳಿಯಲ್ಲಿಯೇ ತೇಲಾಡುತ್ತಿರುವ ಹಾಗೆ,, ನದಿಯ ಹರಿವ 

ಸೆಳವಿಗೆ ನಿಲುಕದೆ ದಡದಲ್ಲೆ ಉಳಿದ ಮಣ್ಣ ಕಣದ ಹಾಗೆ ಉಳಿದುಬಿಟ್ಟಿರುವಂತೆ ಅನಿಸುವುದು ನಾನು ಈ ಜೀವನಕೆ. ಹೌದು 

ನಾನಿನ್ನೂ ಈ ಜೀವನದ ಆಳಕ್ಕೆ ಇಳಿಯಲೇ ಇಲ್ಲ, ಇನ್ನೂ ಪ್ರಾರಂಭದಲ್ಲೇ ಇದ್ದೇನೆ ಎಂದು ಬಹಳಷ್ಟು ಬಾರಿ ನನಗನಿಸುವುದು. 

ಈಗೀಗ ಹೆಚ್ಚೇ ಎನ್ನಬಹುದು. ನನಗೇಕೋ ಗುರಿಗಳು ಇಲ್ಲ. ಸಾಧು ಸಂತರಂತೆ ನಡೆಯೋ ಹೊಸ ವ್ಯಾಮೋಹ!. ದೂಷಿಸಿದ 

ದೂರಿದ, ಕಷ್ಟ ಕೊಟ್ಟ ನೋವನಿಟ್ಟ ಎಲ್ಲರನ್ನೂ ಕ್ಷಮಿಸಿಬಿಡಲು ಮೊದಲು. ಖುಷಿಯೆನಿಸಿದರೂ ನನಗೇನು ಬೇಕು ಎಂಬುವುದೇ 

ಒಮ್ಮೊಮ್ಮೆ ತಿಳಿಯಲೊಲ್ಲದು. ಎಲ್ಲಿ ವೈಯಾಗ್ಯ ಮೂಡಿಬಿಡುವುದೋ ಎಂಬ ಆತಂಕವೂ ಸಹ. ಆದರೂ ಆಗಾಗ ನಾ ಕಲ್ಪಿಸೊ 

ಕವನಗಳು ನನ್ನೊಳ ಶೃಂಗಾರವನ್ನು ಪ್ರದರ್ಶಿಸಿ ನಾಚಿಸುತ್ತವೆ. ಹೀಗೆ ನಾನು ಎಂಬ ನಾನು ಎಷ್ಟೇಲ್ಲಾ ಗೊಂದಲಗಳ ನಡುವೆ 

ಇನ್ನೂ ತೊರೆಯುಕ್ಕೊ ಜೀವನಕೆ ಹೊಂದಿಕೊಳ್ಳಲು ಸೆಣೆಸಾಡುತ್ತಲೇ ಇದ್ದೇನೆ. ಆಸೆಗಳು ಎಂಬ ಮಾಯಾಲೋಕ ಒಮ್ಮೆ 

ಬಾನೆತ್ತರಕ್ಕೆ ಹಾರಲುಬಿಟ್ಟರೆ, ಕೈಸುಟ್ಟ ಅನುಭವಗಳು ಕನಸುಗಳನ್ನು ರಪ್ಪನೆ ನೆಲಕಚ್ಚಿಸಿಬಿಡುತ್ತದೆ. ಕಣ್ಣೀರಿಗೆ ನಾನೀಗ 

ಹೆದರದ ಬಂಟ!!. ಕಣ್ಣೀರು; ನೋಡುವ ಮನವ ಕರಗಿಸಬಹುದಷ್ಟೇ,, ನಮ್ಮ ಸಾಂತ್ವನವಲ್ಲ, ನಮ್ಮ ಪರಿಹಾರವೂ ಅಲ್ಲ,,!. 

