ಚಿತ್ರಗಳು

26/09/2014

ಚಿತ್ರಗಳು

24/09/2014

ಒಂದೇ ಸಮನೆ ಮಳೆಯಲಿ
ತೊಯ್ದ ಇಳೆ
ಅಲ್ಲೆಲ್ಲೋ
ಹಕ್ಕಿಗಳ ಚೀವ್ ಚೀವ್
ನಿಂತ ಮಳೆಗೆ ಗುಡುಗು ಹಿಮ್ಮೇಳ
ಕಾವಿಟ್ಟ ಹಬೆ
ರಸ ನಿಮಿಷವೀ ಘಳಿಗೆ
ಸ್ವರ್ಗಕ್ಕೇ ಕಿಚ್ಚು ಹೊತ್ತಿಸೊ
ಕಾವ್ಯ ಹುಟ್ಟೊ ಸಮಯ,,,,,,
ಕೆಹು ಕೆಹು......
ಛೇ,,,
ಈ ಹಾಳಾದ ಕೆಮ್ಮು
ಧರಗಿಳಿಸಿ ಬಿಸಿ ನೀರ ಕುಡಿಸಿದೆ...

24/09/2014
^^^^^^^^^^^^^^^^^^^

ಕೆಮ್ಮಿರಲಿ ಜ್ವರವಿರಲಿ
ಜೊತೆಯಲಿ ನೀನೆಂಬ
ನಾಮವಿರಲಿ ಸಾಕೆನಗೆ;
ಜ್ವರದಲೂ ಕನವರಿಸುವೆ ನಿನ್ನೊಲವ,
ಕೆಮ್ಮಿನಲೂ ಕಲ್ಪಿಸಿರುವೆ
ಕೈಹಿಡಿದು ರಮಿಸುವ ನಿನ್ನ,,
ನೀನು ಎನ್ನುವ ಕಲ್ಪನೆಯೇ ಚೆಂದ
ನೀನು,,,
ನೀನು,,,
ಎನ್ನ ಕಣ್ಣೋಳ ಮೀನು!

23/09/2014

^^^^^^^^^^^^^^^^^^^^^^^^^^^^

ಗೆಳೆಯನಾಗದ ಗೆಳೆಯ,,
ಅವನೊಮ್ಮೆ ನಿಟ್ಟುಸಿರನಿಡಲು
ಒಳಗೊಳಗೇ ಬೇಯ್ವ ಹೃದಯ
ಬದುಕ್ಕಿದ್ದಾದರೂ ಏಕೊ
ಆಯುಷ್ಯವಿದೆ ಎಂಬ ಕಾರಣಕೊ
ನಿರ್ಲಿಪ್ತವಾದ ಭಾವಗಳ ಕೊಲ್ಲಲೊ
ಕೊನೆಗೂ ಜೀವಿಸಿ ಸಾಧಿಸುವುದಾದರೂ ಏನನೊ
ಗೆಳೆಯನಾಗದ ಗೆಳೆಯನ ನೆನಪುಗಳಿಗೆ ಸಾಕ್ಷಿಯಾಗಲೋ,,,,,

^^^^^^^^^^^^^^^^^^^

ಮಳೆಯ ಹೊಡೆತಕೆ
ಕನಸು ಸಡಿಲ, ಎಚ್ಚೆತ್ತ ನಿದಿರೆ
ಇದಕೆ ಯಾರೂ ಹೊರತಲ್ಲ
ಮನಸು ತುಂಬಿದವರು
ತುಂಬಿಕೊಳ್ಳೊ ಕಾತುರದವರು

23/09/2014

^^^^^^^^^^^^^^^^^

ಬೆರೆಯದೆ
ಬೆಸೆದುಕೊಳ್ಳುವುದಾದರೂ ಹೇಗೆ
ಹೇಳೇ ಪ್ರೀತಿ?!

22/09/2014

ಚಿತ್ರಗಳು

21/09/2014

ಚಿತ್ರಗಳು

14/09/2014

ಚಿತ್ರಗಳು

07/09/2014

ಕವನ

ಎನ್ನ ನಂಬಿ,,,



ಎನ್ನ ನಂಬಿ''
ಎನ್ನುವುದು ಎಷ್ಟು ಕಷ್ಟವೋ!!
ಅವರಿವರು ಕೆಸರು ಕದ್ದಾರು,
ಎನ್ನ ಗದ್ದೆಯಲ್ಲೀಗ ಪೈರಿಲ್ಲ
ಅವರೆಲ್ಲಾ ದನಗಳ ಬಿಟ್ಟಾರು
ಪೈರಿಲ್ಲದ ಗದ್ದೆಯೆಲ್ಲಾ ದನದ ಹೆಜ್ಜೆ,
ಎನ್ನ ನಂಬಿ,,
ಕಾಲುವೆಯ ನೀರು ತಿರುಗಿಸ್ಯಾರು
ಅವರಿವರ ಹೊಲ-ಗದ್ದೆಗಳಿಗೆ,
ಎನ್ನ ಶ್ರಮಕ್ಕೆಲ್ಲಾ ಅವರ ಹೊಲ ಹಸನು
ನಂಬಿ ನನ್ನ,
ನಾ ಬೆಳೆದ ಫಲ ಎನಗಿಲ್ಲ,,
ಕದ್ದರು ಒಯ್ದರು ಬೆಳೆದಂತೆ ಅವರೇ,,
ಈಗೀಗ ನಾ ಬೆಳೆಬಾರದೆಂದು ರಾತ್ರೋ ರಾತ್ರಿ
ಕದ್ದಾರೋ ಆ ಸೂರ್ಯನ,
ನಾ ಹೇಗೆ ಬೆಳೆಯಲಿ ಎನ್ನ ಗದ್ದೆಯಲಿ ಏನನ್ನಾದರೂ
ನಂಬಿ ಎನ್ನ,
ಎನ್ನುವುದು ಎಷ್ಟು ಕಷ್ಟವೋ
ಅವನ ಸೂರ್ಯನ್ನನ್ನೇ ಅವರಿವರು ಕದ್ದರು
ಕತ್ತಲ ತುಂಬಿಸಿಹರಂತೆ
ಅವನ ಗದ್ದೆಯೊಳು ಬಿತ್ತಿ ಬೆಳೆಬೆಳೆವನೆಂದು
ಅವನ ಹೆಸರು ಹಾಳು ಮಾಡಿಹರು
ನಂಬಿ ಬಿಡೋಣ ಬಿಡಿ ನಾವು ನೀವು!!
ನಂಬಿ ಎನ್ನ,
ಎನ್ನುವುದು ಎಷ್ಟು ಕಷ್ಟವೋ?!!

21/09/2014

ನವಿಲು ಕುಣಿವುದು ಅದರಂತೆ
ನಮ್ಮ ನಿಮ್ಮ ಅಭಿಮಾನದಾಶಯವಿಲ್ಲದೆ
ಹಾಗೆಯೇ ಒಬ್ಬ ಸಜ್ಜನ ನಡೆವನು ಅವನಂತೆ
ತನ್ನ ಬಣ್ಣಿಸದೇ, ಅವರಿವರ ಜರಿಯದೇ

^^^^^^^^^^^^^^^^^^^^^^^^^^^^^

ಮನುಷ್ಯ ತನಗೆ ಬೆನ್ನೇ ಇಲ್ಲದಂತೆ
ಮುನ್ನೆಡೆದ ಹಿಂದಾಕಿದ ದಾರಿಗಳ ದೂರಿ
ತಾನು ಮಾಡಿದ್ದೇ ಸರಿಯೆಂದು ಘೋಷಿಸಿಕೊಂಡ
ತನ್ನ ಬೆನ್ನಿಗೆ ಕಣ್ಣೇ ಇಲ್ಲದಂತೆ,
ತನ್ನೇದುರಿನ ರೂಪವನ್ನೇ ಬಿಗಿದಪ್ಪಿದ
ಕನ್ನಡಿಯೊಳ ಮೋಹವನ್ನೇ ಮರೆಮಾಚಿ
ಕಟು ಸತ್ಯಗಳ ಕೊಲೆಗೈದ
ಸಾಕ್ಷಿಯಾಗೊ ತನ್ನ ಕಣ್ಣುಗಳೇ ಇಲ್ಲದಂತೆ!!

21/09/201

^^^^^^^^^^^^^^^^^^^^^

ಕೆಲವೊಮ್ಮೆ 'ಕಳೆದೇ ಬಿಟ್ಟೆವು'
ಎಂದೆನಿಸುವಾಗ
ಮತ್ತೊಮ್ಮೆ ಸಿಕ್ಕದ್ದೇ ಆದಲ್ಲಿ
ಅದುವೇ ಸ್ನೇಹ ವಿಶ್ವಾಸಗಳು
ಪ್ರಾಮಾಣಿಕ ಮನಗಳದು!

15/09/2014

ಬಿಟ್ಟು ನಡೆಯುವರೆಲ್ಲಾ ನಡೆದುಬಿಡಲಿ,
ಜೊತೆಯಿದ್ದು ಕಸಿವಿಸಿಕೊಳ್ಳುವುದು ಬೇಡ!

**********************

ಓಡಿದಷ್ಟೂ ಹಿಂಬಾಲಿಸೊ
ಸೋಲುಗಳು;
ಗೆಲುವುಗಳಿಗೇ
ನಾವು
ಅನಿವಾರ್ಯವಾಗಿಸಿಬಿಡುವವು!

***********************

ಗುಂಪಿನಿಂದ ಓಡಿದ್ದು
ಇನ್ನು ಸಾಕು,,
ಗುಂಪಿಗೊಂದು ಒಳ ಕೊಂಡಿಯಾದರೂ
ಆಗೋ ಆಲೋಚನೆಯಿದೆ,,
ಮನಸಿಗಷ್ಟು ಕಸರತ್ತು, ...
ಚಿಂತನೆ
ಅರಳೊ ಹೊಂಬಣ್ಣಗಳ ತುಂಬಿಕೊಳ್ಳ
ಹೊಸ ಹೊಸ ಕಾಮನೆಗಳು ಮೇಳೈಸಿ
ಮೆರೆದಿದೆ ಮತ್ತೆ ಮತ್ತೆ ಮನವು
ಹೊರಳಿ ಬೆಳಕಿನೆಡೆಗೆ,,,

13/09/2014

*********************************

ಬಾಳೊಂದು ಭಾವಗೀತೆ, ಭರವಸೆಯೆ ಪಲ್ಲವಿ,,,, :-)

************************

ಎನ್ನ ಕನ್ನಡಿ
ಎನಗೇ
ಸೊಗಸೆನಿಸಿದಾಗ
ಜಗದ ಮಸುಕೆಲ್ಲಾ
ಸಹ್ಯ!

10/09/2014
*******************************

ಪ್ರಜ್ವಲಿಸೊ ಬೆಂಕಿ ಒಳಗೊಳಗೇ ಸುಟ್ಟಿದ್ದು
ಅರಿವಾಗುವುದು ಬೆಳಕು ನಂದಿದ ನಂತರವೇ,,!!

07/09/2014
**********************

ಮೆಚ್ಚಲು
ಮನಸ್ಸಿರಬೇಕು
ಕಣ್ಣೆದುರಿಗಿನ
ಸೊಗಸಿಗಿಂತ!!
ಮೊಸರೊಳ ಕಲ್ಲಾಗ...
ಇದ್ದರೂ ಮಾಯ!!!

06/09/2014

ಗುರು,,


ಅಕ್ಷರಕೂ ಶಿಕ್ಷಕನಿಗೂ
ಅದೇನು ನಂಟೊ
ಒಂದಕ್ಷರವ ಕಲಿಸಿ
ಎರಡನೇಯದನ್ನು ನೀನೇ
ತಿದ್ದೆಂದ ಜೀವನವೂ
ಮಹಾ ಗುರುವೇ ಸರಿ,,

05/09/2014

'ವಿಚಿತ್ರ'ವೆಂದರೂ ಸರಿಯೆ
'ವಿಚಿತ್ರ'ದೊಳೊಂದು 'ಚಿತ್ರ'ವಿಹುದು
ಮುಂದೊಮ್ಮೆ ಚಿತ್ರವೆನಿಕೊಳ್ಳಲೂಬಹುದು
ವಿಚಿತ್ರವೂ ಹಲವು ತರತರ ಗೆರೆಗಳ ಹಾವಳಿಗೆ
ಬಣ್ಣಗಳು ತುಂಬಿ ಕಳೆಯುವ
ಲೆಕ್ಕಾಚಾರಗಳಿಗೆ,,

************************

ಅವರ ಗೆಲುವ ಸಹಿಸಲಾಗದವರು
ದೂರಿ ದೂರ ಸರಿಯುವರು
ಉದಯಿಸೊ ಸೂರ್ಯನೆದುರು
ರವರವ ಬೆಳಕ ದೊಡೆತಕೆ
ಕಣ್ಣು ತೆರೆಯದ ಅಸಹಾಯಕತೆಗೆ
ಬಿಸಿಲನೇ ದೂರಿ ಕಣ್ಣ ಮುಚ್ಚುವರು
ಕೈ ನೆರಳ ಆಸರೆ ಬಯಸಿ!

******************

ಆಸೆಗಳ ಮೀರುತ
ವೈರಾಗ್ಯ ಹತ್ತಿರಾಗಿ
ಬದುಕು ಮುಗಿವ ಮುನ್ನ
ಬದುಕಿಬಿಡುವ ಆಸೆಯು
ಭಗ್ನಗೊಂಡ ತಪ
ಮರುಭೂಮಿಯಿಂದ ಹೊರಟ
ಒಂದು ಪರಿಮಳ!

04/09/2014

ಕವನ

ಕನಸ ಬಲೆ,,,


ಕನಸ ಬಲೆಯ ಹೆಣೆಯುತ್ತಿದ್ದೆ
ಬಂಧಿಯಾಗುವ ಭಯವಾಗಿ
ನಡುವೆಯೇ ಕಣ್ಮರೆಯಾದ
ಈ ನಡುವೆ ಕನಸಿನ ಮಹಲು ನನ್ನದು
ರೂಪುಗೊಳ್ಳುತ್ತಿದೆ ಸುಂದರ
ಸಿಂಹಾಸನವೊಂದು ಖಾಲಿ
ಅದು ಅವನಿಗಾಗಿ ಕಾತರಿಸಲು,,
ಅವನಿಗಿನ್ನೂ ಭಯವಂತೆ
ಕಾರಣ
ಅವ ಬರುವ ಮುನ್ನ, ಬಂದ ನಂತರವೂ
ನನ್ನದೇ ಹೃದಯ ರಾಜ್ಯಭಾರ
ಅವನನೂ ಸೇರಿಸಿ... ;-)

04/09/2014

ಕವನ

ಆ ಮನ,,,


ಆ ಮನಕೆ
ಜೀವನದ ಸೌಂದರ್ಯವನ್ನು
ನಂಬಿಸುತ್ತಿದ್ದಳು
ಕರಿ ನೆರಳು,
ಕಳೆದ ಭಾವ
ಹೊಸಕಿದ ಕನಸಿನ ಪರಿವೆ
ಅವಳಿಗೂ ಇದ್ದ ಕಾಲ,

ಬೆಳಕು ಉರಿಯುತ್ತಿರಲು
ಕಣ್ಣಿಗೆ ಕಾಣದ ಗಾಳಿ
ಬೇಕಿದ್ದ ನೆಪವಿದೆ,,
ಬದುಕಲು ಒಳ ಒತ್ತಡವಿರಬೇಕು
ಪ್ರೀತಿಯಲಿ ತೇಲೊ ಹುಮ್ಮಸ್ಸಿರಬೇಕು
ಹುಟ್ಟು ಹಾಕಿ ದುಃಖಗಳನು
ಹಿಂದಾಕುತಾ ಮುಂದೆ ಸಾಗಬೇಕು..
ಆ ತೀರವ ಸೇರಲೆಂದು,, ಇಲ್ಲವೇ
ಮುಳುಗದೇ ಸಾಗಲೆಂದು,,
ಕರಿ ನೆರಳ ಹೀಗೊಂದು ನಿರೂಪಣೆ,,

02/09/2014

ನೀನೆಷ್ಟು ಬಚ್ಚಿಟ್ಟುಕೊಂಡರೇನು
ಮರದ ಮರೆಯಲಿ,
ನೀ ಹಿಂದಿರುಗಿ ನೋಡಿಯೇ ಇಲ್ಲ
ನಿನ್ನ ಬೆನ್ನಿಗೆ ನಾನೂ ಬಚ್ಚಿಟ್ಟುಕೊಂಡಿರುವೆ!

ಅವರ್ಯಾರು ನೋಡಿಲ್ಲ,,

***********************

"ಅವನು ಮತ್ತು ಕನಸು"

ನನ್ನ ಕನಸುಗಳನು ಪೋಣಿಸಿಕೊಳ್ಳಲು ಅವನಿಲ್ಲ,
ಆದರೂ ನನ್ನ ಕನಸುಗಳಿಗೆ ಕೊನೆಯೇ ಇಲ್ಲ
ಅವನೇ ಬಂದು ಪೋಣಿಸಿ ಎಣಿಸಿ ಮಾಲೆಯಾಗುವನು
ಎಂಬುದೇ ನನ್ನ ದೊಡ್ಡ ಕನಸು
ಕನಸುಗಳಿಗೀಗ ಬರವಿಲ್ಲ
ಎಲ್ಲಾ ಕನಸುಗಳಲೂ ಅವನೇ ಇರುವನಲ್ಲ
ಇದು ಮಾತ್ರ ಕನಸಲ್ಲ!

