ಕವನ

ಕನಸು ಕನವರಿಕೆ

ನಿದಿರಾದೇವಿ ಕಣ್ಣೆವೆಗಳ ಚುಂಬಿಸುವ 

ಮುನ್ನ

ನೀನೊಮ್ಮೆ ಮುತ್ತಿಟ್ಟು 

ತಲೆ ನೇವರಿಸಬಾರದಿತ್ತೇ

ಹೋಗಲಿ ಕನಸಿಗಾದರೂ ಬಂದುಬಿಡು

ನಿನ್ನ ಮಡಿಲಲೊಮ್ಮೆ ಮಲಗಿ

ನೆತ್ತಿ ಮೇಲಣ ಶೂನ್ಯವೆನುವ 

ವಿಶಾಲ ಕಪ್ಪೊಳು ಮತ್ತೆ ಮತ್ತೆ

ಚುಕ್ಕಿ ಚಂದ್ರಮರನ್ನೆಣಿಸುವಾಸೆ,,

ಬಯಲದಾರಿ ಹರಿವ ಪೂರ ಗರಿಕೆಹುಲ್ಲ 

ಹೆಕ್ಕುವಾಸೆ

ಹೊಳೆಯ ಝರಿಯ ಹನಿಯಲೊಮ್ಮೆ 

ಶೀತವೇರುವಂತೆ ಮೀಯುವಾಸೆ,

ಬಂದುಬಿಡು ಗೆಳೆಯನೇ, 

ಅತಿಯಾದ ನನ್ನ ತುಂಟತನಕೆ 

ನಿನ್ನ ಕನಸೇ ಸದಾ ಸ್ಫೂರ್ತಿಯಂತೆ

ತಡ ಮಾಡದಿರು ಇನ್ನೂ 

ನಿದಿರೆ ಮಾಯೆ ಚೆಲ್ಲುತಾ ಬರುತಿಹಳಿಲ್ಲಿ

ಮೆಲ್ಲ ಬರುತಿಹಳಿಲ್ಲಿ,,,

16/04/2014