ಮೊದಲಾಗಿ ಕನಿಕರಕ್ಕೆ ಬೆಚ್ಚಿಬೀಳೋ ನಾನು ಎಂದಿಗೂ ಜಂಭದ ಹುಡುಗಿಯೇ,, 

ಕಣ್ಣ ಮುಂದಿನ ಅಸ್ಪಷ್ಟ ದಿಕ್ಕುಗಳು, ಅರೆ ಬರೆ ಅನುಭವಗಳು, ಕೈಹಿಡಿದು ನಡೆಸೋ ಹಿರಿತನದ ಕೊರತೆ, ಅನಿಸಿದ್ದು ಸರಿಯೋ 

ತಪ್ಪೋ ಎಂದಷ್ಟೇ ಆ ಕಾಲದ ನನ್ನ ತರ್ಕ,, ಓದಿ ಕಲಿತ, ಗುರು-ಹಿರಿಯರು ಹೇಳಿದ ಮಾತುಗಳಷ್ಟೇ ಒಮ್ಮೊಮ್ಮೆ ನನ್ನ 

ಅನಿವಾರ್ಯ ದಾರಿಗಳು,,! ತಪ್ಪೆನ್ನಲು ನನ್ನಲ್ಲಿ ಆ ಹಂತದ ಅನುಭವಗಳಿಲ್ಲ,, !! ಹೀಗೂ ಇರಬಹುದೇ ಒಂದು ಮನಸ್ಸು 

ಎಂಬಂತೆ ನಾನು ನನ್ನ ನೋಡಿಯೇ ನನಗೊಂದು ಸೋಜಿಗ! 

ಸುಮ್ಮನೆ ಅಲೆಯುತ್ತಿದ್ದೆ ಮನಸ್ಸು ನೊಂದರೆ ಆಗ ಕಾಣದ ದಾರಿಗಳಲ್ಲಿ. ಒಂದಷ್ಟು ನಿರಾಳವನಿಸುವವರೆಗೂ ಕಾಲ ನಡಿಗೆ. 

ಈಗ 

ಸಮಯದ ಅಭಾವದ ಕಾರಣ ಮನಸ್ಸು ಮಾತ್ರ ಅಲೆಯುತ್ತದೆ. ಕಂಡು ತಿಳಿಯದ ವಿಚಾರಗಳ ಸುತ್ತ. ದಿನವೂ ಎರೆಡೆರಡು 

ಗಂಟೆಗಳ ನನ್ನ ಕರ್ತವ್ಯದ ಪ್ರಯಾಣವು ಆರೋಗ್ಯದ ಮೇಲೆ ಪ್ರಭಾವ ಬೀರಿದ್ದರೂ ಮನಸ್ಸಿಗೆ ನಾ ಕೊಡುವ ಒಂದು 

ಸಮಯವಾಗಿದೆ. ಬಸ್ಸಿನಲ್ಲಿ ಒಂದು ಕಿಟಕಿಯ ಪಕ್ಕದ ಸೀಟು ಸಿಕ್ಕರಷ್ಟೆ ಸ್ವರ್ಗ ಸಿಕ್ಕ ಅನುಭವ!. ಹಾಡುಗಳನ್ನು ಕೇಳುವ 

ಅಭ್ಯಾಸ,, ಜೊತೆಗೆ ದಿನದಲ್ಲಿ ನಾ ಸಮಯವಿಲ್ಲವೆಂದು ಬದಿಗೊತ್ತಿದ್ದ ಚಿಂತನೆಗಳಿಗೆಲ್ಲಾ ಒಂದು ವೇದಿಕೆ. ನಾನು ನನ್ನ ನಾಟಕ 

ರಂಗಭೂಮಿಯೊಳಗೆ. ಗತಿಸಿದ ಸುಖ-ದುಃಖಗಳು ಅದೊರೊಳ ನನ್ನಯ ಸರಿ-ತಪ್ಪುಗಳ ಅವಲೋಕನ, ಸಮಸ್ಯೆಗಳ 

ಪರಿಹಾರ, ಕಾಡೋ ಸಾಲುಗಳು, ನನ್ನೆಡೆಗಿನ ಅವರುಗಳು ಎಂಬ 'ಅವರ' ಮಾತುಗಳು, ನನ್ನ ಪರಿಧಿಯೊಳು ನನ್ನ ನಿಲುವು 

ಮತ್ತು ಅದರ ಸರಿ ತಪ್ಪುಗಳು,, ಹೀಗೆಯೇ,, ನನ್ನ ಬಸ್ ಪ್ರಯಾಣ ನನಗೊಂದು ವರದಾನ. ಹಾಗೆಯೇ ಕಲ್ಪಿಸೊ ಮನಕಷ್ಟು 