****************

ಪ್ರೀತಿಯಲಿ ಮುನಿದವರು
ಗಮನ ಸೆಳೆಯಲು ಜರಿದವರೇ
ಒಮ್ಮೊಮ್ಮೆ ಬಹುವಾಗಿ
ಇಷ್ಟವಾಗಿಬಿಡುವರು,,!

02/09/2014

***************

ನಡು ರಾತ್ರಿ ಕನಸಲಿ
ಹಸಿರು ತಂದವನೇ
ಕತ್ತಲೆಯ ಕಪ್ಪೊಳು
ನಿನ್ನ ನಿಶಾನೆಯ
ಗುರುತು ಹಚ್ಚಲಾಗಲಿಲ್ಲ
ಜತನದಿ ಹಗಲಾಗಿ ಬಾ
ನಾ ಹಗಲುಗನಸಿನವಳು!

01/09/2014

ಕವನ

ಕ್ಷಮೆ,,,,,

ಕ್ಷಮಿಸಿಬಿಡಬೇಕು ಅವರೆಲ್ಲರನೂ

ಚೂರಿ ಹಾಕದೆ ಕತ್ತು ಹಿಸುಕದೆ

ಜೀವವಿದ್ದೂ ಇಲ್ಲವಾಗಿಸಿ

ಒಳಗೊಳಗೇ ಒಸರೋ ರಕ್ತಕೆ

ಮದ್ದು ಮಾಡಿಕೊಳ್ಳಲಾಗದೆ 

ಕಂಬಗಳಂತೆ ನಮ್ಮ ನಿಲ್ಲಿಸಿದ 

ಆ ಅಷ್ಟೂ ಜನರನ್ನು,,

ಕ್ಷಮಿಸಿಬಿಡಬೇಕು,,

ಹೌದು ಕ್ಷಮಿಸಿಬಿಡಬೇಕು

ನಮ್ಮೊಳಗಿನ ಮೃದುತ್ವ ಕಳೆದು

ಕಲ್ಲೊಂದು ಜೀವ ತಳೆದು

ದಿನ ಬೆಳಗಾಗುತ್ತಲೆ

ಕಣ್ಣೀರ ಇಂಗಿಸಿ ನಿಂತ

ನಮ್ಮದೇ ಮುಖವು 

ಭಾವಗಳ ಗೆರೆಗಳಳಿಸಿ

ನಗುವನ್ನೊಂದು ಚಿನ್ಹೆ ಮಾಡಲು

ಕಲಿಸಿದ ಆ ಎಲ್ಲಾ ಜನರನೂ

ಕ್ಷಮಿಸಿಬಿಡಬೇಕು,,,

ಕ್ಷಮಿಸಿಬಿಡಬೇಕು

ಹೆಜ್ಜೆ ಹೆಜ್ಜೆಗೂ ಕಾಲೆಳೆದ

ಇದ್ದ ಇರದ ಸುಳ್ಳ ಸೃಷ್ಠಿ ಮಾಡಿ

ಹೊರಗೆಳೆದ ನಮ್ಮ ವಿನೂತನ ಶಕ್ತಿಗಾಗಿ

ನಮ್ಮ ನಾವೇ ಹೆಮ್ಮೆಯ ಸವಾಲುಗಾರರಾಗಿ

ಕಾಣೊ ಅವಕಾಶಗಳ ನೀಡಿದ ಜನರನು

ಕ್ಷಮಿಸಿ ಹಾರೈಸಿ ಬಿಟ್ಟುಬಿಡಬೇಕು,,

ಬೇಕೆಂದರೂ ಸುಳಿವು ಸಿಗದಂತೆ

ಪ್ರೀತಿಯನು ದ್ವೇಷಿಸಿದ ಅವರಿಂದ

ದೂರ ದೂರ ನೆಡೆದು,,,

01/09/2014

ಜೀವನದ ದುರಂತಗಳನ್ನೆಲ್ಲಾ ಬಿಚ್ಚಿಡಬೇಕಿರಲಿಲ್ಲ
ಸೋಗಸೇನಿಲ್ಲ ನಿನ್ನಲಿ ಎನ್ನುವೆಯೇನೋ
ಎಂದಷ್ಟೇ ಹರಿದುಬಿಟ್ಟೆ ಅಂದು ಪದಗಳಲಿ

***********************

ಚಿಕ್ಕ ಮಗುವು ಕೈಯೊಳಿಂದ
ನವಿಲು ಗರಿಯ
ಕಿತ್ತುಕೊಂಡು ಓಡುವಂತೆ
ನೀ ನನ್ನಿಂದ ಮಾತುಗಳ
ಸೆಳೆದುಕೊಂಡು ಹೋದೆ,
ಮರಳಿಸುವುದಾದರೂ ಎಂದು?
ಹೇಳಿ ಹೋಗಬಾರದಿತ್ತೆ?!,,,,

**************************

ಚಿಗುರೋ ಹೃದಯಕೆ
ಏನೇನೋ ಆಸೆಗಳು ಕನಸುಗಳು,
ಪ್ರೀತಿ ಪ್ರೇಮ ಕನವರಿಕೆಗಳು,
ಅನಿರೀಕ್ಷಿತ ಹೊಡೆತಕೆ
ಜೀವನ ರಾಗ ಏರುಪೇರು,,
ದುಃಖ ಉಮ್ಮಳಿಸಲು
ಕಣ್ಣೀರ ಸುರಿಸಲಾರದ ಮೂಕ,,
ಕಣ್ಣಿರಿಗೆ ಮುತ್ತೋ ಧೂಳುಗಳ ಕಾರಣ
ಬತ್ತಿಸಿಕೊಳ್ಳೊ ಕೊಳಗಳ ಮಾಲೀಕರು!!
ಜೀವನವೊಂದು ನಾಟಕ,,
ನಗುವೊಂದು ಸಾಧನವದದ್ದು ವಿಪರ್ಯಾಸ,,

31/08/2014

************************************

ಬೆನ್ನ ಹಿಂದೆ ನಿಂತು ಎಷ್ಟು ಆಟವಾಡುವೆಯೋ ಕೃಷ್ಣ
ನವಿಲು ಗರಿಗಳೆಲ್ಲಾ ಚೆಲ್ಲಾಪಿಲ್ಲಿ ನೋಡು
ಮಡಿಕೆ ಬೆಣ್ಣೆಯೂ, ದೇವಕಿಗೆ ಮೊದಲೇ ತಿಳಿದಿತ್ತೋ ಏನೋ
ನಿನ್ನ ತುಂಟತನ ಅದಕೆ ನನಗೆ ವಹಿಸಿದಳು ನಿನ್ನ,,

*****************

ಇಲ್ಲ ಇಲ್ಲವೆಂದೇ ಕಳೆದೆ
ನಿನ್ನ ಇರುವಿಕೆಯ ಲೆಕ್ಕಿಸದೆ,
ಹೃದಯವಿರುವುರಾದರೂ ಹೇಗೆ
ಮಿಡಿಯುತ ನೀ ನಿಲ್ಲದೆ,,

30/08/2014

ಕವನ

ಆ ದೂರದ ತೀರವ ಸೇರುವ ಹವಣಿಕೆಯಲಿ
ಪಯಣಿಸಿರುವೆ ತೋಚಿದ ದಿಕ್ಕಿನಲಿ
ಸಿಕ್ಕರೆ ಸಿಗಲಿ ದಡವೊಂದು,
ಇಲ್ಲದೆ ಇರಲಿ ಕೊನೆಯೊಂದು

ನಡು ನೀರ ಈ ಪಯಣ ನಿರಂತರ
ನಿಂತು ನೀರೊಳು ಮುಳುಗಲಾರೆ,,
ತೇಲುತ ಸಾಗುತ ಉಳಿದರಷ್ಟೇ ಸಾಕು
ಉಸಿರಡಗಿ ತಳ ನೀರ ಸೇರದಂತೆ,,

29/08/2014

ದೇವನೊಬ್ಬ ನಾಮ ಹಲವು
ತತ್ವವೊಂದೆ ಧರ್ಮ ಹಲವು
ನೀತಿಯೊಂದೆ ಆಚರಣೆ ಹಲವು
ಹಲವು ರೀತಿಯ ನೀತಿಗಳ ನಡುವೆ
ಮನದ ಕ್ಷೋಬೆ ಅಳಿದು
ಬೆಳಕೇ ಬೆಳಕು ತುಂಬಿ ನಗಲಿ
ಜೀವನಗಳೆಲ್ಲಾ ಜೀವನ್ಮುಖಿ ತೇಜದಲಿ.

____________________

ದೇವ ಗಣ, ಭೂತ ಗಣ
ಅಧಿದೇವ ಶ್ರೀಗಣನಾಥ
ಮನ್ನಿಸೆಮ್ಮ ದೂರ್ತ ನಡೆಯ
ಕನಿಕರಿಸಿ ಹರಸು ದೇವ
ಭಕ್ತರು ನಾವೇ ನಿನ್ನ ಬಣದವರು!

29/08/2014

ಇಲ್ಲಿ ಎಲ್ಲಾ ನವಿಲುಗಳೇ 

ಗೊತ್ತೆನಗೇ;

ನಾನೂ ಕೆಂಬೂತವೇ 

ಆದರೂ ಸರಿಯೆ

ಪುಕ್ಕವ ತರಿದು 

ಕುಂಚವಾಗಿಸಿಹೆನು,,

ತುಸು ಗೀಚಿ 

ಮಗುವಾಗಿ ನಲಿದಾಡೋ 

ಹೊಸ ಹುಮ್ಮಸ್ಸಿನ ಬಯಕೆಯಲಿ,,,,

ಚಿತ್ರ ಕಲೆ; ದಿವ್ಯ ಆಂಜನಪ್ಪ

ದಿವ್ಯ ಆಂಜನಪ್ಪ

28/08/2014

"ಚಿತ್ರ"

ಚಿತ್ರ ಬಿಡಿಸಿದ್ದೆ
ನಿನ್ನ ದುಂಡಗೆ ಮಾಡಿ
ಅದೇನು ಓರೆಕೋರೆಗಳು
ನೆರಳು ಕಪ್ಪುಗಳು
ಕುದಿವ ಬಿಸಿಲು ಗೆರೆಗಳು.
ನನ್ನ ನಿಟ್ಟುಸಿರಿಗೆ
ಎಲ್ಲಿ ಬೆಂದುಬಿಡುವೆಯೋ
ಚಿತ್ರದೊಳು ನೀನೆಂದು
ನೀರಿಗೆಸೆದುಬಿಟ್ಟೆ,,
ಹಾಯಿ ದೋಣಿ ನೀ
ಹಾಯಾಗಿರಲೆಂದು,,

28/08/2014

________________

ನೀರಿನ
ಕೊಳಕ್ಕೆ
ಹೆಚ್ಚು ಹೆಚ್ಚು
ಕಲ್ಲುಗಳು
ಬಿದ್ದಂತೆ,
ಕೊನೆಗೊಂದು ದಿನ
ಕೊಳವು
ಕಲ್ಲೇ ಆಗುವುದು
ತನ್ನೆಲ್ಲಾ
ನೀರ ಬಸಿದುಕೊಂಡು,,!

27/08/2014

ಕವನ

"ತಾವರೆ ಮತ್ತು ನೀರ ಹನಿ"


ಪ್ರೀತಿಯಲಿ ಅವ ತಾವರೆಯಾದ
ನನ್ನನ್ನೊಂದು ಮುತ್ತು ಮಾಡಿ
ನೋಡುವ ನೋಟಕೆ ಸಾಟಿಯೇ ಇಲ್ಲ
ನಮ್ಮಿಬ್ಬರ ಜೋಡಿ ನೋಡಿ,

ಎತ್ತ ವಾಲಿದರೂ ಸುಧಾರಿಸೊ ಅವನು,
ತುಳುಕುತ ಹೊಮ್ಮೊ ನೀರ ಹನಿ ನಾನು,
ಸೊಗಸೇ ಸೊಗಸು ಎನ್ನಲು ಜಗವು,
ಅಂಟಿಯೂ ಅಂಟದಂತೆ ನೀರ ಹನಿಯು
ಒಳಗೊಳಗೇ ಬಿಕ್ಕು ಅಳುವು,

ನೀರ ಹನಿಗೆಲ್ಲಿಯ ಕಣ್ಣೀರು,
ಮುಂದಾಗಿ ದುಂಡಗೆ ಮಿಂಚಿದೆ ಅಂದು,,
ನಾನೊಂದು ತಾವರೆಯ ಬಿಂದು,,
ಇಂದಿಗೂ ಹೊಳೆಯೊ ಹೂ ಮುತ್ತು
ಹೊನ್ನಂತ ಮನಸ ತಾವರೆಯ ಸೋಕಲು,,,, !

27/08/2014

ನೀರಿನ
ಕೊಳಕ್ಕೆ
ಹೆಚ್ಚು ಹೆಚ್ಚು
ಕಲ್ಲುಗಳು
ಬಿದ್ದಂತೆ,
ಕೊನೆಗೊಂದು ದಿನ
ಕೊಳವು
ಕಲ್ಲೇ ಆಗುವುದು
ತನ್ನೆಲ್ಲಾ
ನೀರ ಬಸಿದುಕೊಂಡು,,!

_____________________

ಎಲ್ಲರೂ ಕಸದಂತೆ ಗುಡಿಸಿ
ಮೂಲೆಗೆ ತಳ್ಳಲು
ಅಲ್ಲೇ ಬೇರು ಬಿಟ್ಟು ನಿಂತದ್ದು
ಕಸದಲ್ಲೊಂದು ಜೀವ ಕಳೆಯ
ಪಳೆಯುಳಿಕೆ ಕುರುಹು!!

27/08/2014
____________________

ಸಕ್ಕರೆಗೊಂಬೆಗೆ
ಇರುವೆಯ ಭಯವೇ?!
ಇದ್ದರಷ್ಟೇ ಕ್ಷಣಾರ್ಧದಲಿ
ಕರಗಿಸೋ
ಸುರಿವ ಮಳೆಯದು,,

______________________

ಲೇಖನಿಯ ತುದಿಗೆ ತಾಗಿದ ಜೀವ
ಬಹುಶಃ ಎಲ್ಲೋ ಎಂದೋ
ಮನಸ ನಾಟಿರಲೂಬಹುದು..

26/08/2014

ಕವನ

ಕೆಲ ಜೀವನಗಳು...

ಒಂದು ಕಡೆಯಿಂದ
ಜೀವನದ ಎಲ್ಲಾ ಲಯವೂ
ಏರುಪೇರಾಗಲು
ಉತ್ಸಾಹವು ಬತ್ತಿ
ಎಲ್ಲೋ ಕಳೆದು ಹೋಗುವ
ಚೈತನ್ಯ
ಮತ್ತೆ ಸಂಪಾದಿಸಲಾಗದೇನೋ,,
ಸಂಪಾದಿಸಿದರೂ
ಉರುಳೋ ಭರವಸೆಗಳು
ಎಂತಹ ಬಂಡೆಯನ್ನೂ
ಉರುಳಿಸಿಬಿಡುವುದೇನೋ,,,
ಮತ್ತೆ ಮತ್ತೆ ಕುಂದೊ ಚಂದ್ರ
ಎಂದಿಗೂ ಪೂರ್ಣನಾಗದ
ಭೀಕರ ಭಾವ
ಒಮ್ಮೊಮ್ಮೆ ಕೆಲ ಜೀವನಗಳು,,,

26/08/2014

ಗೌಪ್ಯತೆ ಕಳೆದುಕೊಂಡ ಮೇಲೆ
ವಜ್ರಕೂ ಗಾಜು ಚೂರಿನ ಬೆಲೆ!! 
_______________________

ಭಾಷೆಯು 
ಅರ್ಥವಾದರೂ 
ಇಲ್ಲದಿದ್ದರೂ
ಸರಿಯೇ,
ಭಾವ 
ಅಪಾರ್ಥವಾಗಬಾರದಿತ್ತು,,
ತೋಚಿದಂತೆ 

ಓದಿಕೊಂಡು!!