ಸನ್ನಿವೇಶ ಸಂಭಾಷಣೆಯ ಕಸರತ್ತು,, ಇದು ತುಂಬಾ ಖುಷಿ ಕೊಡುತ್ತದೆ. ಕೆಲ ಸಮಯದ ನನ್ನ ಕಲ್ಪನೆಗಳಿಗೆ ನನಗೇ 

ಸಿಕ್ಕಾಪಟ್ಟೆ ನಗು ಬಂದು ''ಅಯ್ಯೋ ಇದು ಬಸ್ಸು!!!'' ಎಂದು ನೆನಪಾಗಿ ಸುಮ್ಮಾನಾಗುವುದಿದೆ. ಆಗೆಲ್ಲಾ ,, ''Life is 

beautiful" ಎನ್ನೊ ಉದ್ಗಾರ ನನ್ನೊಳಗೆ. ಜೀವನವೆಂದರೆ ಏನೇನೋ ಆಗಿಬಿಡುವುದಲ್ಲ; ಜೀವನವೆಂದರೆ ನಾವು 

ನಾವಾಗಿರುವುದು. ಕಪಟವಿಲ್ಲದೆ, ವಂಚನೆಯಿಲ್ಲದೆ!. ಒಂದಷ್ಟು ನಗುವ ಕಂಡು, ನಮ್ಮೊಡನಿರುವ ಮನಕಷ್ಟು ನಗುವ 

ತುಂಬಿಬಿಡುವುದೇ ಜೀವನ! ,, ಎಂದೆಲ್ಲಾ ಬಡಬಡಾಯಿಸಿಕೊಂಡು ಬಸ್ಗಳನ್ನು ಬದಲಿಸಿಕೊಂಡು ಮನೆಗೆ ಬಂದುಬಿಡುವ 

ಮನಸ್ಸು,, ಕಲ್ಪನೆಗಳಿಂದ ವಾಸ್ತವಕ್ಕೆ ಬಂದಿಳಿಯುತ್ತದೆ.

ಬದುಕು ಎನೆಲ್ಲಾ ಕಲಿಸುತ್ತದೆ! ಎಂಬುದೊಂದು ಸದಾ ಕಾಡೋ ಒಂದು ಸೋಜಿಗ. ಮೌನವನ್ನು, ಮಾತನ್ನು, ಮರೆವನ್ನು, 

ಪ್ರೀತಿಯನ್ನು, ತಪ್ಪನ್ನು, ಗೆಲುವನ್ನು, ಹೀಗೆ,, ಆಗಾಗ ಹೀಗೊಂದು ವಿಚಾರ; ಹುಟ್ಟಿದ ಎಲ್ಲಾ ಜೀವಿಗಳೂ ಜೀವಿಸುತ್ತವೆ, ಕೆಲವು 

ಮಾತ್ರ ಬದುಕುತ್ತವೆ. ಕೆಲವು ಅಳಿದ ಮೇಲೂ ಉಳಿದುಕೊಂಡಿರುತ್ತವೆ. ಈ ಮೂರು ಹಂತಗಳಲ್ಲಿ ''ನಾನು ಎಲ್ಲಿ?'' ಎಂದು 

ನನ್ನೇ ನಾ ಕಾಡಿಕೊಳ್ಳುವುದಿದೆ. ಮೊದಮೊದಲು ಜೀವಿಸಿದರೆ ಸಾಕು ಎನ್ನುವುದಾದರೆ ನಾ ಹೇಳುವುದು,, ''ಆತ್ಮಹತ್ಯೆಯ 

ಮೊರೆ ಹೋಗೋ ಮನಸ್ಸುಗಳಿಗೆ. ಇನ್ನು ಜೀವಿಸಿದ್ದೆ ಆದಲ್ಲಿ ನಾಲ್ಕು ಜನ ಒಪ್ಪೋ ಹಾಗೆ,, ಇಲ್ಲ ತನಗೆ ತಾನು ಸರಿ ಎನಿಸೋ 

ಹಾಗೆ,, ಜನರೊಟ್ಟಿಗೆ ಪ್ರೀತಿ-ವಿಶ್ವಾಸಗಳೊಂದಿಗೆ ಬದುಕುವುದು. ಈ ಎರಡೂ ಹಂತಗಳು ವಿಕೃತಿಗಳಿಂದ ಹೊರತುಪಟ್ಟಿದ್ದೇ 

ಆದಲ್ಲಿ ಜೀವಿಯು ಅಳಿದು ಉಳಿದುಕೊಳ್ಳಬಹುದು. ಎಂಬುದು ನಾನೆ ಕಂಡುಕೊಂಡ ನನ್ನ ಹೊಸ ಚಿಂತನೆಗಳು.