________________________

''ಹೆಜ್ಜೆ,,,,''

ಪಂದ್ಯ ಸೋತ ಮೇಲೂ 
ಒಂದಷ್ಟು ದಾರಿ 
ಮುಂದಡಿ ಇಡಲೇಬೇಕು 
ನಿಧಾನಗತಿಯ ಅನುದ್ವಿಗ್ನ ಹೆಜ್ಜೆಗಳಾದರೂ,,
________________________

ನನಗೊದಗಿದ ವಿರಹವೋ
ನಾನೇ ಅಪ್ಪಿಕೊಂಡ ವಿರಹವೋ
ಪ್ರಶ್ನಿಸಲು ನೀವ್ಯಾರು
ಕುಹುಕವಾಡದಿರಿ ಅರಿಯದೆ ಭೇದವ
ಯಾರ ಇದಿರೂ ನಾ ನಿಂತಿಲ್ಲ,
ಕಂಡಲ್ಲೆಲ್ಲ ಸಲುಗೆಗಿಳಿವ ಗೀಳು ನನಗಿಲ್ಲ,,
ಹೌದು ನಾ ಕಠೋರವೇ,
ಅಂದಿಗೂ ಇಂದಿಗೂ
ಮುಂದಿನ ದಿನಗಳಿಗೂ,,,
ಕಠೋರತೆಯೇ ಅಸ್ತ್ರ ಎನಗೆ,,

ನಿಮ್ಮೆದುರು,,

________________

ಪ್ರತೀ ಕ್ಷಣವನೂ 
ಸಂಭ್ರಮಿಸಬೇಕು
ಎನ್ನುವ ನಾನು,
ನಿನ್ನ ವಿರಹಕೂ ಹೊರತಲ್ಲ!
ತಡವಾದರೂ ಚಿಂತಿಸಬೇಡ
ನೀ ಎಂದಿಗಾದರೂ 
ಬಂದಬಿಟ್ಟರೂ
ನಾ ನಗುತ್ತಲೇ ಸ್ವಾಗತಿಸುವೆ 
ಓ,, ಪ್ರೀತಿಯೇ...!!!

25/08/2014

_______________________

ನಿಜ ಪ್ರೀತಿ ಅರಿವಿಗೆ ಬರುವುದು
ನಿಶ್ಶಕ್ತಿಯಿಂದ ನಿಲ್ಲಲಾಗದೆ
ಆಸರೆಯೊಂದು ಕೈ ತಡವಿದಾಗ,
ತಾಜಾ ಸ್ನೊ ಪೌಡರ್ನಲ್ಲಿದ್ದಾಗ
ತಂಗಾಳಿಯ ಕನಸು ತೂರೋ
ಹಾಯ್ ಹಲೋ ಲವ್ ಯೂಗಳಿಂದಲ್ಲ,,

24/08/2014

________________

ಸುಮ್ಮನೆ ಸುಳ್ಳು
ಏಕೆ ಹೇಳಲಿ?!,
ನಾ ನಿನಗೆ ಕಾಯುತ್ತಿಲ್ಲ,
ಬದಲಿಗೆ
ನೀ ಸಿಗುತ್ತಿಲ್ಲವಷ್ಟೇ!

24/08/2014

___________________

ಇನ್ನಷ್ಟು ವರುಷಗಳು
ನೀ ನನ್ನ ನೋಡಬೇಕಿತ್ತು,
ಸ್ನೇಹದಲಿ ಮೋಹದಲಿ ಹೇಗಿರುವಳೊ,
ಅಕ್ಕಳಾಗಿ ತಂಗಿಯಾಗಿ,
ಅಮ್ಮಳಾಗಿ ಅಜ್ಜಿಯಾಗಿ,,
ಕೊನೆಗೊಮ್ಮೆ ನಿರ್ಧರಿಸಿಬಿಡು
ಜೊತೆಯಾಗೊ ಹದವಿದೆಯೇ ಎಂದು!
ಬೇಸರವೇನಿಲ್ಲ ನಿನ್ನ ಕುತೂಹಲವ ಸ್ವಾಗತಿಸುವೆ,
ತಡವೇನಲ್ಲಬಿಡು ಮುಂದಿನ ಜನ್ಮಕೆ,,

24/08/2014

____________

ಮಣ್ಣ ಕಣ್ಣಿಗಷ್ಟೇ
ಅಳಿವು
ಕಣ್ಣ ಬೆಳಕಿಗಲ್ಲ!,,

22/08/2014

ಕವನ

ಚೆಂದ,,


ಅವಳು ಚೆಂದವಿದ್ದಳು
ನನ್ನೊಳಗೆ ಪ್ರೀತಿ ಮೊರೆತ
ಈಗವಳ ಚೆಂದ ಏಕೋ
ಚೆಂದವೇ ಅನಿಸುತ್ತಿಲ್ಲ
ನನಗೆ ಪ್ರೀತಿಯು ಕೊರೆತ,,

ಮನಸ ಕಾಣಲಾರದ
ಈ ಕಣ್ಗಳು
ಆ ಸುಂದರಿ ಎಂಬ
ಹೂವ ಹೊಸಕಿ ಹಾಕಿದ್ದೆ
ಮೋಹದ ಕುರುಡಲಿ,,

ಈಗವಳು ನಗುವಳು ನನ್ನೊಳಗೆ
ಆ ಅದೇ ದಣಿದ ಎಣ್ಣೆ ಮುಖದಲಿ
ಸಂಜೆಗೆಂಪ ಸೂರ್ಯನಂತೆ
ಬಾಳ ಈ ಇಳಿ ಸಂಜೆಯಲಿ
ಹೀಗೆ ನೆನಪಾಗಿ
ಒಲವಾಗಿಳಿವಳು ಪುಳಕದಲಿ,,,

(ವೃದ್ಧನಾಗೊಮ್ಮೆ.... :-) )

21/08/2014

ನಮ್ಮನ್ನು ಕಂಡರಾಗದ ಅವರೇ
ನಮ್ಮ ಕಾಳಜಿವಹಿಸುವರು
ಬಹಳೆ,
ಒಳ್ಳೆತನವೆಂದೇ ಭಾವಿಸಿ
ಬರಸೆಳೆದರೂ
ಅವರ ಅತೀ ಪ್ರೀತಿ
ತಲೆ ಕೆಡಿಸದೇ ಇರದು,
ನನಗೆ ದ್ಷೇಷವಿಲ್ಲ,
ಆದರೆ ನಮ್ಮ ದ್ವೇಷಿಸೋ ಅವರು
ನಮ್ಮನ್ನು ಬಿಟ್ಟು ಬದುಕಲಾರರು,,
ಪ್ರೀತಿಯಲಿ ಸಿಲುಕಿಸಿ ಹಿಂಸಿಸುವರು
ಹೀಗೂ ಆಗುವುದು
ಪ್ರೀತಿಯ ಮರೆಯ ಅಸೂಯೆ,,,!!

21/08/2014

________________________

ಕೆಂಬೂತಗಳ ಹಾವಳಿ ಹೆಚ್ಚಾಗಿ
ನವಿಲಿಗೆ ಮತ್ತೂ ಭಾರವಂತೆ ಗರಿಗಳು
ನವಿಲಿಗೆ ಅನಿವಾರ್ಯವಾದ ತಟಸ್ಥ್ಯ!

17/08/2014

_____________________

ಕೈಗೆ ಸಿಗದ ಕಾಮನಬಿಲ್ಲಿಗೆ
ಆಸೆಪಟ್ಟು ಕೊರಗುವ ಬದಲು
ಕೈಗೆಟುಕೊ ಬಣ್ಣದ ಗಾಳಿಪಟ ಹಿಡಿದು
ಆಗಸಕೆ ಹಾರಿಸಿ ನೋಡುವ ಚಂದ
ಒಪ್ಪಬಹುದೇನೋ; ಸೂತ್ರವೂ ಕೈಲಿರಲು
ಮಾಯವಾಗೋ ಗೊಂದಲವಿಲ್ಲ,,
ಆದರೂ ಸೂತ್ರ ಗಟ್ಟಿ ಇರಬೇಕಷ್ಟೆ
ತುಂಡಾಗಿಸೋ ಹುನ್ನಾರಗಳೆದುರು...

15/08/2014

____________________

ನಾವು ಹುಚ್ಚರಾಗುತ್ತಿದ್ದೇವೆ
ಎನಿಸುವಾಗ, ಸುತ್ತಲ ಜಗತ್ತು
ಸಿಕ್ಕಾಪಟ್ಟೆ ಸುಸ್ಥಿತಿಯಾಗಿ ಕಾಣುವುದು!

13/08/2014

ಕವನ

ಕಲೆ,,,, :-)


ಯಾರೂ ಇಲ್ಲವೆನ್ನುವ ಈ ಹೊತ್ತು
ಹೊರೆಗೆ ಧೋ ಎಂದು ಸುರಿವ ಮಳೆ
ಎನ್ನ ಎನ್ನೊಂದಿಗೇ ಬೆಸೆಯೋ ಹುನ್ನಾರ

ಮರೆತು ಸೋಲು, ಕಲಿತು ಗೆಲವು
ಮನದಂಗಳವ ಗುಡಿಸಿ ತಣಿಸಿ
ಹದವಾದ ಹಬೆ,,!

ನೀನಿದ್ದರೂ ಇಲ್ಲದಿದ್ದರೂ
ಸದಾ ರಂಗೋಲೆಯ ಕಲೆ,
ಈ ಚಂಚಲೆ,,!!

14/08/2014

ರಾಧೆ ಚಿರವಿರಹಿಯಾದಳು
ಕೃಷ್ಣನ ಗೆಲುವ ಮೆರೆಸಲು!

___________________________________


ಸತ್ಯಗಳು ಅವರವರ ಮೂಗಿನ ನೇರಕ್ಕೇ ಇರುವುದಲ್ಲಾ
ಆ ಸತ್ಯವು ಈ ಮೂಗಿಗೂ,
ಈ ಸತ್ಯವು ಆ ಮೂಗಿಗೂ ಪರಸ್ಪರ ವಿರುದ್ಧವೇ,,
ಆದರೂ ಅವುಗಳೂ ಸತ್ಯಗಳೇ,,
ಇದು ಹಾಸ್ಯವೋ ವಿಡಂಬನೆಯೋ ಅಲ್ಲ
ಇದೂ ಒಂದು ಸತ್ಯ,,
ನನ್ನ ಈ ಮೂಗಿನ ನೇರದ್ದು,,,

12/08/2014

ಕವನ

ಜ್ವಾಲೆ,,!


ನೀ ಎನ್ನ ಹಿಡಿದಿದ್ದರೆ ಅಂಗೈಯ್ಯಲಿ
ದೀಪವಾಗುತ್ತಿದ್ದೆನೋ ಭರವಸೆಗೆ

ಜ್ವಾಲೆ ಚದುರಿ ಮಿಂಚು ಹುಳುವಾದೆ
ಹಾದಿ ಬದಿಯ ಗಿಡಗೆಂಟೆಗಳಲಿ

ಎಲ್ಲರಿಗೂ ಮನರಂಜನೆಯೇ ನಾನೀಗ
ಸಾರ್ಥಕ ನೆಲೆ ಕಾಣದ ನಿಟ್ಟುಸಿರು,

ನಿಂದೆಸೆನು ನಾ ನಿನ್ನನು
ನೊಂದಿಪೆನು ನಾ; ಜ್ವಾಲೆಯು
ಚದುರಿದ ಕಾರಣಕೆ,, !

11/08/2014

ಮನದ ಮಾತು

ಯಾರೊಬ್ಬರ ಮನಸ್ಸು ಅಷ್ಟು ಸುಲಭವಲ್ಲ ಅರ್ಥ ಮಾಡಿಕೊಳ್ಳಲು. ಮುಖವನ್ನು ನೋಡಿ ಮಣೆ ಹಾಕಬಾರದು (ನನ್ನನ್ನೂ ಸೇರಿಸಿಯೇ :-)  ), ಆದರೆ ಅಷ್ಟೆ ಸುಲಭಕ್ಕೆ ಅವರನ್ನು ಹೀಗೆಯೇ ಎಂದೂ ಸಹ ನಿರ್ಧರಿಸಲೂ ಆಗದು.

ನಿರ್ಭಾವುಕತೆಗೆ ನಿರಪೇಕ್ಷೆಯೇ ಸರಿಯಾದ ಉತ್ತರವೇ ಹೊರತು ತಿರಸ್ಕಾರವಲ್ಲ,,!

ಪ್ರತೀ ತಪ್ಪಿಗೂ ಅದರ ನೆರಳಂತೆ ಕಲಿಕೆಯಿದೆ, ಹಾಗೆಯೇ ಪ್ರತೀ ಜಡ್ಡುತನಕ್ಕೂ ಅದರದೇ ಆದ ನೋವುಗಳಿವೆ. ನೋವನ್ನರಿತು ನಡೆಯಲು ನಾವ್ಯಾರೂ ಬ್ರಹ್ಮರಲ್ಲ; ಮಾನವರು. ಆ ಕಾರಣಕ್ಕಾದರೂ ಮಾನವೀಯತೆಯಿರಲಿ. ತಿಳಿಯದೇ ನುಡಿವ, ತಿಳಿದು ಕೊಂಕಾಡುವ ಮನೋಸ್ಥಿತಿಯನ್ನು ಇನ್ನಾದರೂ ತೂರಿಬಿಡೋಣ. ಪ್ರತೀ ಜೀವಕೂ ಅದರದೇ ಆದ ತಪ್ಪು -ಜಡ್ಡುತನಗಳಿವೆ. ನಂತರ ಕಲಿಕೆಯ ಆಸರೆ ಮತ್ತು ಅದರ ನೋವಿಗೆ ಸ್ಪಂದಿಸೋ ಅದರದೇ ನೋವುಗಳಿವೆ, ಮತ್ತೂ ತಾನೇ ಕಂಡುಕೊಳ್ಳೋ ಸಾಂತ್ವನಗಳೂ. :-)

ಬೆರೆತು ಬಾಳೋ ಉದ್ದೇಶವೇ ಆಗಿದ್ದರೆ ನಮ್ಮಲ್ಲಿ ಸಹಿಸೋ ಗುಣ ಇನ್ನಷ್ಟು ಹೆಚ್ಚಲಿ. ಪ್ರೀತಿಸೋ ಹೃದಯಕೆ ಇನ್ನಷ್ಟು ಪ್ರೀತಿಯೇ ಸಿಗಲಿ.

ಶುಭದಿನ ಫ್ರೆಂಡ್ಸ್,,,, :-)

10/08/2014

ಕವನ

ಗುದ್ದಾಟ,,,,,, 


ಅದ್ಭುತಗಳೆಲ್ಲಾ
ನಿನ್ನ ವಿರಹದಲೇ
ಅಡಗಿದೆಯಲ್ಲ
ಓ ಚೋರ!

ನೀನಿದ್ದ ಹೊತ್ತು
ಆಡುವ ಮಾತೆಲ್ಲಾ
ಒಂದೇ ಸಮನೆ
ಮಳೆ ಬಂದಂತೆ

ಗೊತ್ತಿದ್ದು ಸುಮ್ಮನೆ ಹರಟೆ
ಜೊತೆ ಕಳೆವ ಕಾಲವಷ್ಟೆ ಮುಖ್ಯ!
ಏನೇನೋ ನಿನ್ನ ಲೆಕ್ಕಚಾರ,
ಗಾಬರಿಯಾದರೂ ಖುಷಿಯಿತ್ತು
ನಿನ್ನ ಹೊಸದೀ ರೀತಿಗೆ,

ನೀ ನೆನಪಾಗದ ಹೊತ್ತಿಲ್ಲ
ನನ್ನೊಂದಿಗೆ ನಾನಿರಲು,
ಬೇಸರವಿಲ್ಲ ನೀನಿಲ್ಲವೆಂದು

ಈ ಅಲ್ಪ
ವಿರಾಮದಲಿ
ಅರಿತೆ ನಾ
ಒಂದಷ್ಟು ನಿನ್ನನು!

ಇದು ಕವಿತೆ
ಅಲ್ಲವೇ ಅಲ್ಲ ಗೆಳೆಯ
ಗಾಳಿಯೊಡನೆ
ನನ್ನದೂ ಒಂದು ಗುದ್ದಾಟ!

09/08/2014

ಎಲ್ಲರ ಗಮನವೆಲ್ಲಾ ಬೇಕಿರಲಿಲ್ಲ ನನಗೆ
ಬೇಕಿದ್ದ ನೀನು ನಿನ್ನ ಲಕ್ಷ್ಯ
ಕತ್ತಲ ಮರೆಗೆ
ಬೆಳಕಿಲ್ಲದ ಮಾತ್ರಕೆ ನೀನೂ ಇಲ್ಲ
ಎನ್ನಲಾರೆ ದೊರೆಯೆ
ಕಣ್ಣು ಮುಚ್ಚಿ ಕನಸು ಕಂಡವಳು ನಾನು!
_______________________

ತನ್ನ ತೋರುವ ಕನ್ನಡಿ
ತುಸು ಓರೆ ಎನಿಸಿ
ಬೇಸರ ಮೂಡಿದರೆ
ಚಿಂತೆಯಿಲ್ಲ,
ಎಷ್ಟೋ ಸಿರಿ ಕನ್ನಡಿಗಳಿವೆ
ತಿರುಗಿಸಿ ನೋಡಿದರಾಯ್ತು
ಚೆಂದದ ಬಿಂಬಗಳು,
ನೋಟದೊಂದಿಗೆ ನಮ್ಮ ಒಳಬಿಂಬವಾದರೂ
ಹೆಮ್ಮೆಯ ಆರಾಧಕನಾಗಬಹುದು!
ಸೌಂದರ್ಯಗಳೂ ನಮ್ಮೊಳಗನ್ನೇ ಮೆಚ್ಚುವಂತೆ!!