Life is all about hugs and kisses!!

ಇದು ಬಹಳಷ್ಟು ಬಾರಿ ನಾ ಹೇಳಿಕೊಳ್ಳೋ ಒಂದು ಸೂಕ್ತಿ,, ವಾಸ್ತವದಲ್ಲಿ, ''ಲವ್ ಇಸ್ ಆಲ್ ಎಬೌಟ್ ಹಗ್ಸ್ ಅಂಡ್ ಕಿಸ್ಸೆಸ್'' 

ಎಂಬ ಮಾತಿದೆ. ಹಿಂದೆ ನನಗೊಬ್ಬ ಆರ್ಟಿಸ್ಟ್ ಆಂಕಲ್ (  ) ಪ್ರಪೋಸ್ ಮಾಡುವ ಸಮಯದಲ್ಲಿ ಹೇಳಿದ್ದರು,, ನನಗೆ ಇಂಗ್ಲೀಷ್ 

ಅಷ್ಟು ಚೆನ್ನಾಗಿ ಬರುವುದಿಲ್ಲ ಎಂದಿದ್ದೆ. ಇನ್ನೇನ್ ಮಾಡೋದು ಹೇಗಾದ್ರೂ ಕಳೆಚಿಕೊಳ್ಳಬೇಕಿತ್ತಲ್ಲ,,  ಸರಿ ನನ್ನ ನಮಸ್ಸನ್ನು 

ಅರಿತಂತೆ ಹಾರೈಸಿ 'ಒಳ್ಳೆ ಹುಡುಗ ಸಿಗಲಿ ನಿಮಗೆ' ಎಂದು ಹೇಳಿದ್ದರು. ಅವರು ಹೇಳಿದ'' Love is all about hugs and 

kisses'' ಎಂಬ ಮಾತು ಒಂದು ಆಶ್ಚರ್ಯವಂತೆ ಆಗ ಅನಿಸಿದ್ದರೂ ನಂತರದ ದಿನಗಳಲ್ಲಿ ನಾನದನ್ನು ''ಲೈಫ್'' ಅಂತ 

ಮಾಡಿಕೊಂಡೆ. ''Life is all about hugs and kisses!!!!''. ಜೀವನವೆಂಬುದು ಅಪ್ಪಿಕೊಳ್ಳುವುದು ಮತ್ತು 

ಮುತ್ತಿಡುವುದು.. ಎಂದು ಕನ್ನಡದಲ್ಲಿ ಹೇಳುವುದಾದರೆ.. ಇದಕ್ಕೆ ನನ್ನ ಅರ್ಥ ಹೀಗಿದೆ; ಜೀವನದಲ್ಲಿ ಬರುವ ಸೋಲು-

ಗೆಲುವುಗಳನ್ನು ಪ್ರೀತಿಯಿಂದಲೇ ಅಪ್ಪಿಕೊಳ್ಳುವುದು.. ಹೆದರಿ ಓದುವುದು ಬೇಡ. ಹಾಗೆಯೇ ಆಸೆ- ಆಕಾಂಕ್ಷೆಗಳನ್ನು ಕೈಚಾಚಿ 

ಪಡೆದು ಮುತ್ತಿಟ್ಟುಕೊಳ್ಳುವುದು. ಎಂದರೆ ಆಕಾಂಕ್ಷೆಗಳನ್ನು ಆ ಮಟ್ಟಕ್ಕೆ ನಾವು ಪ್ರೀತಿಸುವುದು. ನಾವು ನೋಡುವ ಹಾಗೆ, 

ರಾಷ್ಟ್ರೀಯ- ಅಂತರಾಷ್ಟ್ರೀಯ ಕ್ರೀಡಾ ಸ್ಪರ್ಧೆಗಳಲ್ಲಿ ವಿಜೇತರಾದ ಪಟುಗಳು ತಮ್ಮ ಪುರಸ್ಕಾರವನ್ನು ಮುತ್ತಿಟ್ಟುಕೊಳ್ಳುವಂತೆ 



ನಾವು ನಮ್ಮ ಬದುಕಿನ ಸೋಲನ್ನು ಒಪ್ಪಿ, ಅಪ್ಪಿಕೊಂಡ ಮೇಲೂ ಆಕಾಂಕ್ಷೆಗಳನ್ನೂ ಮುತ್ತಬೇಕು!.

ಬದುಕು ಏನೆಲ್ಲಾ ಕಲಿಸುತ್ತದೆ?!,, ಜಿಗಿಯುವುದು,, ಬೀಳುವುದು, ಏಳುವುದು,, ಮತ್ತೂ ಜಿಗಿಯುವುದು,, 

ಇಷ್ಟೇಲ್ಲಾ ಚಿಂತನೆಗಳಲ್ಲಿ ನನಗೆ ''ನಾನು ಎಲ್ಲೋ ಉಳಿದ ಮಣ್ಣ ಕಣ ಈ ಜೀವನ ಯಾತ್ರೆಯಲಿ'' ಎಂದು ತುಂಬಾ 

ಕಾಡುತ್ತದೆ,,,,,, 

೦೬/೧೦/೨೦೧೪

ಮಾಟ ಮಾಡಿಸಿ, ಸಂಮೋಹನಗೊಳಿಸಿ
ಒಲಿಸಿಕೊಂಡೆಯೋ ನೀ ನನ್ನ,
ಹಗಲು ರಾತ್ರಿ, ಎಚ್ಚರ ನಿದಿರೆಯಲೂ
ಕಣ್ಣ ಮುಂದೆ ನಿನ್ನದೇ ಚಿತ್ರ,
ನಂಬದಿರೆ ಹೋಗು, ಅಂಜನ ಹಾಕಿಸಿ ನೋಡು!

(ಮೂಢನಂಬಿಕೆ ಆರೋಗ್ಯಕ್ಕೆ ಹಾನಿಕಾರಕ  )

04/10/2014

&&&

ಅವನಿಲ್ಲದ ಹೊತ್ತೇ
ಅವನೆಡೆಗೆ ಮತ್ತೂ ಮಿಡಿವಂತೆ 
ಅವನಿದ್ದರೆ ಹತ್ತಿರ
ದೂರಿ ದೂರ ತಳ್ಳೋ
ಏನೋ ವೈಯ್ಯಾರ
ನಿಜವೇನೆಂದೂ ನಾನಿನ್ನೂ ತಿಳಿಯೆ
ಭಾವಕೆ ಬೇಕಿರುವುದು ಪ್ರೇಮವೋ ವಿರಹವೋ!

&&&

ಕಲ್ಪನೆಯಲ್ಲೇ ನಿನ್ನ ಕಂಡು ಭೇಟಿಯಾಗಿ ಪ್ರೇಮಿಸಿ
ಕಲ್ಪನೆಗಳೇ ಹಬ್ಬವಾಗಿ ಹಗಲುಗನಸು ನೀನಾಗಿ
ಎರಡು ದಿನದ ಈ ಬದುಕು, ಸುಮ್ಮನಷ್ಟು ಕಲಬೆರಕೆ ಪ್ರತಿಷ್ಠೆಗಳು
ಎಲ್ಲಾ ಬಿಟ್ಟು ಇದ್ದುಬಿಡುವೆ ನಿನ್ನೊಂದಿಗೆ ಕೈಹಿಡಿದು
ಬಿಟ್ಟುಕೊಡುವೆಯಾ ನಿನ್ನ ಕಣ್ಣಗಲ ಕನಸುಗಳ
ತುಂಬಿಬಿಡುವ ಕಾತುರ ಎನ್ನೊಳಗೆ
ಹೇಳಿಬಿಡು ನೀನಿಂದು
ಗೆಳೆಯನಂತಾ
ಓ ನನ್ನ ಕನಸೇ!