08/08/2014
__________________

ಕೆಲವು ಮನಗಳು
ತಮ್ಮ ಇರುವಿಕೆಯ
ಅರಿವು ನೀಡಲು
ಸೆಣಸಾಡುವವು
ಅತ್ತು, ನಕ್ಕು, ಕಾಳಜಿ ತೋರಿ
ಕೊನೆಗೆ ಎದುರು ಬಿದ್ದು
ಬೇಕಾದುದು ತಮ್ಮೆಡೆಗಿನ
ಅವರ ಲಕ್ಷ್ಯವೇ ಹೊರತು
ಕನಿಕರವೂ ಅಲ್ಲ, ಪ್ರತಿಷ್ಠೆಯೂ ಅಲ್ಲ
ಜಗಳವೂ ಅಲ್ಲ, ಆದರೂ
ಸುಮ್ಮನಿರರು ಇವರು ಮೌನಿಗಳು
ಸುಮ್ಮನೆ ಗಲಭೆ ಎಬ್ಬಿಸುವರು ಮನಗಳಲಿ,,,

07/08/2014

ನನ್ನ ತಮ್ಮ; ರಾಖಿ ಹಬ್ಬ!

ಈ ದಿನ ಫೇಸ್ ಬುಕ್ನಲ್ಲಿ ಎಲ್ಲರೂ ತಮ್ ತಮ್ಮ ಅಣ್ಣತಮ್ಮಂದಿರ ಫೋಟೋಗಳನ್ನು ಹಾಕ್ತಾ ಇದ್ದಾರೆ, ನನಗೆ ಈಗ ಸುಮ್ನಿರೋಕ್ ಆಗ್ತಾ ಇಲ್ಲ,, 

ನನಗಿರುವ ಏಕೈಕ ತಮ್ಮನ ಫೋಟೋ (ಫೇಸ್ ಬುಕ್ಕಿನ ತಮ್ಮಂದಿರನ್ನು ಹೊರತುಪಡಿಸಿ  ) ಇಂದು ಹಾಕೋ ಮನಸ್ಸಾಗಿದೆ... 

ಇಷ್ಟು ದಿನಗಳು ನಾನು ಏನೊ ಒಂದಷ್ಟು ಬರೆದೋ, ಇಲ್ಲವೋ ಬೆರೆತೋ ನಿಮ್ಮನೆಲ್ಲಾ ಗಳಿಸಿದ್ದೇನೆ. ಇಷ್ಟು ದಾರಿಯನ್ನು ಸಾಗಿ ಬರಲು ಮೊದಲ ಹೆಜ್ಜೆ ಎಂದಿರುತ್ತದೆ ಅಲ್ಲವೇ? ಹಾಗೆಯೇ ಮೊದಲ ಹೆಜ್ಜೆಯಿಡಲು ಈ ನನ್ನ ತಮ್ಮನು ನನಗೆ ಸಹಕಾರಿಯಾಗಿದ್ದನು. ನಾನು, ಕಂಪ್ಯೂಟರ್ ಗಂಧ-ಗಾಳಿ ಗೊತ್ತಿಲ್ಲದವಳು. ಸುಮ್ಮನೆ ಕೇಳಿದೆ ಎಂದು ಫೇಸ್ ಬುಕ್ ಅಕೌಂಟನ್ನು ತೆರೆದು ಕೊಟ್ಟು, ಹೇಗೆ ನಿರ್ವಹಿಸಬೇಕು ಎಂದು ಹೇಳಿಕೊಟ್ಟವನು ಇವನೇ, ಈಗ ಫೇಸ್ ಬುಕ್ ವಿಚಾರದಲ್ಲಿ ಅವನನ್ನೇ ಮೀರಿಸುತ್ತೇನೆ, ಅದು ಬೇರೆ ವಿಚಾರ ಬಿಡಿ 

ಇಲ್ಲಿ ನೋಡುತ್ತಾ ನೋಡುತ್ತಾ ನಾನೂ ಬರೆಯಲು, ಸ್ವಂತದೊಂದು ಲಾಪ್ ಟಾಪ್ ತೆಗೆದುಕೊಳ್ಳೋ ಆಸೆಯಾಯಿತು. ಅದಕ್ಕೂ ಮಾರ್ಗದರ್ಶಕನು ಇವನೇ,, ತಂದ ಲಾಪ್ಟಾಪ್ನಿಂದ ಏನೂ ಕೆಲಸ ಮಾಡಲಾಗದೆ ಸುಮ್ಮನಿದ್ದೆ. ಕನ್ನಡವಷ್ಟೇ ನನಗೆ ಬೇಕಾದ್ದು,, ನನಗಾಗ ನುಡಿ, ಪದ ಇದ್ಯಾವುದರ ಪರಿಚಯವಿರಲಿಲ್ಲ, (ನುಡಿ ಈಗಲೂ ಕಲಿತಿಲ್ಲ). ಕನ್ನಡ ಟೈಪಿಂಗ್ ತಿಳಿಯದ ನಾನು ಸರಳವಾಗಿ ಕನ್ನಡವನ್ನು ಟೈಪ್ ಮಾಡಲು ಸಹಾಯವಾಗುವಂತೆ ಪೇಪರ್ನಲ್ಲಿ ಬಂದ ಮಾಹಿತಿ ಸಂಗ್ರಹಿಸಿ "ಪದ''ವನ್ನು ನನ್ನ ಲಾಪ್ಟಾಪಿಗೆ ಇನ್ಸ್ಟಾಲ್ ಮಾಡಿಕೊಟ್ಟ,, ನಾನು ಬರೆಯುವಂತೆ ಅನುಕೂಲವನ್ನು ಮಾಡಿಕೊಟ್ಟನು. ಅದೂ ನಾನೇನೂ ಕೇಳದೆ,,,  ನಾನೇನೂ ಹೇಳದೆ ನನ್ನ ಮನಸ್ಸನ್ನು ಹೀಗೆ ಅರ್ಥಮಾಡಿಕೊಂಡು ಬೇಕಿದ್ದನ್ನು ಮುಂದಿರಿಸಿದ್ದ ನನ್ನ ತಮ್ಮ,,!  ತುಂಬಾ ಖುಷಿಯಾಗಿತ್ತು ಅಂದು,,,, ಇಂದಿಗೂ,,,,,  

ಚಿಕ್ಕವನಿದ್ದಾಗಷ್ಟೇ ಇವನಿಗೆ ರಾಖಿಯನ್ನು ತಂದು ಕಟ್ಟುತ್ತಿದ್ದೆ. ಇವನು ಹುಟ್ಟೋ ಮೊದಲು ನನ್ನ ದೊಡ್ಡ ಅಕ್ಕಂದಿರಿಗೇ ಕಟ್ಟಿ ದುಡ್ಡು ವಸೂಲಿ ಮಾಡುತ್ತಿದ್ದೆ..  
ಪ್ರತೀ ವರ್ಷ ರಾಖಿ ಹಬ್ಬದಂದು ಇವನಿಗೆ ಮತ್ತೂ ಇವನಿಗಿಂತ ಚಿಕ್ಕವಳು ನನ್ನ ತಂಗಿಗೂ ರಾಖಿ ಕಟ್ಟಿ ಖುಷಿಪಡುತ್ತಿದ್ದೆ. ಹಾಗೆಯೇ ನನ್ನ ಬಾಲ್ಯ ಸ್ನೇಹಿತನೊಬ್ಬ 'ಸಾಧಿಕ್'ನಿಗೂ ಕಟ್ಟುವುದು ನನ್ನ ಬಾಲ್ಯದ ಸಂತಸಗಳು.. 

ಈ ಭಾವಚಿತ್ರವು ಎರಡು ಮೂರು ವರ್ಷದ ಹಿಂದಿನದ್ದು,, ಚೂರ್ ಮುದ್ಮುದ್ದಾಗಿದ್ದಾನೆ,, ಈಗಿನದ್ದು ಹಾಕಲು ದೃಷ್ಟಿಗಳ ಭಯ! 
''ಕೃಷ್ಣ''ನೆಂದು ಚಿಕ್ಕದಾಗಿ ಕರೆಯುತ್ತೇವೆ. ಪೂರ್ಣ ಹೆಸರು ತುಸು ಉದ್ದವೇ ನನ್ನ ತಮ್ಮನದು,, !! 

ದೊಡ್ಡವರಾದಂತೆ ವಿಚಾರಗಳೂ ತಿರುವುಗಳು ಯೋಚನಾಲಹರಿಗಳೂ ಹೊಸತನವನ್ನು ತಂದುಕೊಳ್ಳುತ್ತಾ ಹೋಯಿತು.. ಈಗ ಈ ಆಚರಣೆಗಳನ್ನು ಆಶಯಗಳಾಗಿ ಬದಲಿಸಿದ್ದೇನೆ. 
ಇಂದು ನನ್ನ ತಂಗಿ ಅಣ್ಣನಿಗೆ ರಾಖಿ ಕಟ್ಟಿದ್ದಾಳೆ, ಎಂಜಿನಿಯರಿಂಗ್ ಮುಗಿಸಿ ಕೆಲಸ ಮಾಡುವೆ ಎಂದು ಹೇಳುತ್ತಿರುವ ತಮ್ಮನಿಗೆ ಈ ವರ್ಷ ಅವನ ಆಕಾಂಕ್ಷೆಯ ಕೆಲಸವೇ ಸಿಗಲೆಂದು ಹರಸಿದೆನು... :-)

10/08/2014

ಕವನ

ಚಿತ್ರ,,,,,


ನಾ ದೂರಬಲ್ಲೆ ನಿನ್ನನು
ದ್ವೇಷಿಸಲಾರೆನೊ
ವಾದಿಸಲಾರೆ ನಿನ್ನೊಂದಿಗೆ
ಕೇಳಬಲ್ಲೆ ನಿನ್ನದಷ್ಟೆ,

ಕಾಡಬಲ್ಲೆ ಹಟ ಮಾಡಿ
ನಿನಗಿಂತ ಹೆಚ್ಚು
ನನ್ನನ್ನೇ ಕಾಡಿಕೊಂಡು

ನನಗೆ ಮಾತು ಹೆಚ್ಚು,
ಆತುರವೂ,,
ನಿನಗೆ ಮೌನ ಪ್ರಿಯ
ಪ್ರತಿಯಾಗಿ ನನ್ನ ಕಾಡಲು

ಹೀಗೆಲ್ಲೊ ಹೊರಟ ನಿನ್ನನು
ಇನ್ನೂ ಕಂಡಿರುವೆ ಜೊತೆಯಲಿ
ಕಳೆದ ಮಾತುಗಳಲಿ
ಕಾಳಜಿಯ ಕುರುಹುಗಳಲಿ
ಛೇಡಿಸಿ ನಕ್ಕ ಕ್ಷಣಗಳಲಿ,,
ನಿನ್ನ ಚಿತ್ರದೊಳ
ನನ್ನ ಚಿತ್ರದಲಿ!

07/08/2014

ಕೆಲವು ಮನಗಳು
ತಮ್ಮ ಇರುವಿಕೆಯ
ಅರಿವು ನೀಡಲು
ಸೆಣಸಾಡುವುದು
ಅತ್ತು, ನಕ್ಕು, ಕಾಳಜಿ ತೋರಿ
ಕೊನೆಗೆ ಎದುರು ಬಿದ್ದು
ಬೇಕಾದುದು ತಮ್ಮೆಡೆಗಿನ
ಅವರ ಲಕ್ಷ್ಯವೇ ಹೊರತು
ಕನಿಕರವೂ ಅಲ್ಲ, ಪ್ರತಿಷ್ಠೆಯೂ ಅಲ್ಲ
ಜಗಳವೂ ಅಲ್ಲ, ಆದರೂ
ಸುಮ್ಮನಿರರು ಇವರು ಮೌನಿಗಳು
ಸುಮ್ಮನೆ ಗಲಬೆ ಎಬ್ಬಿಸುವರು ಮನಗಳಲಿ,,,

______________

ಅವನಿಲ್ಲದ ಈ ಹೊತ್ತು
ಬರೀ ಕತ್ತಲೆ,
ಸುಮ್ಮನೆ ಚಂದ್ರ ಲಾಂದ್ರಗಳ
ಬಿಂಬಿಸಿದೆ
ಕೆಣಕಿದರೆ ಹುಟ್ಟಿ ಬರುವನೇ
ಎಂಬ ಭ್ರಾಂತಿಗೆ!

07/08/2014

ಕವನ

ನನ್ನೊಳ ಬೆಳಕು



ನೀ ಮೆಚ್ಚುವಂತೆ ನಡೆಯೋ
ತಂತ್ರ ನಾ ಕಾಣೆ,
ಹಚ್ಚಿಕೊಂಡಿದ್ದರೆ ನಿನ್ನ ಹೃದಯ
ಎಂದೋ ಹೇಗೋ ಮೆಚ್ಚಿರಲೂಬಹುದು
ನಾನದ ನೆಚ್ಚಿಕೊಂಡಿಲ್ಲವೋ ತಂದೆ,
ಮನ್ನಿಸೆನ್ನ ಮೀರಿದ ಮಾತುಗಳ
ಕನಿಕರಿಸು ಙ್ಞಾನದ ಕಂದೀಲನು
ಇನ್ನೆಷ್ಟು ದಿನವೋ ಈ ಅಂಧಕಾರ
ನಾನಲ್ಲವೋ ಇದು, ನೀನೇ ನನ್ನೊಳ ಬೆಳಕು
ಕುಂದರಿರು ದೂರದಿರು,
ಅನುದಿನವೂ ನಿನ್ನನೇ ದ್ಯಾನಿಪೆತು
ನಂಬು ನೀನೊಮ್ಮೆ ನನ್ನ ಹರನೇ,,,!

06/08/2014

ನನ್ನ ಸಾಲುಗಳು,,,

ಹಿಂದಿರುಗಲಾರದ ಅಹಂ ಬೆಳದ

ಈ ದಿನಗಳಲ್ಲಿ,

ಹೆಜ್ಜೆ ಗುರುತ ಅಗೆದು ತೋರಿಸೊ

ಒಂದು ಹಂತ,

ನಾನೇನಾ ಆ ಸಾಲುಗಳು 

ಎನಿಸುವಷ್ಟು ಮರೆವು,

ಹೀಗೆಲ್ಲಾ ಕನಸೇ? ಕನವರಿಕೆಯೇ?!

ಹೀಗೂ ಒಬ್ಬ ಚಂದಿರ ಮಾಧವನಾಗಿದ್ದ,

ರಾಧೆಗೂ ರಮಿಸೋ ಸ್ನೇಹವಾಗಿದ್ದ,

ಎಲ್ಲಿಯೋ ರಾಮ, ಮತ್ತೆಲ್ಲೋ ಮರೆಯ ರಾವಣ,

ಕಣ್ಣೀರ ಕಾರಣವಾಗಿದ್ದೂ, 

ನೋವ ಮರೆವ ಸಾಧನಕೂ ಮಾರ್ಗವಾದ

ನನ್ನವೇ ಸಾಲುಗಳು ನನ್ನಲೇ ಹಲವು ಪ್ರಶ್ನೆಗಳು,

ನಾನು ಬದಲಾದರೂ ಬದಲಾಗದ ಆ ಸಾಲುಗಳು,

ನೋವಿನೊಂದಿಗೆ ನನಗಿಲ್ಲದ ನಿಷ್ಠೆ,

ಸಾಲುಗಳಿಗೆ ಸೋಲಿಲ್ಲದ ಪ್ರತಿಷ್ಠೆ!

ನಾ ಸೋತೆನಾದರೂ, ಸಾಲುಗಳವು

ಎಂದಿಗೂ ಗೆದ್ದಿವೆ, ಗೆಲ್ಲಿಸುತ್ತಲಿವೆ,

ರಾಧೆಗೋ ರಾವಣನಿಗೋ

ಸೋಲು-ಗೆಲವುಗಳ ಹಂಚುತ!

06/08/2014

ಕಾಲಕ್ಕೆ ಸೆಡ್ಡು ಹೊಡೆದಂತೆ
ಬರದೆ ಹೋದೆ ನೀನು,
ಬಹುಶಃ ನೀ ಬಂದ ಕಾಲಕ್ಕೆ
ನಿಲ್ದಾಣವಿಲ್ಲ ಇಲ್ಲಿ,
ಎಲ್ಲವೂ ಗೋರಿಗಳೇ,,
ನಿಲ್ಲುವುದಾದರೂ ನಿಲ್ಲು
ಗೋರಿಯಿಂದೇಳದಿಲ್ಲಿ
ಯಾವ ಭಾವವೂ
ಸಮಯವ ಗೆದ್ದು,,,

_______________________

ನಂಬಿಕೆ ಗಳಿಸಿದವರು
ಗಾಳಿಯಲ್ಲಿ ತೇಲಿಹೋದರು
ನಂಬಿ ಎನ್ನಿದಿರೇ ನೋಡುವವರು
ಎನ್ನ ಗಾಳಿಯೆಂದು ಜರಿದರು,
ಉಸಿರಿಟ್ಟ ಗಾಳಿ, ಜೀವ ತೆಗೆಯುದೇ?!
ಗಾಳಿಯೇ ನಾ ನಿನ್ನೇ ನಂಬಿಹೆನು
ಹೊತ್ತು ತಂದುಬಿಡು
ನೀ ಇಲ್ಲಿಂದ ಹೋತ್ತು ಹೋದವರ,,!
ಕಣ್ಣಿಗಷ್ಟು ನಿದ್ದೆ, ಮನಕಷ್ಟು ಶಾಂತಿ
ಎದುರಿಗಿದ್ದವರನಷ್ಟು
ನಗಿಸಿಬಿಡೋ ಹುಮ್ಮಸ್ಸು,,!

05/08/2014

ಬೆಟ್ಟದಂತೆ ನಿಂತಾಗ
ಎಲ್ಲರೂ ಬೆನ್ನಹಿಂದೆ
ಬಿಳಲಾಗಿ ಇಳಿದಾಗ
ಎಲ್ಲರ ಅಡಿಗಳ ಕೆಳಗೆ

06/08/2014

__________________

ನೀ ಬಿಟ್ಟು ಹೋದ
ಹೆಜ್ಜೆಗಳಿಗೇ ಈ ಹೊಳಪು!,
ನೀ ಜೊತೆಗಿದ್ದು ಕೈಹಿಡಿದು
ನಡೆದಿದ್ದರೆ,, ಆಹಾ!
ಅದೇನು ತಳಕು, ಬಳಕು, ಒನಪು
ಇದ್ದಿರಬಹುದೋ ಗೆಳೆಯ,
ಬೇಡವೆಂದೇ ನಡೆದೆಯೇನೋ
ನಿನ್ನದೇ ದೃಷ್ಟಿ ತಾಗಿ
ಈ ಸೋಲದ ಪ್ರೀತಿಗೆ,,!

_____________________

ತಿರುಗಿ ಬಿದ್ರೆ ನಾ ಭಯಂಕರ
ಎಂದು ಹೇಳುವರು ಬಹಳ
ತಿರುಗಿ ಬಿದ್ರೆ ಭಯಂಕರ
ಎಂದೆನಿಸುವವರು ವಿರಳ!

______________________

ಹುಡುಕಾಟದಲ್ಲೂ ಸೊಗಸಿದೆ
ಎಂದೋ ಸುಮ್ಮನೆ ಅಂದೆ
ಈಗ ಜೂಟಾಟ ಬಿಟ್ಟು ಕಣ್ಣಾಮುಚ್ಚಾಲೆ
ಆಟವಾಗಿದೆ ಪ್ರೀತಿ ನಿನ್ನದು,,,

04/08/2014

ಕವನ

ಸ್ನೇಹ,,,,

ತರಾವರಿ ಹಕ್ಕಿಗಳು

ನಾವು

ಹಾರುವುದಷ್ಟೇ

ನಮ್ಮ ಗುರಿ

ಗೂಡು ಕಟ್ಟಿ,

ಆಹಾರ ಹೆಕ್ಕಿ,

ಗುಟುಕು ಕೊಟ್ಟು

ನಿಲ್ಲುವಾಗ

ಬೃಹತ್ ಜೀವನ ಮರದ

ರೆಂಬೆಗಳಲಿ ಇಣುಕಿ

ನೋಡಿದ್ದೂ ಇದೆ

ಪಕ್ಕದ ರೆಂಬೆ ಹಕ್ಕಿ ಗೂಡು

ಒಮ್ಮೆ ಕಲೆತು ಒಮ್ಮೆ ಕಲಿತು

ಒಮ್ಮೆ ಬೀಗಿ ಒಮ್ಮೆ ಅಹಂ ತೇಗಿ

ಅತ್ತು ಕರೆದು, ತೊರೆದು ಬಯಸಿ

ಮತ್ತೆ ಮತ್ತೆ ಸೇರಿ ಸಂಭ್ರಮಿಸಿ

ನಮ್ಮ ಚಿಲಿಪಿಲಿ ನಾದಕೆ

ನಿಮ್ಮ ನಲಿವು,,

ನಿಮ್ಮ ಸಾಂತ್ವನಕೆ

ನಮ್ಮ ಗೆಲುವು,,

ಇದುವೇ ಸ್ನೇಹ ಇದುವೇ ಪ್ರೀತಿ

ಇದುವೇ ಜೀವನ,,,

ತರಾವರಿ ರೀತಿ,,,

Happy Friendship day

ಚಿತ್ರ ಕೃಪೆ; ಅಂತರ್ಜಾಲ

03/08/2014

ಕವನ

ಕಣ್ಬಾಣ,,,

ಅವಳ ಕವನದ ಕಣ್ಬಾಣಕೆ
ಅವರಾಗಿಯೇ ಎದುರಾಗಿ
ಎದೆಯೊಡ್ಡಿದ ತರುಣರು
ಅವಳಿಗೇಕೋ
ಎದುರಾಳಿಗಳಾಗಿ ಕಂಡರು,,

ಅವಳಿನ್ನೂ ಯುದ್ಧವ ಕೈಬಿಟ್ಟಿಲ್ಲ,
ಇವರೂ ಛಲವ ಕೈಬಿಟ್ಟಿಲ್ಲ,,
ಇದರ ನಡುವೆ ಅವನೂ ಬಂದೂ
ಎಲ್ಲಿಯೋ ಹೋದ,,

ಹುಡುಕಲೂ ಈಗ ತಾಳ್ಮೆಯಿಲ್ಲ,
ಸಿಕ್ಕರೂ ಈಗ ಕಾಲವಿಲ್ಲ,,
ಆದರೂ ಕವನಕ್ಕೇನು ಕಣ್ಣಿನ ಅಭಾವಲಿಲ್ಲ!!

02/08/2014

ಕವನ

"ನೀನು"

ನನ್ನೆಲ್ಲಾ ಆಲಾಪಗಳಿಗೆ
'ನೀನು' ಎನ್ನುವುದಷ್ಟೇ 'ಅಂಕಿತ',
ಬದಲಿ ಹೆಸರ ನೀಡಲಾರೆ
ಅವರಿವರದು;

ನೀನೋ ನನಗೆಂದೂ
ಸಿಗದಿದ್ದರೂ ಸರಿಯೆ,
ಸಂಧಿಸಿ ನಿರಾಶೆ ಮಾಡದಿರು,
'ಅಮೋಘ'ವೆಂಬ ಎನ್ನೆದೆಯ
ನಿನ್ನ 'ಪ್ರತಿಬಿಂಬ' ಮಂಕಾಗುವಂತೆ,

'ನೀನು' ನನಗೊಂದು ದೂರದ 'ದೀಪ'
ನಿನ್ನ ಸಂಙ್ಞೆಯಷ್ಟೇ ಸಾಕು
ಈ ಹಾದಿಗೆ,,, ಈ ಜನ್ಮಕೆ,,,

01/08/2014

ಮುನಿಸು ಸಾಧಿಸೊ
ಪ್ರೇಮವೂ ಹಿತವೇ,
ಮುನಿಸ ಸಂಭಾಳಿಸೋ
ಸ್ನೇಹವೂ ಇನಿತು ಹೆಚ್ಚೇ ಇನಿ,,

02/08/2014

____________________

ಎನ್ನನೇ ಪ್ರೀತಿಸಬೇಕೆಂದು
ತಪಸ್ಸು ಕುಳಿತಂತಿದೆ
ನಿನ್ನ ಮೌನ,,!!

01/08/2014

ಕವನ

ಈ ಸ್ನೇಹ,,,,

ನೋಡುತಾ ನೋಡುತಾ
ನಾ ನಿನ್ನೇ ನೋಡುತಾ
ನಿನ್ನ ಬೆರಗು ಮಾತನಾಲಿಸುತ,
ನಕ್ಕ ನಿನ್ನ ಹಾಗೆ ನಾನೂ ನಗುತ
ಹೇಗೋ ಇಷ್ಟವಾದೆ ನೀನಂದು,

ಇಂದು ಕಾಣದೇ ಕಾಡುತ
ಮೌನವ ತಾಳುತ
ಗತವಾಗಬಯಸಿಹೆ ಏನು?!
ಆಗದೊ ಗೆಳೆಯ,
ಈ ಸ್ನೇಹ ಸುಲಭವಲ್ಲವೊ
ತಿಳಿದಂತೆ ಒಡೆಯಲು
ವಿನಾ ಕಾರಣ ದೂರ ಸರಿಯಲು!

ಪ್ರೀತಿಗಾದರೂ
ಹಮ್ಮು-ಬಿಮ್ಮಿರಬಹುದು
ಮೋಹ ತೊರೆದ ಬಂಧವಿದು
ಪರಸ್ಪರ ಸಂತಸ ನೆಮ್ಮದಿಗಳಷ್ಟೇ
ಕಾಳಜಿಯಿದೆ ಪ್ರೀತಿಯಿದ್ದರೂ
ಈ ಬೆಸುಗೆಯಲಿ,,
ನಮ್ಮೀ ಮೈತ್ರಿಯಲಿ!!

31/07/2014

ಈ ಒಡೆದ ಮನಸು
ನಿನ್ನೊಳಗೂ ಉಳಿದಂತೆ
ಕಣ್ಣೀರಾದ ಹೊತ್ತು
ನೀನಿನ್ನೂ ನನಗೆ ಹತ್ತಿರ!

31/07/2014

__________________

ಮನಸ್ಸು ಓಡದಿದ್ದಾಗ
ನಾನೇ ಓಡುತ್ತೇನೆ
ಉಷ್ಣವೇರಿಯಾದರೂ
ಮಂಡೆ ಬಿಸಿಯಾಗಿ
ಹೃದಯ ಕರಗಬಹುದೆಂದು
ಇನ್ನೆಷ್ಟು ಕಾಲ ಹೀಗೆ ಹೆಪ್ಪಾಗಲಿ
ನಿನ್ನ ವಿರಹದಲಿ,,,

30/07/2014

________________________

ಕೋಪಕ್ಕೂ ಕಾರಣ ಪ್ರೀತಿಯೇ
ನಿನ್ನ ಅತಿಯಾಗಿ ಹಚ್ಚಿಕೊಂಡ ಕಾರಣಕ್ಕೆ
ನಿನ್ನ ಮೇಲೆ ನನಗೆ ಅಷ್ಟೇ ಕೋಪ
ನೀ ನನ್ನೆದುರು ಇನ್ನೂ ಬಾರದಿರೆ,
ನಾನೆಲ್ಲೇ ನಡೆದು ಹೋದರೂ
ಹಿಂಬಾಲಿಸೋ ನಿನ್ನ ಮಾತುಗಳ ಮೇಲೆ
ಕನಸಿಗೂ ತೂರಿ ಕೆಣಕೊ ನಿನ್ನ ಮೌನಕೆ
ಹೌದು ಕೋಪವೇ ನನ್ನ ಹುಟ್ಟು ಗುಣ
ಬಹುಶಃ ನಾ ತುಂಬಾ ಪ್ರೀತಿಸುವವಳೇನೋ,,,!!

29/07/2014

ಮನದ ಮಾತು

ಙ್ಞಾನೋದಯ,,,, ;-) 



ಇಂದು ಬೆಳಗ್ಗೆ ಎಚ್ಚರವಾಗಿ ಕಣ್ಬಿಟ್ಟಾಗ, ಏಕೋ ಏನೋ ಗೊತ್ತಿಲ್ಲ ಅಳು ಉಮ್ಮಳಿಸಿ ಬಂತು. ನನಗೇಕೆ ಅಳು ಬರ್ತಾ ಇದೆ ಅದೂ ಬೆಳಬೆಳಗ್ಗೆ?! ನನಗೇ ಗೊಂದಲ, ಕಾರಣವೂ ತಿಳಿಯುತ್ತಿಲ್ಲ.

ಹೌದು, ಮನಸ್ಸು ತೀರ ನೋವಿನಲ್ಲಿತ್ತು. ಆದರೆ ನಿದ್ದೆಯಿಂದೆದ್ದ ಮನಕ್ಕೆ ಯಾವುದಾ ನೋವು ಎಂದೂ ತಿಳಿಯಲಿಲ್ಲ. ಸುಮ್ಮನೆ ಹಾಗೆಯೇ ಮಲಗಿ ಹಿಂದಿನ ದಿನದ ವಿಚಾರಗಳನ್ನೆಲ್ಲಾ ನೆನಪು ಮಾಡಿಕೊಳ್ಳ ತೊಡಗಿದೆ. ದಿನವೆಲ್ಲಾ ಚೆನ್ನಾಗಿಯೇ ಇತ್ತು, ಯಾರೂ ನನ್ನ ಬೈದಿರಲಿಲ್ಲ, ನಾನೂ ಯಾರಿಗೂ ಬೈದಿರಲಿಲ್ಲ, ಯಾವ ಜಗಳವೂ ಇರ್ಲಿಲ್ಲ. ಹೀಗಿದ್ದೂ ಯಾಕೆ ಈ ದುಃಖ?! ಎಂದು ಯೋಚನೆಯಾಯ್ತು,, ಹಾ,, ದಿನದ ಕೊನೆಯಲ್ಲಿ ಮಲಗುವ ಮುನ್ನ ನಾನೊಂದು ಸಿನೆಮಾವನ್ನು ಅರ್ಧ ನೋಡಿ ಮಲಗಿದ್ದೆ. ಮಿಕ್ಕದ್ದು ನಾಳೆ ನೋಡಿದರಾಯ್ತು ಎಂದು. ಸಿನೆಮಾ ''ಸಿಂಪಲ್ಲಾಗ್ ಒಂದ್ ಲವ್ ಸ್ಟೋರಿ". ಸಿನೆಮಾ 'ಸೂಪರ್' ಅಂತ ಎರಡನೇ ಬಾರಿ ನೋಡೋ ಆಸೆಯಾಗಿತ್ತು. ಎಲ್ಲಾ ಡೈಲಾಗ್ನೂ ಸಕ್ಕತ್ ಎಂಜಾಯ್ ಮಾಡ್ತಾ ಇದ್ದೆ. ನನ್ನದು ಮೊದಲೇ ಆಳವಾದ 'ಇನ್ವಾಲ್ಮೆಂಟ್!' ಬೇರೆ ;-) . ಹಾಗಾಗಿ ಹೀಗಾಗಿರಬಹುದೇನೋ ಅಂತ ಅಂದ್ಕೊಂಡೆ.

ಸಿನೆಮಾ ನಿಲ್ಲಿಸಿದಾಗ ಹೀರೋ ತನ್ನ ನೊಂದ ಲವ್ ಸ್ಟೋರಿಯನ್ನು ಹಿರೋಯಿನ್ಗೆ ಹೇಳ್ತಾ ಇದ್ದ,,, ''ಒಗ್ಗರಣೆಗೆ ಕರಿಬೇವ್ನ ಹಾಕಿದ ಸೌಂಡಂತೆ ಅವಳು ಬಂದ್ಲು'' ಎನ್ನುವಲ್ಲಿಗೆ ನಿಲ್ಲಿಸಿ ಮಲಗಿದ್ದೆ. ಅದೇ ಫೀಲ್ನಲ್ಲಿ ಮಲಗಿದ್ದು ಹೀಗೆ ದುಃಖ ಆಗಿದೆ ಅಂತ ಬೆಳ್ಳಂಬೆಳಗ್ಗೆ ಙ್ಜಾನೋದಯವಾಯ್ತು.

''ಕಾರಣ ಗೂತ್ತಾದ ಮೇಲೆ ಪರಿಹಾರ ಹುಡುಕಲ್ವಾ ನಾನು?!'', ಅಂದ್ಕೊಂಡು ಸರಿ ಇವತ್ ರಾತ್ರಿ ಪೂರ್ತಿ ಸಿನೆಮಾ ನೋಡಿ ಖುಷ್ಯಾಗ್ ಮಲಗೋಣ ಎಲ್ಲಾ ಸರಿ ಹೋಗುತ್ತೆ ಅಂದ್ಕೊಂಡು ಕೆಲಸಕ್ಕೆ ರೆಡಿಯಾದೆ.. ಈ ದಿನ ನಿಜವಾಗ್ಲೂ ಫುಲ್ ಖುಷ್ಯಾಗೇ ಇತ್ತು...

ಇದನ್ನೆಲ್ಲಾ ಯಾಕೆ ಹೇಳೋ ಪ್ರಯತ್ನ ಅಂತ ಅನಿಸ್ಬೋದು ನಿಮಗೆ. ''ನಮ್ಮ ಮನಸ್ಸನ್ನು ನಾವು ನಡೆಸಬಹುದು, ದುಃಖದಿಂದ ಸಂತಸದೆಡೆಗೆ''. ಇದು ಸಾಧ್ಯವೆಂದು ಹೇಳಲು 'ಒಂದು ಫ್ರೆಶ್' ಉದಾಹರಣೆ!!,,,,,,,

ಇದೊಂದು ಸಣ್ಣ ನೋವೇ ಇರಬಹುದು,, ಅದರ ಅನ್ವಯ ದೊಡ್ಡ ಆಘಾತಗಳಿಗೂ ತರಬಹುದು,, ಆದರಲ್ಲಿ ಮನಸ್ಸನ್ನು ನಡೆಸುವ ನಮ್ಮ ಪ್ರಯತ್ನ ಪ್ರಾಮಾಣಿಕವಾಗಿರಬೇಕು, ಈ ಕ್ರಿಯೆಯಲ್ಲಿ ಸೋತಾಗ, ಆ ಸೋಲನ್ನೇ ಸೋಮಾರಿತನವಾಗಿ ಮುಂದುವರೆಸದೆ ಕಾರ್ಯಪ್ರವೃತ್ತರಾದರೆ ಖಂಡಿತ ಎಲ್ಲವೂ ಸಾಧ್ಯ.