03/10/2014

ಕವನ

ನನ್ನ ಹೆಂಡತಿ,, 

ಹೆಂಡತಿ ತಲೆಗೆ ಹರಳೆಣ್ಣೆಯನ್ನು ಉಜ್ಜುತ್ತಿದ್ದಾಳೆ,,
ಮದುವೆಯ ಹೊಸ ದಿನಗಳ ನೆನಪು
ಆಗೆಲ್ಲಾ ಅವಳು ನಾಚಿ ನೀರಾಗಿ ನನಗೆ ನೀರೆರೆಯುತ್ತಿದ್ದಳು
ನನಗೋ ಗಂಡನೆಂಬ ಅಹಂ, ''ಬಿಸಿ ನೀರು ಹಾಕೇ'', ''ತಣ್ಣೀರು ಸಾಕೇ"
''ಸೀಗೆ ಬೇಡವೇ, ಬೆನ್ನು ಸರಿಯಾಗಿ ಉಜ್ಜು'',
,,,,, ಅವುಗಳೆಲ್ಲವೀಗ ನನ್ನ ಸುಂದರ ಗತ,,
ಈಗ ನಾ ತುಂಬಾ ಜಾಣ,,
ಹದವಾದ ನೀರಿಡುವೆ, ಹರಳಣ್ಣೆಯನೂ ತಲೆಗಿಡುವೆ,,
ಕಣ್ಣಿಗೆ ಸೀಗೆ ಬೀಳಬಾರದೆಂದು ಶಾಂಪೂ ತಂದಿರುವೆ,,
ಇಷ್ಟೇಲ್ಲಾ ನನ್ನ ಆಸ್ತೆಗೆ ಇಂದು ಮರುಗಿ
ಆ ದಿನಗಳ ನೆನಪು ತಂದಿದ್ದಾಳೆ,,
ತಲೆಗೆ ಹರಳೆಣ್ಣೆ ಉಜ್ಜುತ್ತಿದ್ದಾಳೆ,,
ಅದೇನೋ ಅಸ್ಪಷ್ಟ ಗೊಣಗಾಟದಲಿ,, ನನ್ನ ಹೆಂಡತಿ,,

02/10/2014

ಹುಟ್ಟು ನಗು ಮುಖದರಸಿ ಅವಳು
ಅತ್ತಾಳಾದರೂ ಕಣ್ಣೀರ ಕಾಣೆ ಅವಳೆದೆಯೊಳು
ಸುತ್ತಲ ಗಾಳಿ ಎಲ್ಲಿ ಕರಗುವುದೋ ಎಂಬಂತೆ
ಸದಾ ಸುಖಿ ಈ ಚಂದ್ರಮುಖಿ
ಕಣ್ ಕವಡೆ ಮಿಟುಕದ ಅದಮ್ಯ ಚೇತನ ಸಿರಿ
ನಗುತಾ ನಗಿಸುತಲಿರುವ ಅವಳು ಎನ್ನೆದೆಯ ''ಕಾವ್ಯ''

&&&

ನಲಿವಿದ್ದಾಗಲೂ ನೋವ ಮರೆಯದ ಮನ!

&&&

ಬರೆದು ಅಳಿಸಿದ್ದೇ ಹೆಚ್ಚು
ಮನಸ್ಸು ಬರಿದಾಗಿ!

02/10/2014

&&&

ವಿದಾಯವ ನಾನೆಂದೂ ಹೇಳಲೇ ಇಲ್ಲ
ನೀನೆ ರಭಸದಿ ನಡೆದಿರುವೆ
ಅಡಿಯಿಡಲಾರದ ನನ್ನನು
ಏನೆಂದು ಒಂದು ಮಾತೂ ಕೇಳದೆ,

ಮೌನದಿ ಬಿಕ್ಕಿದೆ ಮನವು,,
ಮುನ್ನ ದಾರಿ ಕಾಣದೆ,,,
ಒಂಟಿ ಹೆಜ್ಜೆಗಳನ್ನೂರುತ,,
ಕನಸುಗಳ ಕೋಟೆಯೊಡೆಯುತ,,

&&&

ಬೆನ್ನು ಹಾಕಿ ಹೋದವನ
ಬೆನ್ನ ಮೇಲೆ 
ನನ್ನ ಸಾವಿರ ಕವಿತೆಗಳು
ಅವನೆಂದೂ ಓದಲಾರ!

&&&

ಮನಸ್ಸು ಮಾತನಾಡದ 
ಈ ಹೊತ್ತು
ಚಂದ್ರನಲ್ಲಿ ನಿದಿರೆಗೆ,
ಕನಸು ಖಾಲಿ ಖಾಲಿ
ನನಗೋ ಈ ಪದಗಳ ಖಯಾಲಿ! 
 01/10/2014

&&&

ಪಡೆಯದೇ ಕಳೆದುಕೊಳ್ಳುವುದು
ಒಂದು ಹೇಳಲಾರದ ಸಂಕಟ!

30/09/2014