ಮನವು ಒಮ್ಮೊಮ್ಮೆ ಅಸಾಧ್ಯ!

.......... ಎನ್ನುವುದು ನನ್ನ ಮಾತು,,, :-)

28/07/2014

ಕವನ

ಹೆಣ್ಣಿನೊಳ ಆ 'ಶೂರ್ಪಣಖಿ'


ಈ ಸೌಂದರ್ಯ
ಈ ಮಾದಕತೆ
ಈ ಯೌವ್ವನ,,
ಇದ್ದಷ್ಟು ಕಾಲವಷ್ಟೇ!

ಅದ ತಿಳಿದೋ ತಿಳಿಯದೆಯೋ
ಅವುಗಳನ್ನೇ ರಮಿಸಿ
ಅಹಂಮ್ಮಿನ ಎದೆಗೊರಗಿ
ಕಣ್ಣಲ್ಲೊಂದು ಆಸೆ
ಹೃದಯದಲ್ಲೊಂದು ಬಯಕೆ!

ಎಷ್ಟು ಮೋಹಕತೆಯೋ ಏನೋ
ಮನದ ವಿಕೃತಿಯೊಂದೇ ಸಾಕಿತ್ತು
ಹೆಣ್ಣು;
ಸೌಂದರ್ಯವಿದ್ದೂ ಶೂರ್ಪಣಖಿಯಾಗಲು!

ಪ್ರತಿಯೊಬ್ಬ ಗಂಡಿನಲ್ಲೂ
ಒಬ್ಬ ಯಯಾತಿಯಂತೆ
ಪ್ರತೀ ಹೆಣ್ಣಿನಲ್ಲೂ ಆಗೊಮ್ಮೆ ಈಗೊಮ್ಮೆ
ರಾವಣನ ಸೋದರಿ!

ತಾನೇ ಕಂಡುಕೊಂಡ
ಕೈಗನ್ನಡಿಯ ಸತ್ಯ!
ಒಮ್ಮೊಮ್ಮೆ ಅಷ್ಟೇ
ಹೊಳೆವುದು!

27/07/2014

ಕವನ

ಪ್ರೀತಿ,,,


ಪ್ರೀತಿ ಎಂಬುದು
ಆಸೆಗಳನ್ನು ಮೀರಿದ್ದು
ಪ್ರೀತಿಯೇ ಆಗಿದ್ದರೆ
ಅದು ಕಾಮಕ್ಕೆ ಹೊರತು

ಕಾಮಕ್ಕೆ ವ್ಯಾಪ್ತಿಯುಂಟು
ಪ್ರೀತಿಗಿಲ್ಲ ಯಾವುದೇ ಬೇಲಿ
ಕಳೆದುಕೊಂಡ ಭಾವವೂ ಬಾಧಿಸದು
ಪ್ರೀತಿಗಷ್ಟೇ ನೀ ಸೋತಿದ್ದರೆ,,

ಕಾಮದ ನಶೆಯನ್ನೆಲ್ಲಾ ಪ್ರೀತಿ ಎನ್ನದಿರು
ಪ್ರೀತಿಗಿರುವುದು ಬರೀ ಎಚ್ಚರಗಳು
ಕಾಳಜಿ, ಮಮತೆ, ತ್ಯಾಗಗಳು
ತಲೆ ಚಿಟ್ಟು ಹಿಡಿಸೋ ಕಾಮನೆಗಳಲ್ಲ

ಪ್ರೀತಿಯೊಳು ನೀನಿಂತು ಅರಸದಿರು
ದೂರದ ಮೋಹ ತೀರಗಳಲಿ
ಪ್ರೀತಿಯೇ ನಿನ್ನೆದೆಯಂತೆ
ಅದರೊಳು ನೀ ನೆಟ್ಟ ಹೂ
ಶಾಂತಿ ಕಂಪ ಬೀರುವಂತೆ,,

ನಶೆಯಲ್ಲವೋ ಗೆಳೆಯ
ಪ್ರೀತಿಯೊಬ್ಬ ತಾಯಿಯಂತೆ!

27/07/2014

ಬಹುಶಃ
ಎಲ್ಲವ ಕಳೆಯುವವರೆಗೂ
ಪಡೆದುದರ
ಅರಿವಾಗದೇನೋ
ಮನಕೆ..
ಈ ಕೊಂಕು ಮನಕೆ

___________________

ಭಾವಕ್ಕೊಂದು ಮಾತಿದೆ
ನೋವಿಗೊಂದು ಭಾಷೆಯಿದೆ
ಮೂಕ ಪ್ರೇಮಿ ನಾನು
ನಕ್ಕರೂ ನಾದ, ಅತ್ತರೂ ಲಯ
ಇನ್ನೇನಿದೆ ಇದಕೂ ಮೀರಿ ಸಂತಸ
ಪ್ರೀತಿಯೆಂಬ ಕನಸೇ ಕೂಸು!

26/07/2014

ಕವನ

ಇವನು ಕೃಷ್ಣನಲ್ಲ,,,

ನಿನ್ನದು ಚೆಂದವಾದರೆ
ನನ್ನದು ಸೊಬಗು
ನಿನ್ನದು ಮುಗುಳ್ನಗೆಯಾದರೆ
ನನ್ನದು ಮುಕ್ತ ನಗು

ನೀನು ಕಂಡು ಬಿಟ್ಟು ಹೋದೆ
ನಾನು ಕಾಣದೆ ಕಾದು ನಿಂತೆ
ನೀನ್ಯಾರಿಗೊ ರುಕ್ಮಿಣಿ
ನಾನೋ ನೊಂದ ರಾಧೆ
ಇವನೊಬ್ಬ ಬೇಟದ ಜೀವ

ನಿನ್ನ ಹೋಗಬಿಟ್ಟು, ನನ್ನ ಕಾಯಬಿಟ್ಟ
ಮಧ್ಯೆ ಮೌನವಹಿಸಿದ್ದಾನೆ
ಸುಮ್ಮನಿರು ಗೆಳತಿ,
ನಿನಗೊಬ್ಬ ಶ್ರೀ ಕೃಷ್ಣ ರಾಜನ
ನನಗೊಬ್ಬ ಕಳ್ಳ ಕೃಷ್ಣನ
ಹುಡುಕಿ ಕೊಡುವನೇನೋ ಇವನು

ಬಿಂಕವೆಂಬ ಮಡಿಕೆಯ ಒಡೆದು
ಸಲುಗೆಯೆಂಬ ಭಾವ ಸುಲಿದು
ಸುಲಭಕೆ ಎನ್ನ ಮನವ
ಇವನೆಡೆಗೆ ಹರಿಸಿಕೊಂಡ
ಈ ಕಲಿಯ ಪಶ್ಚಾತ್ತಾಪಕೆ!
ಗಳಿಸಿ ಅಳಿಸಿದ ಖುಷಿಯ ಕಾಲಕೆ!

26/07/2014

'ಭೀಮನ ಅಮಾವಾಸ್ಯೆ'ಯ ದಿನ;

ಮಗಳು ಆಫೀಸಿನಿಂದ ಮನೆಗೆ ಬೇಗ ಬಂದಿದ್ದಾಳೆ, ಬಂದವಳೇ ಗಮನಿಸಿದ್ದು ದೇವರು ಮನೆಯಲ್ಲಿ ಉರಿಯುತ್ತಿದ್ದ ದೀಪಗಳು.

ಓಹ್!,, ಅಂದುಕೊಂಡಳು.
ಬೆನ್ ಹಿಂದೆಯೇ ಬರುತ್ತಿದ್ದ ಅಪ್ಪನಿಗೆ ಮುಖಮಾಡಿ ಕೇಳಿದಳು,,
ಕೆಣಕುತ್ತ,,,

"ಆಯ್ತಾ ಪೂಜೆ?"  ,,, ;-)

ಅಪ್ಪ ಕೈಮುಗಿಯುತ್ತ, "ಹ್ಮೂ,, ನೋಡಲ್ಲಿ ದೇವರು ಮನೆಯಲ್ಲಿ ದೀಪಗಳು ಉರಿತಿವೆ!! :-) ಎಂದರು.

"ಅದಲ್ಲಪ್ಪಾ,, ನಿಂಗ್ ಪೂಜೆ ಆಯ್ತಾ? ಅಂದೆ"  ,,

"ಓ,, ನಾನ್ ಹುಟ್ದಾಗಿಂದನೂ ಪೂಜೆ ಆಗ್ತಾನೇ ಇದೆ"  ,,

" ಆ,,!! ನೀನ್ ಹುಟ್ದಾಗ್ಲೇ ಮದ್ವೆ ಆಗ್ಬಿಟ್ಟಿದ್ದಾ,,,,,,,?!! :-O
,,,,,,,,,,,,,,ಕಳ್ಳ ನೀನು!!"  ;-) :-)

:-D

ಓಡುವ ಪ್ರಿಯ,,,, 

ಓಡುವ ಮೋಡವು 
ಮೋಹಕವೇ
ಓಡೋ ನದಿಯೂ
ಹಾರೋ ಹಕ್ಕಿಯೂ
ಇವುಗಳ ಬಯಸಿ
ಕೈ ಬೀಸಿ 
ಕರೆವ ಹಂಬಲವೂ
ಹೆಚ್ಚು ಪ್ರಿಯವೇ,

ಆದರೇಕೋ 
ಕೈ ಕೊಡವಿ ಓಡುವ
ಪ್ರಿಯನ
ಹಂಬಲಿಸೊ
ಹುಂಬತನವೇಕೋ
ಒಲಿದು ಬರಲಿಲ್ಲ,
ಇದನು ನೀ ಅಹಂ ಎಂದರೆ
ಬಿಡು ನನಗೀಗ 
ಒಂಟಿತನವು

ಅಭ್ಯಾಸ!!! 

24/07/2014

_________________

ಅನುದಿನವೂ ನಿನ್ನನೇ 
ಕನಸಾಗಿಸಲು
ದಿನದ ದಣಿವೆಲ್ಲಾ 
ಮರೆಯಾಗಿ
ಹೊಸ ಹುಮ್ಮಸ್ಸನ್ನು
ತುಂಬಿಕೊಳ್ಳತ್ತಿರೆ,
ನೀನೊ ನನಗೊಂದು 
ಸುಖನಿದ್ರೆಯಂತೆ!,
ಕಣ್ಣಿಗೆ ನಿಲುಕದೆ, 
ಕನಸಿಗೆ ತೂರಿ
ಮನಸಿಗೆ ಇನ್ನಿಲ್ಲದಂತೆ 
ಹತ್ತಿರಾದೆ,,
ಮನದ ಭಾವಕ್ಕೊಂದು

ರೂಪವಾದೆ,,!

________________

ಆಷಾಢ ಗಾಳಿಗೆ
ಒಳಗೊಳಗೇ ಬೆಂಕಿ ಹಚ್ಚಿಸುವ
ಹುನ್ನಾರ ಗೊತ್ತಿದೆ;
ಅದಕ್ಕೇ ಈಗೀಗ 
ಎಲ್ಲೆಲ್ಲೂ ಜಟಾಪಟಿ!
ಕಾರಣಗಳೂ
ಆ ಅದೇ ಕಿಚ್ಚುಗಳು,,!

23/07/2014

ಚುಕ್ಕಿ ಚಂದ್ರಮರೆಲ್ಲಾ
ನಾಚುತ್ತಿದ್ದಾರೆ
ನನ್ನ ಕಳ್ಳಾಟಕ್ಕೆ;
ಒಮ್ಮೆ ಹೊಳೆದು, ಚುಕ್ಕಿ ಮಿಂಚಿ
ಮತ್ತೆ ಮತ್ತೆ ಹುಣ್ಣಿಮೆಯ ಸಾಲು,
ಅಮಾವಾಸ್ಯೆಯ ವಿರಹವನೂ
ದೂಡಿರುವೆ,
ಹಚ್ಚಿ ನಿನ್ನ ನೆನಪ,,!

23/07/2014

ದೇವ ಲೋಕದಿಂದ ವಿಶೇಷ ಸೂಚನೆ
ದೇವೇಂದ್ರ;
ಭೂಲೋಕ ಕವಿ ಜನರ ಹೊರತು
ಮಿಕ್ಕೆಲ್ಲಾ ಕವಿಯ ನಕಲುಗಳು
ಸ್ವರ್ಗಕ್ಕೆ ಅಡಿಯಿಡಲನುಮತಿ ಇಲ್ಲ
ಕಾರಣ,
ನಕಲಿ ಕವಿಗಳು
ಸುಳ್ಳಾಡೋ ಕವಿಗಳ ಮೀರಿ
ಸುಳ್ಳುಲಿವ ಪೈಪೋಟಿಯಲ್ಲಿದ್ದಾರೆ,, !
ಕಂಗಾಲಾದ ಕವಿಗಳು
ನರಕವನ್ನು ಸ್ವರ್ಗವೆಂದರೆ,
ನಕಲಿ ಕವಿಗಳು ದೇವೇಂದ್ರನನ್ನೇ ಯಮನೆಂದು ಹೇಳಿ
ಯಮನನ್ನು ಅಲ್ಲಿ ಖುಷಿಪಡಿಸುತ್ತಿದ್ದಾರೆ!!

(ಅದರಲ್ಲೂ ಆ ದಿವ್ಯ! ;-) :-)  )

22/07/2014

_____________

ಮನಸ್ಸು
ಪ್ರೀತಿಸುವವರೆಗೂ
ಮುನಿಸುತ್ತದೆ,
ಪ್ರೀತಿಸಿದ ಮೇಲೆ
ಕೊಸರುತ್ತದೆ!
ಅದು ಅವನದು,
ಮುನಿಸಿ,ಕೊಸರಿ
ಮತ್ತೂ ಉಸಿರಾಡಿದೆ
ಈ ಎದೆಯೊಳು,, !

22/07/2014

______________

ತಡವಿದ್ದಷ್ಟೇ ಹೃದಯ
ಎಂಬ ಭ್ರಮೆಯಾಯ್ತು,

ಪ್ರೀತಿ ನೀನದೋ ವಿಶಾಲ
ನಿನ್ನ ಕಿರು ಬೆರಳಿನುಗುರಷ್ಟೇ
ತರಚಿದ್ದು ಇನ್ನೂ!

ಬಿಡು, ನೀ
ಸನಿಹವಿರುವೆ
ಎಂಬ ಖಾತ್ರಿಯಾಯ್ತು!

21/07/2014

ಕವನ

ಕವನ,,



ಕಡಲ ಕಲಕಿದರೆ ಸುನಾಮಿ
ಭಾವ ಕದಲಿದರೆ ಬೇನಾಮಿ

ಅನಾಥವದೋ ಭಾವಗಳು,
ಕಡಲೊಡಲ ಮುತ್ತೆಲ್ಲಾ
ಅಲೆಯೊಡಪ್ಪಳಿಸೊ ಕಲ್ಗಳೊ
ಕಣ್, ಕಿವಿ, ಮೂಗ್ಗಳಿಗೆ ಘಾಸಿ,,

ಕಡೆ ಕೈ ತುದಿಯೊಳೇ ನಲಿದಿದ್ದರೂ
ಹೃದಯದಾಳದ ಮಧುರ ಗೀತೆ
ಅರಿತು ಅಂಗೈಲಾಡಿಸೋ ಪೋರ
ಅರಿಯದೇ ಕಂಗಾಲಾದ ಕವಿತೆ!

ಪುಟ್ಟಿಸಿದ ದೇವ ಹುಲ್ಲು ಮೇಯಿಸನೇ?!
ಕೈಯೊಳ ಕವನ ಆದರೂ ಆದೀತು ಮುಂದೊಮ್ಮೆ ದವನ!!

20/07/2014

ಮನದ ಮಾತು

ಎಲ್ಲೋ ಕೇಳಿದ್ದು, "ಬೆಕ್ಕಿಗೆ ಒಂಭತ್ತು ಜೀವ" ಅಂತ. ಇರಬಹುದೇನೋ ಸಾವಿನ ಅಷ್ಟು ಪ್ರಯತ್ನಗಳ ನಂತರವೂ ಒಂಭತ್ತನೇಯ ಬಾರಿಯೂ ಜೀವ ಬದುಕುಳಿವುದು. ಇದನ್ನು "ಛಲ''ವೆನ್ನಬಹುದೇನೋ... :-)
ಮಹಾನ್ ಬುದ್ದಿಜೀವಿಯಾದ ಮನುಷ್ಯನು ಅಲ್ಪಾಯುಷಿ ಈ ಪ್ರಾಣಿಗಳಿಂದ ಜೀವನಪರ್ಯಂತ ಕಲಿಯುವುದಿದೆ.
ಪ್ರವಾಹದೆದುರಿನ ಈಜು , ತಿರಸ್ಕಾರಗಳ ನಂತರದ ಬದುಕು, ಹೀಗೆ ಮತ್ತೆ ಮತ್ತೆ ಬದುಕುವುದು ಒಂದು ರೋಚಕವೇ ಸರಿ

ಸೋಲಬಹುದು, ನಿಲ್ಲಬಾರದು,,, :-)

20/07/2014

ದೂರಲು
ದೂರ ಮಾಡಲು
ಪ್ರೀತಿಗೇನು ರೀತಿಯೇ ಇಲ್ಲವೆ?

ಕಾರಣವಿಲ್ಲದೆ
ಇಲ್ಲ,
ಇಲ್ಲದ ಕಾರಣಗಳ ನೆಪ ಮಾಡಿ
ಸತಾಯಿಸುವ ಕಸರತ್ತಿಗೆ
ಮತ್ತೂ ಪ್ರೀತಿಯೇ ಬಹುಮಾನವೇ?!

___________________________________

'ಟ್ರೈನ್ ಹೋದ ಮೇಲೆ ಟಿಕೇಟ್ ತಗೊಳ್ಳೋದು'
ಕೇಳಿ ಮಜವೆನಿಸಿತ್ತು,,

ನಾನೂ ನೋಡೋಣ ಎಂದುಕೊಳ್ಳುತ್ತಿದ್ದೆ
ನನ್ನ ಸರದಿ ಬಂದಾಗ,
ಟಿಕೇಟ್ ಕೊಡುವವರೂ
ಅದೇ ಟ್ರೈನ್ ಹತ್ತಿ ಹೋಗಿದ್ದರು!!

ನೆನಪಿಗಾದರೂ ಕಳೆದ ಟ್ರೈನ್ನ ಟಿಕೇಟೂ ಇಲ್ಲವಾಯ್ತು,,,

__________________

ಕಣ್ಣು ಕಟ್ಟಿ
ತಿರುಗಿಸಿ ಬಿಟ್ಟಂತೆ
ಈ ಮನ,
ದಿಕ್ಕಿತ್ತು
ಈಗ ಕಾಣಲೊಲ್ಲದು
ಕೈಯಾಸರೆ ಬೇಡಿದೆ
ಮುಂದಡಿಯಿಡಲು
ಕೈ ನೀಡೆಯಾ ತಂದೆಯೇ,,,,

19/07/2014

ಕವನ

ಬದುಕು,,,

ಬದುಕು ಒಮ್ಮೊಮ್ಮೆ ಹೀಗೆಯೆ

ಮಿಂಚು ಮಳೆ!

ಬರಡು ಹೃದಯ ಬೆಂಕಿಯಲಿ ಬೇಯ್ವ ದುರಂತ!

ಮಳೆಯಾಸರೆಯ ಆಸೆ ಇದ್ದ ಮನಕೆ 

ಮೋಡದ ಮರೆಯ ಬೆಳ್ಳಿ

ಅಂಬರದಿಂದಿಳಿದು ನೇರ ಎದೆ ಸೀಳೋ 

ಅಂಬುವೇ ಆದರೂ

ಮೌನದಿ ಸಹಿಸೋ ಹಂತ!

ಜೀವನವಿದು ಸುಲಭಕೆ ಕೊನೆಗೊಳ್ಳದ ಹೆದ್ದಾರಿ

ಆಗಾಗ ಈ ಕವಲುಗಳೋ 

ಒಮ್ಮೆಲೇ ದಿಗ್ಭ್ರಮೆಗೊಳಿಸಿರಲು

ಕಾಲನ ಕೈಯೊಳು ತೂಗೋ 

ತೊಟ್ಟಿಲ ಮರಿಗಳು ನಾವು

ತೂಗಬೇಕು ಇನ್ನೂ ತೂಗಿಕೊಳ್ಳಬೇಕು 

ನಮ್ಮ ನಮ್ಮ ತೊಟ್ಟಿಲುಗಳ

ಬೆಳೆದು ನಿಲ್ಲುವವರೆಗೂ

ಕತ್ತಲು ಕಳೆವವರೆಗೂ

ಮಿಂಚು ಮರೆಯಾಗೋವರೆಗೂ

ತತ್ತರಿಸದೆ,,

ಹೀಗೆಯೇ ಬಂಡೆ ಕಲ್ಲುಗಳಂತೆ,,!! 

ಮಿಂಚಿಗೆ ಮಿಂಚಾಗಿ, ಬಂಡೆಗೆ ಬಂದೆಯಾಗಿ

ಮಳೆಗೆ ಮಳೆಯಾಗಿ, ಗಾಳಿಗೆ ಬಿರುಗಾಳಿಯಾಗಿ

ಹಾಗೆಯೇ ಹೂವಿಗೆ ಹೂವೇ ಆಗಿ,,,,

ಮನವಿನ್ನೂ ಹದಗೊಳ್ಳಬೇಕಿದೆ

ಈ ಮಳೆ, ಮಿಂಚು, ಮೋಡಗಳ ಬಯಕೆಗಳಲಿ

ಬಾಯಿಬಿಟ್ಟ ಬರಡು ಬಾವಿಯ ಬಾಯಾರಿಕೆಗಳಲಿ

ಈ ಹದಗಳಲಿ 

ಟಿಸಿಲೊಡೆವ ಚಿಗುರ ಕನವರಿಕೆಗಳಲಿ,,

ಚಿತ್ರ ಕೃಪೆ; ಅಂತರ್ಜಾಲ

ದಿವ್ಯ ಆಂಜನಪ್ಪ

15/07/2014

ಸತ್ಯವೆಂಬುದು
ಮರಳೋಳ
ಹೂತ ಅಸ್ತಿ
ಗಾಳಿ
ತೀಡೋವರೆಗೂ
ಗೌಪ್ಯ,,!

__________________

ಕೈಗೆಟುಕಿದ್ದರೆ
ಹೀಗೆ ಕಟ್ಟಿಕೊಳ್ಳುತ್ತಿರಲಿಲ್ಲ
ಕನಸು;
ಇಲ್ಲದ್ದೇ ಬಯಸುವುದು,
ಇಲ್ಲದ್ದೇ ಹಂಬಲಿಸುವುದು
ಆದರೂ
ಸಿಗಲೊಲ್ಲದು
ಬೇಡಿಕೆ ನಿರಂತರ ಕಾಯ್ದಿರಿಸಲು
ಕಾಣೋ ಹಿತವೆಲ್ಲಾ ನಿಜವಲ್ಲಾ,
ಅಹಿತಗಳ ಸುಲಭಕೆ ಹರವಲಾರದು
ಈ ನಿರಾಶ್ರಿತ ಮನ,
ಜಿಗಿಯೊ ಜಿಂಕೆಗೆ
ಕೊಂಬೇ ಅದರ ಗರ್ವ,
ಅಷ್ಟೇ ನಯವಾದ ಚುಕ್ಕಿ
ಮೈಯೆಲ್ಲಾ ಕಣ್ಣಾದ ಭಯವಿದೆ,,
ಓಟ ಬಯಸಿದ್ದು ನಿಜವೇ
ಜೀವನವೆಲ್ಲಾ ಓಟವಾಗುವ ಕಲ್ಪನೆಯಿರಲಿಲ್ಲ,,

_______________


'ನೀ ನನಗಿಷ್ಠ'
ಎಂದು ಹೇಳಿಬಿಡುವುದು
ಅಷ್ಟು ಸುಲಭದ ಮಾತಾಗಿದ್ದರೆ
ಅಷ್ಟೆಲ್ಲಾ ಪ್ರಾಸಬದ್ದ ಆಲಾಪನೆ,
ನಿನ್ನ ಮಳೆಗೋ ಮೋಡಕೋ
ಆಹ್ವಾನಿಸಿ
ಅದರೊಳು ಮಿಂದು
ಶೀತವೇರಿದಂತೆ
ನಶೆಯ ಉಪಮೆಗಳು
,,,,
ಕಾಮನಬಿಲ್ಲೇ,
ತಿರುತಿರುಗಿ ನಿನ್ನಡೆಗೆ
ಮತ್ತೂ ವಾಲುವ ಹಂಬಲವಾದರೂ
ಏಕಿತ್ತು,,
ಹೇಳುವುದು ಅಷ್ಟು ಸುಲಭವಿದ್ದಿದ್ದರೆ,,,

17/07/2014

_____________

ನನಗೂ ಈಗೀಗ
ಕೋಪ ಹೆಚ್ಚು
ಅದಕ್ಕೆ
ಮುಖವು ಸೊಟ್ಟಕೆ
ನಿಮ್ಮವೂ ಬುದ್ದಿ ಅತಿರೇಕ
ಅದಕ್ಕೆ
ತಲೆಯು ಸೊಟ್ಟಗೆ

____________________

ಜೀವನದಿಂದ ಹೀಗೆ ಯಾರೋ
ಹೊರ ನಡೆಯೋ ವಿಚಾರದಲ್ಲಿದ್ದರೆ
ನನಗದರ ಪರಿವೇ ಇರುವುದಿಲ್ಲ;
ಅವರು ಹೊರಟ ಮೇಲಷ್ಟೇ ನನಗೆ ಎಚ್ಚರ
ಕುರುಡು ನಂಬಿಕೆಯೋ ಏನೋ
ಸುಮ್ಮನಿದ್ದುಬಿಡುತ್ತೇನೆ;
ಬಹುಶಃ ಹೊರಟ ಅವರ ಸದ್ದು
ನನ್ನನಷ್ಟು ರೋಧಿಸುವಂತೆ ಮಾಡಿ
ಒಮ್ಮೆಲೇ ಕುಗ್ಗಿಸಿಬಿಡುತ್ತದೆ,
ಸರಿಯೇ ಸದ್ದಿಲ್ಲದೆ ಸರಿವ
ಬಂಧ ಸರದಿಗಳು
ಹೀಗೆಯೇ ಒಂದೊಂದೆ,,
ನಾನೂ ಒಬ್ಬಳೆ ಆಗಲೂ ಈಗಲೂ
ಬಿಡು ಮುಂದೆಯೂ
ವಿಶೇಷವೇನಿದೆ?, ಎಲ್ಲಾ ಹಳೆಯದೇ,,!

16/07/2014

_________________

ಈ ಆಷಾಡ ಗಾಳಿಗೆ
ತಲೆ ನೋವು ತುಂಬಾ
ನೆಗಡಿ ಶೀತದೊಂದಿಗೆ
ದಿನವೂ ಮಳೆಯಲಿ
ನೆನೆಯೋ ವಿರಹಗಳು
ಬರೆಯದ ಕವನಗಳು,,

______________________

ಹದ ತಪ್ಪಿದ ಪದಗಳಲಿ
ಭಾವದುಂಬೋ ಹೆಣಗಾಟ
ಮತ್ತೆ ಜೀವಿಸೋ ಉತ್ಸಾಹ!!

15/07/2014
_________________

ಇಷ್ಟವಿಲ್ಲದ್ದನ್ನು
ಒಪ್ಪಿಸೋ ಪ್ರಯತ್ನವದು
ಒಂದು ರೀತಿಯ
ಹಿಂಸೆಯೇ ಸರಿ;
ಅರಳೋ ಮನವದು
ಪ್ರಫುಲ್ಲವಾಗರಳಲು
ಪ್ರೀತಿಯ ಪೋಷಣೆ,
ಜೊತೆಗೆ
ನಿರ್ದಿಷ್ಟ ಸ್ವಾತಂತ್ರ್ಯವೂ
ಅಗತ್ಯ ಬೇಕಿದೆ
ನಾವು,
ನಮ್ಮವರು
ಎಂಬ ಭ್ರಾಂತಿಗಳಲ್ಲೂ!!

14/07/2014

_____________________

ಮೂರು ದಿನದ ಬದುಕಲಿ
ನೋವಿಗೊಂದಾದರೆ
ರೋದಿಸಲು ಉಳಿದೆರಡು ದಿನಗಳಾಗದಿರಲಿ,
ಪ್ರೀತಿ ತುಂಬಿರಲು ಮನದಲಿ
"ನಗುವೇ ಜೀವನ,,,,,"

____________________

ಕಾಗದದ ದೊಣಿಯಂತೆ
ನನ್ನ ಪ್ರೀತಿ
ನಿನ್ನೆದೆಯ ಸಾಗರಕೆ,

ಸಾಗಬಹುದಿತ್ತು
ನನ್ನಾಸೆಯ ರಭಸಕೆ

ವ್ಯಥೆಯಿಷ್ಟೆ ನಿನ್ನ ನಿಟ್ಟುಸಿರೇ
ಬಿರುಗಾಳಿಯಾದದ್ದು,

ಮುಳುಗೊ ನನ್ನ ಕಾಗದದ ದೊಣಿಯ
ನೀ ಕೈ ಹಿಡಿಯದೆ ಕಾಗದದೊಳೇ ಪ್ರೀತಿಯ ಉಳಿಸಿದ್ದು,,

13/07/2014

___________________

ಅವಳಿಲ್ಲದ ಈ ಹೊತ್ತು
ನನಗಿಲ್ಲಿ ಕವನದ
ಸ್ಫೂರ್ತಿಯೇ ಕಳೆದು
ಹೋದ ಹೊತ್ತು
ತುತ್ತು ತುತ್ತು ಪದ ಮುತ್ತಿಗೂ
ಕನವರಿಸಿ ಅವಳ ನೆನೆದಂತೆ,,!
ಶಪಿಸಿ ಅವಳ ಗತ್ತು,,,

_____________________

ತಪ್ಪು ನಿನ್ನದಲ್ಲದಿರೆ
ಮತ್ಯೇಕೆ ಮರುಗುವೆ
ಮನವೇ,
ಬಿಡು ಅವರವರಂತೆ ಅವರ ಹಾದಿ
ಭೂಮಿಯಿರುವವರೆಗೂ ಗುರುತ್ವಾಕರ್ಷಣೆ ತಪ್ಪಿದಲ್ಲ
ಹೆಣ್ಣಿರುವವರೆಗೂ ಗಂಡಿಗೂ
ಅವರಿಬ್ಬರಿಗೂ ಈ ಪ್ರೀತಿಯ ಆಕರ್ಷಣೆ;
ಸುಮ್ಮನೆ ಹೀಗೆಯೇ ಹರಿದುಬಿಡೋಣ
ಸೇರಲೇಬೇಕಿದ್ದರೆ ಮುಂದೆ ತಿರುವಿರಬಹುದು!!

______________

ಹುಟ್ಟು ಕೋಪಿಷ್ಟೆ
ಎನಿಸಿಕೊಳ್ಳಬಲ್ಲೆ;
ನನಗೆ ದ್ವೇಷಿಸೋ
ಧೈರ್ಯವಿಲ್ಲವೋ,,!

ಯಾರಿಗೂ ತೊಡಕಾಗಿರಲೊಲ್ಲೆ
ಎಲ್ಲವ ಬಿಟ್ಟು ಬಯಲೊಳು
ಒಬ್ಬಳೇ ನಾ ನಿಂತರೂ ಸರಿಯೇ
ತಿರಸ್ಕಾರವ ಸಹಿಸಲಾರೆ ತಂದೆ,,
ಬಯಸದ ಜನರ ಮನದಲಿ ನಿಂದು!!

11/07/2014

ಕವನ

ಈ ಮಳೆ,,, ;-)

ಈ ಸಂಜೆ ಮಳೆಗೆ
ಮೆದುಗೊಳ್ಳದ ಮನವಿದೆಯೇ?
ದಿಕ್ಕೆಟ್ಟ ಬಯಕೆಗಳ ಕ್ರೊಢೀಕರಣ
ಮಧುರ ಭಾವಗಳ ತೋಂ ತನನ

ನೀರ ಹಬೆಯ ಮಸುಕು ದೃಷ್ಟಿ
ನಿನ್ನ ಕೈಯೊಳೆನ್ನ ಕೈ ಸೇರಿ
ನೀ ದಾಟೋ ಹೆಚ್ಚೆಗಳ
ಅನುಸರಿಸಿ ನಾನೆಡೆವಾಗ
ಭೂಮಿಯಾಚೆಯ ಆ ಲೋಕ
ಅದು ನಮ್ಮಿಬ್ಬರದು ಗೆಳೆಯಾ,

ಮತ್ತೊಮ್ಮೆ ಕಣ್ತುಂಬೋ
ಕನಸ ನೀಡೆಯಾ,
ಹೀಗೊಮ್ಮೆ ಕೈ ನೀಡಿ,,

ಕಾದಿರುವೆ ಭರವಸೆಗಳ ಹೊತ್ತು ತರವ
ನಿನ್ನ ಕಣ್ಣ ಕಾಂತಿಗಾಗಿ,,
ನಿನಗಾಗಿ, ನಿನ್ನ ಪ್ರೀತಿಯಾಸರೆಗಾಗಿ,,,!!

10/07/2014 :-)

ಕಾದ ಕಾತುರ,,,

ಸವಿಯೋ ಸವಿ ಕ್ಷಣಗಳಲಿ
ಸುಮ್ಮನೆ ಕಣ್ಣೀರಾದೆ;
ನಿನ್ನ ಕಾಣೋ ಆತುರದಲ್ಲಿ
ಭ್ರಮೆಗಳಲ್ಲಿ ಮರುಳಾದೆ
ಹಾಲಂತ ಕನಸುಗಳ
ಹೆಪ್ಪಿಟ್ಟ ಕಾರಣಕೆ
ಜರಿಯದಿರು ನನ್ನವನೇ
ನೀ ಬರುವ ಮುನ್ನ
ಗುರಿಯಿಲ್ಲದ ಸೋತ ದಾರಿ
ತುಳಿದೆನೆಂದು,,,

______________________

ಸೋತ ಅಷ್ಟೂ ಹೊತ್ತುಗಳು
ಮೋಸದ ಹೆಜ್ಜೆ ತಿರುವುಗಳು
ನನ್ನನಿನ್ನೂ ಬದುಕುವಂತೆ ಮಾಡಿದ್ದು
ನಿಜವೇ ಆದರೂ ಮತ್ತೂ ಅನಿವಾರ್ಯ,, 

10/07/2014

ಕವನ

ಮೆಚ್ಚಿಸಲು ನಾನ್ಯಾರೋ
ಮೆಚ್ಚಲು ನೀನ್ಯಾರೋ

ಮೆಚ್ಚಿಸಿದವಳೆಲ್ಲೋ,
ಮೆಚ್ಚಿದವನೆಲ್ಲೋ,

ಮೆಚ್ಚಿದವರು ಮೆಚ್ಚಿಕೊಂಡಂತೆ
ಹಚ್ಚಿಕೊಳ್ಳಲಾರದೆ ಉಳಿದಾಗ,

ನನ್ನ ಮೆಚ್ಚಿ ನೀ ಮತ್ತೆ
ಮೆಚ್ಚಿಸಿದವಳ ಮಾತ ಮೆಚ್ಚ,
ನಾನೆಂತು ಮೆಚ್ಚಲಿ ನೀ ಮೆಚ್ಚುವಂತೆ,,!!

09/07/2014

ಅವರ ಪ್ರಿಯ ಸುಳ್ಳು ಮೋಸಗಳು
ಪ್ರೀತಿಯಲಿ ಸಹಿಸುವುದು ಪ್ರಿಯವೆನಿಸಿ
ಹೋದಾಗ;
ಮೋಸವೆಲ್ಲಾ ಪ್ರೀತಿಯೇ,,,

ಇದ ಗೊತ್ತಿದ್ದೂ ಕೊರಗೋ ಮನಕೆ
ನಿಜ ಪ್ರೀತಿಯ ಮಾತೇಕೋ ರುಚಿಸದು,
ಮೋಸದ ಬೀಸಣಿಗೆಯೇ ಬೇಕು
ಮನದ ತಂಪಿಗೆ,,,

ಪ್ರೀತಿ ಕುರುಡು;
ಅದಲ್ಲವೇ ಅಲ್ಲ,
ಪ್ರೀತಿಯಲಿ ಕುರುಡು ಸಹಜ 

ಎನ್ನಬಹುದೇನೋ,, 

____________________________

ಬಹುಶಃ ಕೈ ಚೆಲ್ಲಿ ದೂರ ಸರಿದ ಮೇಲೆಯೇ
ನಮ್ಮೊಳಗಿನ ಕೀಳರಿಮೆ ಮಾತಾಗಿ
ಕಳೆದವರ ಕಾಳಜಿಗೆ ನಿಲ್ಲುವುದು ಅನಿವಾರ್ಯ ಜಂಜಾಟ!
ಇವುಗಳ ಮಾಡದಿದ್ದರೇ ಆ ಅವರ ಜೀವನ ಬಹುಶಃ 
ಸ್ವಂತದ್ದಾಗಿರಬಹುದು; ನಮ್ಮಂತೆ ಅಲ್ಲ!! 

___________________

ನಿನ್ನ ಹುಡುಕಾಟದಲ್ಲಿ
ನಾ ಕಾಡು ಮೇಡಾದರೂ ಅಲೆಯುವಂತಿದ್ದರೆ
ಚೆನ್ನಿತ್ತು,,
ಅರ್ಧ ಶೃಂಗಾರ ಸೌಂದರ್ಯವನಲ್ಲೇ ಸೇರಿಸಿ ಸವಿದುಬಿಡುತ್ತಿದ್ದೆ
ಹೀಗೆ ಸುಮ್ಮನೆ ಕಾಂಕ್ರೀಟ ಕಾಡಿನೊಳು
ತಂಗಾಳಿಗೆ ಹಂಬಲಿಸುತ 
ಈ ಸುಡುವ ವಿರಹವ ಕೈಲಿಡಿದು 

ಉರಿದುರಿದು ಬೀಳೋ ನಕ್ಷತ್ರ ಕಣ್ಗಳಡಿ ಮಾನಸ ಕಾಂತಿಗುಂದಿಸಿ,,

08/07/2014

__________________

ನಾಳೆಗೂ ಮುನ್ನ 
ಇಂದು 'ನಡುವೆ'ಯುಂಟು
ಇಂದು ದಕ್ಕಿದರೆ
ನಾಳೆಯ ಸುಖವುಂಟು
ಹಾಗೆಯೇ 
ದುಃಖವೆಂಬ ಅನುಭವದ ಗುರುವೂ,,,!

07/07/2014

_______________

ನಿನ್ನ ಆಸಕ್ತಿಗೆ
ನಾನು ಹಗುರಾದೆ
ಸುಮ್ಮನೆ ಹೀಗೆ ಹರಿದು,,,,

05/07/2014

ಆ ನೀರ ಸೆಳೆವು
ಅದೆಲ್ಲೋ ಇರುವಾಗ
ಅದರ ಮೇಲೊಂದು
ಕಾಗದದ ದೋಣಿಯಿಟ್ಟು
ತನ್ನತ್ತ ಬಾರದೀ ದೋಣಿಯೆಂದು
ಮರುಗುವ ಮನವಿದು ಮಗುವಂತೆ,,,,

04/07/2014
___________________________

ಒಂದು ಕ್ಷಣದ ನಿರ್ಧಾರ ತಬ್ಬಿಬ್ಬಾದರೆ
ಕಳೆದ ಹೊತ್ತೊ, ಒಡೆದ ಮುತ್ತೋ
ಆಗಿಬಿಡುವುದು; ಆದರೂ
ನಿರ್ಧರಿತ ವಿಚಾರಗಳಲಿ ವಿಚಲಿತಗಳಿಲ್ಲದಿರೆ
ಒಡೆದ ಹೊತ್ತು ದ್ವಿಗುಣ, ಕಳೆದ ಮುತ್ತೂ!!

__________________

ಕವನಗಳು
ಭರವಸೆಗಳೂ ಅಲ್ಲ,
ನಿರಾಸೆಯೂ ಅಲ್ಲ,
ಸಂಚಾರಿ ಆಶಯಗಳು,,
ಎನ್ನಬಹುದೆನೋ,,,,

____________________

ಮೈಮೇಲೆ ಬಿದ್ದ ಛಾಯೆಗೆ
ಬೆಚ್ಚಿ ಎಚ್ಚರಾಗಿದ್ದೆ
ನೀನಾಗಲೇ ಬಂದುಬಿಟ್ಟೆಯೆಂದು

ನನಗಿನ್ನು ಸಮಯ ಹೊಂದಿಸಿ
ಅಡುಗೆಗಿಳಿವ ಕಾಲ,
ಎದುರು ಮಾತುಗಳನು ತೊರೆಯೊ ಕಾಲ,
ಜಿಪುಣತನದಿ ಕೂಡಿಟ್ಟು ಜೀವಿಸೊ ಕಾಲವೆಂದು,

ಅರೇ ಇದು ಕನಸೇ,
ಅದು ಮರದ ನೆರಳೇ??
ಬಿಡು ಇನ್ನೂ ಸಮಯವಿದೆ ಮುಂಜಾವಿಗೆ
ನನಗೋ ಗಾಢ ನಿದ್ದೆ,,,, ,,,,, ,,,,,

04/07/2014

____________________________

ಅರ್ಥವಾಗದ ಭಾವಗಳೂ ರೂಪಕಗಳೂ
ನನ್ನನಿನ್ನೂ ಬೆಚ್ಚಿಸಿರಲು,,
ನಾನೋ ಅದ್ಯಾವುದೋ ಕುಗ್ರಾಮದ
ಜನಪದ ಹಾಡುಗಾರ್ತಿ;
ಉರು ಹೊಡೆದು ಗೀಗೀ ಪದ ಸಾಲನಷ್ಟೇ ಹಾಡಬಲ್ಲೆ
ನಿನ್ನಂತ ಕಲೆಗಾರಳಲ್ಲ ನಾ;
ಹೀಗೆಲ್ಲಾ ಬೆರಳಲೇ ನನ್ನೀ ತಲೆಯೊಳ ಮಸ್ತಕವ
ಹುರಿದು ಮುಕ್ಕಿಬಿಡುವೆಯಲ್ಲಾ?
ನನಗೀಗಲೇ ತಲೆಕೂದಲು ನೆರೆತಂತೆ ಒಮ್ಮೆ ಭಾಸವಾಗಿ,
ಮತ್ತೊಮ್ಮೆ ನಿನಗಿಂತ ದಶಕಕೂ ಮುಂದಿನವಳಂತೆ ಅನಿಸುವುದು,,
ನಾನಿನ್ನೂ ಪ್ರಾಥಮಿಕ, ನಿನ್ನದೋ ಪ್ರೌಢ!!
_____________________

ಅರ್ಥವಿಲ್ಲದ ಎಷ್ಟೋ ಕವನಗಳ
ನಾನೂ ಗೀಚಿಬಿಟ್ಟೆ;
ನಿನ್ನ ಅದರೊಳು ಹುಡುಕುತ,
ಹಾಗೇ ಸುಮ್ಮನೆಂದುಲಿಯುತ,,,

___________________

ಸಾವಿರ ಕಣ್ಣುಗಳು
ಅದ್ಭುತ ಬಣ್ಣಗಳು
ಅಗತ್ಯಕ್ಕಿಂತ ಹೆಚ್ಚೇ ತೋರು
ಖುಷಿಯ ಗರಿಬಿಚ್ಚಲು
ನೋಡಲೆರಡು ಕಣ್ಣು ಸಾಲದಷ್ಟೇ!
ಸಣ್ಣ ಗುಬ್ಬಿಯ ಕನಸೊಂದನೂ ಭರಿಸಿಕೊಳ್ಳಲಾರದು,
ತನ್ನ ಸೊಬಗಿನ ಭಾರವೇ ನೆಲ ಕಚ್ಚಿಸಿದೆ
ಆಗಸವನೆಂದೂ ಮುಟ್ಟದಂತೆ,,
ಅದಕ್ಕೂ ಹಾರಲಾರದ ಕನಸುಗಳಿದ್ದು
ಕೊರಗಿಬಿಟ್ಟಿವೆಯಂತೆ,,

ಅದೋ ಆ ಸುಂದರ ನವಿಲ
ನೆಲದಲೇ ಕುಣಿವ ಅನಿವಾರ್ಯ
ನಮ್ಮ ಮನರಂಜನೆ!

02/07/2014

_________________

ಒಮ್ಮೆ,,,

ಬೀಸೋ ಗಾಳಿಗೋ
ಸುರಿವ ಮಳೆಗೋ
ಗುಡುಗೊ ಮುಗಿಲಿಗೋ
ಬೆಚ್ಚದ,
ಅಚಲ ಮೇರು ಗಿರಿಯೇ
ಆಗಿಬಿಡಲಿ
ಈ ಹೃದಯವೊಮ್ಮೆ,,
ನಂತರವೆಲ್ಲಾ
ಸೊನೆ,
ತಂಗಾಳಿ,
ಕಾಮನ ಬಿಲ್ಲೆಂದು
ಕನಸು ಹೆಣೆದುಬಿಡುವೆನು,,, !!

30/06/2014

ಮನದ ಮಾತು

ನಗು,,,,,,,,,,,,, :-)


ಮಗುವು ಹುಟ್ಟಿದಾಗ ಆ ಮಗುವಿನ ಅಳು ಹೆತ್ತವರಲ್ಲಿ ಸಂತಸವನ್ನು ತರುತ್ತದೆ. ಬಹುಶಃ ಇದೊಂದು ಅಳುವಷ್ಟೇ ಹೆತ್ತವರು ಬಯಸಿದ ಖುಷಿಯಾಗಿರುತ್ತದೆ ಎನ್ನಬಹುದು. ಮಗುವಿನ ಮುಂದಿನ ದಿನಗಳಲಿ ಅದರ ಕಣ್ಣಲ್ಲಿನ ಒಂದು ಹನಿ ಕಣ್ಣೀರನ್ನು ಅವರು ಸಹಿಸದವರು. ಕೆಲವೊಮ್ಮೆ ನಮ್ಮನ್ನು ಅರ್ಥ ಮಾಡಿಕೊಳ್ಳಲಿಲ್ಲವೆಂದೊ, ಯಾವುದೊ ಅನಿವಾರ್ಯಕ್ಕೆ ನಮ್ಮ ಕೈಬಿಟ್ಟುರು ಎಂದೊ ತಂದೆ ತಾಯಿಯ ದೂರಿಬಿಡುತ್ತೇವೆ.
ತಂದೆ ತಾಯಿಯು ನಮ್ಮನ್ನು ಈ ಭೂಮಿಗೆ ತರುತ್ತಾರೆ, ಅದು ಅವರ ಆಸೆಗಳಿಗೋ ಬಯಕೆಗೊ,,,

ಹೌದು, ನಾವು ಅವರ ಆಸೆಗಳು, ಬಯಕೆಗಳ,,, ಹೀಗಿರುವಾಗ ಅವರ ಕಣ್ಣೇದುರೇ ನಮ್ಮ ಜೀವನ ದುಃಖಿಸುವಂತಾಗಬಾರದು. ನೋವು ನಲಿವುಗಳಿಲ್ಲದ ಜೀವವಿಲ್ಲ, ಬಂದ ದುಸ್ಥಿತಿಯನ್ನೂ ನಿಭಾಯಿಸಿ ಮುನ್ನಡೆಯಬೇಕು ನಮಗಾಗಿ, ನಮ್ಮನ್ನೇ ಅಸಹಾಯಕರಾಗಿ ನೋಡುತ್ತಲಿರುವ ಆ ದೊಡ್ಡ ಜೀವ ತಂದೆ ತಾಯಿಯರಿಗಾಗಿ.

ನಮ್ಮೆದುರೇ ತನ್ನ ಕಂದ ಎಡವಿ ಬೀಳುವುದನ್ನು ನೊಂದು ಬೇಯುವುದನ್ನು ಯಾವ ತಂದೆ/ತಾಯಿಯ ಜೀವವೂ ಸಹಿಸದು,,,,

ನಮ್ಮನ್ನು ಅಳುತ್ತಲೇ ಬರಮಾಡಿಕೊಂಡರು, ನಾವೂ ''ಓ,,,'' ಎಂದತ್ತರೆ,, ಅವರದು ಸಂತಸದ ನಿಶ್ಶಬ್ದ ಕಣ್ಣೀರ ಹರಿವು.

ಅಳುತ್ತಲೇ ಹುಟ್ಟಿದೆವು ಎನ್ನುವ ಕಾರಣಕ್ಕೆ ಜೀವನವ ಅಳುವಿಗೆ ಬಿಟ್ಟುಕೊಡಲಾಗುವುದೇ? :-)

ನಮ್ಮನ್ನು ಮಕ್ಕಳು ಎಂದು ಭಾವಿಸುವ ಆ ಎಲ್ಲಾ ಜೀವಗಳಿಗಾಗಿ ನಾವಿಂದು ಎಂತಹುದೇ ಸಂದರ್ಭದಲ್ಲೂ ನಗುತಾ ಬಾಳೊಣ,, ಖುಷಿಯ ಹಂಚೋಣ, ಹಂಚಿದಷ್ಟೂ ವೃದ್ಧಿಸುವ ಆಸ್ತಿಯದು.
ನೋವ ನುಂಗಿ ನಗುವುದೂ ಒಂದು 'ಗೆದ್ದಂತಹ ಸಂತಸ'ವೇ,, :-)

ಅಳು,, ವೇದನೆಗಳನ್ನು ಪಕ್ಕಕ್ಕಿಟ್ಟು ಒಮ್ಮೆ ಮನಸೊ ಇಚ್ಛೆ ನಕ್ಕುಬಿಡೋಣ ನಮ್ಮವರಿಗಾಗಿ,,,,,
ದೂರದ ತಾಯಿಯ ನೆನೆದು, ಹತ್ತಿರದ ತಂದೆ ಆಸೆಗಳ ನೆನೆದು,
ಇಷ್ಟು ದೊಡ್ಡವರಾದರೂ ಇನ್ನೂ ಮಗುವಂತೆಯೇ ಕಾಣೊ ಅಕ್ಕಂದಿರ ನೆನೆದು, ನಮ್ಮನ್ನು ಪ್ರೀತಿಸೋ ಜೀವಗಳ ನೆನೆದು,,,,, :-)

01/07/2014